Iob 41

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Dave, una il ra pukpuk ma ra ngie na il, Ba una vi ra karameana ma ra kuara?

²Dave, una vung ra vinau ta ra bilauna, Ba una go laka ra pagupagu na ngiene ma ra rumu?

³Dave, na lul vovo pa u, Ba na tata vovovon piram?

⁴Dave, na pait ra kunubu piram, Ba na toratorom vatikai tam?

⁵Dave, amur a limlibur me da u limlibur ma ra beo, Ba una vi ia upi kaum umana inip na vavina diat a ga tana?

⁶Dave, a umana talaim diat a balaguan tana, Ba diat a ivure ra umana pakapakana pire ra umana tena kunukul?

⁷Dave, una go ra palina ma ra umana rumu na palariam, Ba ra uluna ma ra umana rumu ai ra en?

⁸Una vung uka ra limam tana; Una nuk pa ra vinarubu, ma pa una pait mule!

⁹Ea, a ninunuk ung upi da kinim vake, a ninunuk vakuku ka; Ona ta tikai i gire ke, i dadadar ika tana.

¹⁰Pa ta tikai i rurung upi na vakurat ia. Ma akave ra tutana nina ba na tur pa ia?

¹¹To ia na ub ia, ma pa na balbali? Pa ta tikai ta ra vavai na bakut. Kaugu iat.

¹²Pa ina ki mut ure ra umana ingarina, Ba ra ngala na dekdekina, ba ra minamarina.

¹³To ia na kulit vue ra palina? To ia na go kana dekdek na vargal?

¹⁴To ia na papa ra ngiene? Di tingtingiran ta ra umana pal a ngiene.

¹⁵A umana vulegina dia ki ngaina ta ra tamuruna, Ma dia ki varpetep.

¹⁶Dia ki vartamtabirit, Kari pa ta vuvu i ruk tana.

¹⁷Dia ki varpakan vanavana; Ma tago dia ki rokot, i dekdek ba da al kaba pa diat.

¹⁸A kapa i pupua rikai. ba i mapiuak, Ma ra ura kiau na matana dir da ra malana ba i lar.

¹⁹A birao i irop kan ra ngiene, Ma ra umana pitil na iap dia pitil rikai.

²⁰A mi i irop kan ra bilauna, Da kan ra kabala i buabuai ma Ta ul i io.

²¹Kana ubar i topa ia ba da vabirao ra umana lakit na iap me, Ma ra birao i arikai ta ra ngiene.

²²A dekdek i bang ta ra inoana, Ma ra lavur magit par dia burut ure.

²³Di varpakane ra pal i ra pakana, I ki bulu tana, ma i dekdek upi da tak vue.

²⁴A balana i leo da ra vat, I leo da ra vat na uduudu.

²⁵Ba i tut, a umana rangrang na tutana dia burut, Dia dadadar ari i ubuubu lup ta ra ta.

²⁶A pakat na vinarubu pa i topa ta magit, Damana bula ra rumu ma ra pu ma ra magit i mangi tuna.

²⁷A palariam i da ra kubul pirana, Ma ra palariam gobol i da ra davai i maroto.

²⁸Pa na lop kan ra pu; Ma ra umana lika dia da ka ra timul a kunai pirana.

²⁹A umana ram dia da ra vuvur; Ma i nongone ke ra umana rumu dia bebe.

³⁰A balana i da ra umana epene vat dia mangi; I va da ra gegege tapiok ta ra pikai.

³¹I vakakapal ra ta da ra kabala; I vurue ra lamanana da di vurue ra vamong ta ra kaka.

³²A taina i pua murmur tana, Ma ta tikai na nuk ia ba ra ta iat i pua.

³³Pa ta magit i varogop me ta ra rakarakan a gunagunan, Tago pa i nunure ra bunurut.

³⁴I gire ra lavur ngala na magit; I king ure ra lavur magit i kolakolo.