1Wal YAWEI bin kipgon tok, “Job, yu reken yu gin grebum det brabli bigiswan krokadail gulum Labaiyathan garram lain en huk, o taiyimap im mawus garram roup?
2Yu reken yu gin pudum roup thru im nos o pudum huk thru im jauboun en go lida langa im garram roup?
3Yu reken im gin askim yu blanga kain langa im?
4Yu reken im garra meigim pramis garram yu blanga wek blanga yu olataim?
5Yu reken yu gin taiyimap im garram roup langa im leig wulijim im gin jidan fren blanga ola lilgel?
6Yu reken sambodi garra kadimap im en selim im?
7Yu reken yu gin kilim im garram det spiya en longwan roup?
8If yu trai tatjim im, im garra gibit yu bigis trabul en yu kaan neba duwit igin.
9Enibodi hu luk det Labaiyathan garra bradin nomo lilbit en buldan langa graun.
10En if im brabli wailwan, nobodi gin go en jandap wansaid langa im. Wal hu garra dalim mi wanim ai garra dum?
11Mi na bos langa dijan wel, en ai kaan peiyimbek enibodi, dumaji nobodi bin gibitbat mi enijing.
12Dijan Labaiyathan im garram brabli strongbala leig en fetwan bodi.
13Hu yu reken gin breigimap im skin atsaidwei, en pudum spiya thru langa im? Nobodi, oni mi na.
14Hu gin opinimap im mawus garram brabli shapwan tuth? Nobodi! Oni mi na!
15Im bekboun jis laik loda shild weya jidan mijamet, en im brabli adwan wulijim ston. Ola bekboun blanga det enimul joinap brabli gulijap gija, en nomo enijing gin breigim.”
18Wal YAWEI bin kipgon tok, “Wen Labaiyathan im snis, im oldei meigim faiya kamat, en im ai dubala oldei shain wulijim det san.
19Im oldei meigim faiya kamat brom im mawus.
20En smok kamat brom im nos wulijim smok kamat brom pot wen im boilap.
21Wen im oldei blowim, im oldei meigim faiya kamat brom im mawus, en im barnimap ebrijing.
22Dumaji im nek im brabli bigiswan, enibodi hu oldei luk langa im sheiksheik nomo lilbit.
23Nomo eni wikwan ting langa im skin. Im brabli adwan wulijim aiyan.
24Blanga im hat im jis laik ston. Im nomo bradin blanga enijing.
25Wen Labaiyathan meigim nois ola strongbala pipul ranawei brabli bradinbalawei.
26Nomo eni spiya o naif kaan kilim im.
27Det aiyanwan spiya, im jis laik gras, en det kopawan spiya im brabli sofwan wulijim rabishwan wadi.
28Nomo eni erro kaan meigim im ranawei. Wen olabat tjakam ston langa im, im jis laik yu tjakam gras.
29Im oldei laf langa detlot men hu oldei tjakam spiya langa im, en wen dei hitimbat im garram detlot stik im jis laik detlot gras.
30Det binji blanga im, im brabli rafwan. Im oldei breigim det wetwan graun wulijim aiyan wen im meigim mak brom wen im wokwokbat.
31En wen im swim rait andanith langa det solwoda, det solwoda im babulap, wulijim oliboil wen im boilap.
32En im oldei libum biyain brabli shainiwan roud, en im meigim det solwoda go brabli waitwan.
33Nomo enijing iya langa dijan graun wulijim im. Labaiyathan nomo sabi bradin langa enijing.
34Im brabli praudbala enimul. Im na king blanga ola wailwan enimul.” Lagijat na YAWEI bin tok.
