Iob 12

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ma Iob i ga tata ma i ga biti:

²A dovotina amutal iat a utul a matotono, Ma ba amutal a mat, a kabinana na mat varurung ma amutal.

³Ma iau bula, iau kabinana da amutal, Ma pa amutal manga kabinana tagu. To ia bar pa i nunure ra dari?

⁴A umana talaigu dia nongone iau, Iau a tutana nina God i ga valongore ba i ga kail tadav ia; A tena takodo, ma i ko kakit, go ra tutana dia nongone.

⁵Diat dia ki bulu dia nuk taun vue diat dia ki na malari, Dia to pin nina i to na bura.

⁶A umana tena nilong dia ki boina, Ma diat dia valar God dia ki bulu, Ma ra dekdek i diat, ia nam kadia god.

⁷Una tir ra umana leing ra pupui, ma diat a tovo u; Ma ra umana beo liuliu, ma diat a ve u;

⁸Una matoto ta ra rakarakan a gunaguna, ma una kapa tana; Ma ra umana en ta ra bala na ta diat a varvai piram.

⁹To ia bar ta diat pa i nunure Ba ra lima i ra Luluai i ga pait go?

¹⁰I kure ra lavur launa par, Ma ra nilaun kai ra tarai par.

¹¹Dave, ra talinga i ta tikai pa i valar kilang ra umana tinata, Da ra karameana i dum kilang ra nian?

¹²A kabinana i ki pire ra umana patuana, Ma ra minatoto pire diat i lolokon kadia nilaun.

¹³A kabinana ma ra dekdek dir ki pire God, Ma ia iat i vatur vake ra minatoto ma ra kapa na ninunuk.

¹⁴Nam nina i re vue, pa da vatur pa mule; Ma nina i banu bat ia, pa da papa are mule.

¹⁵I tigal bat ra bata, ma ra umana tava alir dia ge; I tulue mule, ma dia lovon ta ra gunagunan.

¹⁶A dekdek ma ra kabinana dir ki pirana, I kure ra tena vartuam ma nina di tuam pa ia.

¹⁷I vapurpuruan ra umana tena varvateten, Ma i valunga ra umana tena varkurai.

¹⁸I pala vue ra umana vivi kai ra umana king, Ma i vi pit diat ma ra mal na vivi.

¹⁹I ben vavilavilau vue ra umana tena tinabar, Ma i vaikilik pa ra umana luluai.

²⁰I vabombom ra umana melemuna ta ra tinata, Ma i vatuptup ra umana patuana.

²¹I manga kulume ra umana luluai, Ma i pala ra vipit kai ra umana tena ongor.

²²A umana magit na pidik ta ra bobotoi i kap vaarike diat, Ma i ben vairop ra malur na minat tadav ra kapa.

²³I vangala ra lavur vuna gunan, ma i nila vue bula diat; I vatababa ra lavur vuna tarai, ma i ben vavilavilau bula diat.

²⁴I vapurpuruan ra nuknuk i ra umana luluai pire ra tarai ta ra rakarakan a gunagunan, Ma i varara diat ta ra bil ba pa ta nga tana.

²⁵Dia paparai tupatupa ta ra bobotoi ba pa ta kapa tana, Ma dia papa lebalebe da ra tutana i longlong ta ra nimomo.