1Na Job el fahk,
2“Aok, komtal aolla pusren mwet uh. Komtal fin misa, na lalmwetmet ac fah wi komtal na misa.
3Tusruktu oasr pacna ma nga etu oana komtal; Wanginna ma nga ten liki komtal kac; Mwet nukewa etu ma komtal fahk an.
4Finne mwet kawuk luk, elos isrunyu pac in pacl inge; Nga ne suwoswosna ac wangin mwetik, a elos isrun yu pacna; Tusruktu, oasr pacl God El tuh topuk pre luk.
5Komtal tiana pula ma upa, a komtal isrunyu; Komtal sringilya mwet se ma apkuran in ikori uh.
6Mwet pisrapasr ac mwet koluk elos mutana in misla, A pwayena god lalos pa ku lalos sifacna.
7“Finne won ku kosro lemnak uh, oasr pac ma elos ku in luti nu sumtal;
8Siyuk lalmwetmet sin ma orakrak fin faclu ac ik in meoa uh.
9Elos nukewa etu lah poun God pa oralosla uh.
10God pa kol moul lun ma El orala inge; Moul lun mwet nukewa oan ye ku lal.
11Tusruktu, insremtal engan in lohng kas uh, Oana ke loumtal lungse ema mwe mongo.
12“Lalmwetmet oasr sin mwet matu uh, Ke elos matuoh, yohk etauk lalos.
13Tusruktu God El sisani kewa lalmwetmet ac ku; El liyaten ac sessesla ke lalmwetmet.
14God El fin ikruiya sie ma, su ku in sifilpa tulokunak? God El fin kapriya sie mwet, su ac ku in tulala?
15Faclu ac paola God El fin tulokinya af uh; Sronot uh tuku ke El fuhlela af upa uh.
16“God El ku ac El kutangla pacl nukewa; Mwet kikiap ac mwet ma kiapweyukla kewa oan ye ku lal.
17El eisla nunak lalmwetmet lun mwet leum, Ac oru mwet kol uh in orekma oana mwet lalfon.
18El sisla tokosra uh liki nien muta fulat lalos, ac oru tuh elos in mwet kapir;
19El akpusiselye mwet tol ac mwet ma oasr wal la uh.
20El kaliya oalin mwet lulalfongiyuk uh in tia kaskas, Ac El eisla lalmwetmet lun mwet matu lukelos.
21El akmwekinye mwet leum uh Ac tulokinya ku lun mwet kol uh.
22El tolak yen lohsr, aok yen lohsr lun misa.
23El oru kutu mutunfacl uh in yohk ac pwengpeng, Na El sifilpa kutangulosla ac kunauselosla.
24El oru mwet leum lalos in lalfonla Ac fuhlela elos forfor oana mwet fohsak ac tuhlac;
25Elos kahlimin acn lohsr uh, ac tukulkul oana mwet sruhi uh.
