Job 12

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Agine Job, Zofarʼga weyob sogded:

²“Ar bemar odurdaked-sailaye be sogmarsunde. Ar bemar burgwidele, ¿bemarba binsaed-nikaa-dalegedi burgwidmosunnode?

³An bemaryobi binsaed nikamogad, gwen be angi obinsurmalad. Ar bemar-ibmar-sogsamaladi, ¿doa we-ibmar wissur be ebinsae? Bela wismala.

⁴”Gebeunni an Bab-Dummadse-gotele, Bab-Dummad an-abin-imakdaenad. Emigindina, aka an-aimar-oallega an guded. An ibmar-oakalossulin-inigwele, aka an-aimarga an dodogedga guded.

⁵Dule-gwen-boni-itodisurmaladi weyob sogdemalad: ‘Dule-boni-itodiidi mer bai be dake, dule-aimukubi-gudiid gatik be egee imake.’

⁶Dule-ibmar-atursamaladi, e-negyagi na yeer itodimalad. Ar wemar Bab-Dummad-ourwedimaladid, Bab-Dummad-gege-anmar-oakaloye, sogdimaladid.

⁷”Ibdurganse be ibmar egismalana, ar wemar bemar-odurdaksamalaled. Sikwimarse be ibmar egismalana, ar wemar bega ibmar sogsamalaled.

⁸Napneg-naidbogwa be sunmakena, ar we bemar-odurdaksaled. Demargi uamar-bukwadbogwa be sunmakena, wemar bemarga ibmar sogsamalaled.

⁹Ar wemar Bab-Jehová-bela-ibmar-imaksad, bela wismalad.

¹⁰Bab-Dummadgine, bela burba-dulad siid. Bab-Dummadgine, bela dule dula-gued siid.

¹¹Ar uaya, ibmar-goled magar itoged, degi, gwabin, ibmar-igi-gulleged magar itoged.

¹²Deginbali, dule-selebagus-gudimaladi, magasar neg-itomalad, binsaed-ibegan nanamalad.

¹³”Ar Bab-Dummaddi bur bule binsaed-nikaa gued. Abi gargangued bur bule nikabalid. Binsaed-nued-ukleged Bab-Dummadgadbiid, degine, magar-neg-itoleged egadbibalid.

¹⁴Ar Bab-Dummad ibmar-earisale, dule-wargwensaale bar sobosulid. Ar Bab-Dummad esgaryagi dule-metele, dule-wargwensaale gege bar onoged.

¹⁵Ar Bab-Dummad dii-owisulile, bela ibmar dingudeled. Ar dii-owierdi, bela neg-dogdebaliled.

¹⁶Bab-Dummadgine gargangued maid, degine, binsaed-nikagued egi danibalid. Bab-Dummadgi-siid, emar-yardaked, degi, dule-emarse-yardaklediid, igi imakoe.

¹⁷Ar Bab-Dummadi dule-binsaed-ibedmar-obingegsaed, degine, dule-igar-nabomalad suli-suli obinsabalid.

¹⁸Bab-Dummad, reymar-ibe e-negsemamaid osuloged, degine, rey maiga imakbalid.

¹⁹Bab-Dummad dule-irwa-Bab-Dummadse-gormalad-obingegsaed, degine, dule-bulegan-surbinsa-itogega imakbalid.

²⁰Bab-Dummad dule-binsaed-dakmalad-e-gaya-maked, degine, girmar-dummagan-binsaedsuli imakbalid.

²¹Bab-Dummad dule-nuga-nikamalad-obingegsaed, degi, dule-gandik-gudimalad gargangued-sate imakbalid.

²²Bab-Dummad ibmar-yaa-matusurmaladgi-bukwad magar-dakle imaked, degine, negasichidgi ibmar-bukwad magar-daklegega imaked.

²³Bab-Dummad neggwebur-merguega imaked, neggweburmar obelobalid. Bab-Dummad neggweburmar-oambikuega imaked, neggweburmar-aisakiega imakbalid.

²⁴Bab-Dummad dule-dummagan-yar-sedimalad-ibe e-binsaed-oburega imaked. Degidbali, negsulidganba-gudiiyobi imakbalid.

²⁵Negsichigangi-unimakdiiyobi imaked, mummuganyob banamakdiiyobi imaked.”