Job 41

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Job, egkevunuwit nu ve is dragun he Leviatan? Egkehiketan nu ve is bèbè din te pisì?

²Igkepelahus nu ve is pisì diyà te izung din? Etawa egkekew-itan nu ve te vunuwit is bakè din?

³Layun be sikandin edhangyù diyà te kenikew he ipaawè nu? Etawa ebpehizuhizu ve sikandin kenikew?

⁴Ebpekid-uyun be sikandin kenikew he ebpeuripen kenikew seled te tivuuk he untung din?

⁵Egkehimu nu ve heini he ayam iring te tagbis? Etawa igkeveǥey nu ve heini ziyà te menge anak nu he vahi he para velvelayen?

⁶Egkepemasa ve heini te menge nigusyanti he ebevehinen dan wey zan ikevelegyà?

⁷Ed-utengan be te serapang nu is lundis din etawa ulu zin?

⁸Emun egkeutel nu heini ne kenè nu egkelipatan is kereǥen te kedhingutela nu kayi, ne kenè nu en heini ed-umanan ebeeli.

⁹Wazà pulus te kedtinguhà ked-utel kandin. Su kegkaahaa nu pa kandin egkaawè en is burut nu.

¹⁰Emun wazà ebpeǥaruǥaru he edsamuk kandin ne hentei man is ebpeǥaruǥaru he edsukul kedì?

¹¹Hentei man is ebpekekaǥi te nekeutang a ziyà te kandin te ereg he ebelesan ku te meupiya? Te kediey man is langun he kayi te kelibutan.

¹²“Ed-umanan ku pa egkeǥiya ziyà te kenikew is bahin te lawa te Leviatan wey ke sengemenu is kegkemekeǥeǥehem din wey kezesen din.

¹³Hentei is ebpekaanis te lundis din etawa igkepeutengan din heini?

¹⁴Hentei is ebpekehimu he ebpeǥinganga kandin? Te mekahandekhandek man is menge ngipen din!

¹⁵Is peka zin ne zuen mekepal he menge pengalang he henduen be te nekelinya he menge kelasag.

¹⁶Nekedliliib heini he minsan is keramag ne kenà duen ebpekevayà, wey wazà ebpekaanis kayi.

¹⁸Emun ebpemusenga ne zuen edtik-ew edsiǥa, ne is menge mata zin edsiǥa he iring te kedsilà te andew.

¹⁹Ibpelepew zin is hapuy puun te vèbè din,

²⁰egawas is evel puun te izung din he henduen be te sengew te edìdì he kuzen he meregreg is tavun din.

²¹Is gehinawa zin ebpekevaǥa te vurit, su hapuy is egawas diyà te vèbè din.

²²Nepenù te zesen is lieg din, ne utew egkahandek is ebpekaahà kandin.

²³Minsan is sapù din ne nepurung mahasek wey mezesen.

²⁴Mezesen is gehinawa zin iring te ǥelingan he vatu.

²⁵Emun ed-enew sikandin ne egkengeteranta tenged te kegkahandek is mekeǥeǥehem he menge etew.

²⁶Wazà ispada, bangkew, besut etawa kelawit he ebpekezezaat kandin.

²⁷Diyà te kandin iring dà kelemineg te reǥami is putew, ne is brunsi iring dà te repuk he kayu.

²⁸Emun ebpenaan sikandin ne kenà sikandin ebpelaǥuy. Is menge vatu he idlimpawes diyà te kandin ne henduen dà te ukap is kegezama zin kayi.

²⁹Is kayu he idlagkut kandin, henduen dà te reǥami ziyà te kandin. Ed-engitan din dà is hagyung te vangkew he ibunlawit diyà te kandin.

³⁰Is getek din, ne zuen meǥarang he menge hun-ap he henduen be te menge bildu. Umbe ednayà heini emun edula ziyà te vasak.

³¹Edsimbeǥen din is daǥat he henduen be te egkaràkarà he wahig diyà te kuzen etawa lana he edìdì diyà te kitang.

³²Is wahig he egkeveyaan din eburàburà te meputì, he henduen be te meputì he vulvul is ked-ahaa zuen.

³³Wazà iring kandin kayi te kelibutan. Sevaha heini he linimbag he kenà egkahandek.

³⁴Ebpekevevaan din is langun he gelbuwen he menge langgam. Iyan heini hadì te langun he langgam he kenà ebpekeuram.”