Jopo 41

1

2

3

4

5

14

19

31

38

39

40

41

42

¹Embame oma kameya kemali pingi Lipaetane lenge doko ukumi kapa pyao nyerese? Panda banya kekenge doko puumi bwuakarese?

²Embame banya gyaa kata dokona puu pyambware panda banya angapu dokona uku puu dokome pyambwarese?

³Embame nembapili lao emba piso sokondali pirase? Embame baa sakame kumapili lapala angangi pii larase?

⁴Baame embapa lao palyapala embena yulu pyakao karalu kararo lao lalu lao larase?

⁵Embena kendemande wanake dupwa rae maiyuo kando karamili lao suu pyao embame yaka mondo nenge ipwape maiyuo rapu pinginyili pyuo baa rapu pirisi?

⁶Oma pingi akali dupwame baa kandapala akema lao kana kando mena belye pyuo isa nembo nyeramisi? Dee ropo pingi akali dupwame baa pyao kunjapala kana nyeramisi?

⁷Embena oma pingi kaku dokome banya yanenge dokona yalyarase panda kaku dokome banya ayemba dokona arekyarese?

⁸Embame yuu gii mendaki minyandare ramo doko dee minyandalana iki lara.

⁹Mendeme oma kameya kemali pingi Lipaetane doko kandaramo doko yamarangupala mee walu lao pao palira.

¹⁰Baa apu pingi dokopa mena nalana pingi ingyuo gasimwa pokelyamosa wambu mendemepe palenge dokona para ingya nange.

¹¹Api mendeme baa minyapala nyera ramo wambu doko range lete kararase? Yuu muu dupwana peparae wambu mendemepe dopa pirami ingya nange.

¹²Nambame Lipaetanena kimbu dokona banya poraipi dee apa pyuo andake laope dolapona lao polo langiruwale.

¹³Mendemepe banya kapa porai pee pingi dokona arekeyo pyaa narami dee banya yanenge doko minyuo pilya naramiko.

¹⁴Apimi banya angapu nenge pakame kumuo karenge doko minyuo angapu lakirase?

¹⁵Banya mata doko konambe wasisi dopale ingyuo pao suu lapala kana ingingi.

¹⁶Mendaki mendaki lao mendena gii koo lao poraiyuo pakara pakara pyuo silyasa kanya ŋee soo kaka soope pii nange.

¹⁷Dupwa peparae nyuo minyarambwapala pyuo pyakondape pilyamosa mendemepe ipyuo wakale wakale pyuo nyii nange.

¹⁸Baa imaketa pilyamo dokopa yuu pele pipala yanga paupau lao rali pingi. Banya lenge doko neta potemenge dopale.

¹⁹Banya nenge kata dokona isare uliyapu nyuo yanga paupau lao epo dee lelenge dupwa lele pyale pyuo nyisa epo penge.

²⁰Banya gyaa kata dokona isare sukwa epelyamo doko kulimbwanyi pelyamo dokopa isa yoko rapala kyau lenge dopale ingyuo epenge.

²¹Banya ŋee ŋae dokome isare ingyuo kanda soo relyamo dokopa lelenge dupwa banya nenge kata dokona pyakao epenge.

²²Banya mange dokona porai renge wakasa palelyamosa wambu peparaeme kandelyaminyi dupwa kando paka renge nyingi.

²³Banya yongo doko kuki pepalape dusa piku piku laa nange ama porai ane isa mendeme minyuo punjarami ingya nange dopale ingingi.

²⁴Banya mona kana pokapala ipwa peta kana mundu ingilyasa paka nange.

²⁵Baa roya karenge dokopa imambu wakale dupwame pakapala mende pinya saka nange.

²⁶Wua gela mendemepe baa pyao ranjama nyuope wua kaku walekyape dupwame pyaraminyi kapa ingya nara.

²⁷Baa keta ane isa porai dupwa mee kaka yau ingingi dee kana porai dupwa isa kupwa dopale ingyuo pingi.

²⁸Baa kaku dupwa kando pyakao paa nange. Dee kaname baa pilyaminyi dupwa mee bange ingyuo penge.

²⁹Baa keta akali dupwame kakumi pilyaminyi dokopa kando gilya giyana pyuo kusape dupwa mende ingya nange.

³⁰Banya yamanji kinju dupwa galase kambasi waepala dopale dokome yuu warape dupwana kalyingi dokopa wara dupwa lumbalya lumbana pyuo koko palyuo karenge.

³¹Baame ipwa kota dupwa nyuo kapu kyuo sanena ipwape mambape kisilyamano bolo pingi dopale ingingi.

³²Baa kata nyuo pelyamo dokopa matarena leya leya pingi. Ipwa kota doko maki maki manjo kasakole minyuo pinya lao nyuo kapu kyingi.

³³Isa yuunya mena suwape mendepa manda manja nange. Baa iki keta paka renge mende pali nange.

³⁴Baame mena suwape range mupwa lao suu pingi dupwa kandanyi isa palyapala mena suwape rae lenge rara wakale wakale wasiyamo silyamo dupwana baa iki kiŋi ingyuo karenge.