Yuba 31

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Nxu nun n yɛɛne bata layirin xidi fa fala n nama sungutunna mato kunfani.

²Xa n na liga, Ala nanse rafɛ n ma keli kore? Ala Sɛnbɛ Kanna kɛɛn mundun nafama n ma keli kore?

³Halagin mi fama tinxintareyaan xan xɔn ba? Gbalon mi fama hakɛ kanne xan xa ba?

⁴Ala mi n sigati kiin toma ba? A mi n san funfune birin yatɛn kolon ba?”

⁵“Na ma, n sigan ti nɛn fuyantenyani ba? N sanne yi birama yanfan nin ba?

⁶Ala xa n sa sikeli tinxinxin fari, a yi n ma fɛtareya wanle to.

⁷Xa n keli nɛn a kiraan xɔn, xa n bɔɲɛn yi bira n yɛɛn fɔxɔ ra, xa xɔsi yo yi lu n yiine ra,

⁸nayi, n naxan sixi, gbɛtɛ xa na don, muxune yi n ma sansine matala na bɔxɔn ma.”

⁹“Xa n bɔɲɛn kunfa nɛn ɲaxanla nde xɔn, xa n dɔxɔ nɛn n dɔxɔ bodena ɲaxanla yɛɛ ra,

¹⁰nayi, n ma ɲaxanla xa lu xɛmɛ gbɛtɛ bun, e nun xɛmɛ gbɛtɛye yi kafu.

¹¹Amasɔtɔ xa n yi na liga nun, n ma yalunyaan yi findima fe haramuxin nan na, na yi findi hakɛn na kitisane naxan natɔrɔnɲɛ.

¹²N ma kalan yi findin tɛɛn na naxan yi n ganma han a n halagi fefe, a yi n hɛrisigɛn birin kala.”

¹³“N tondi nɛn kiti kɛndɛn sɛ n ma walikɛne xa ba, e mawuga n fari waxatin naxan yi?

¹⁴Xa n yi na liga nun, n nanse ligɛ Ala na keli waxatin naxan yi? A na na feen fɛsɛfɛsɛ, n na a yabima nanse ra?

¹⁵Amasɔtɔ a tan Ala keden peen nan nxu birin daxi, e tan nun n tan nxu ngane kui.”

¹⁶“N tondi nɛn tɔrɔ muxune maxɔdinna yabɛ ba? N kaɲa gilɛne lu nɛn e yigitɛgɛni ba?

¹⁷N kedenna donseen don nɛn ba, n mi se so kiridine yii?

¹⁸Anu, xabu n foninge waxatini, n lu nɛn kiridine masuxɛ alo e fafane. Xabu n da, n na n yengi dɔxi kaɲa gilɛne xɔn.

¹⁹N yiigelitɔɔn to nɛn ba, dugi mi yi naxan yii, hanma tɔrɔ muxuna marabɛnna yi naxan ma,

²⁰n mi yi e marabɛri ba n ma yɛxɛɛ xabe dugi binyene ra, alogo e xa duba n xa?

²¹Xa n na n yiini te nɛn kiridin xili ma, bayo n kitisane maliin sɔtɔma nɛn,

²²nayi, n tungunna xa ba n fanna ra, n yii tɔnsɔnna yi bolon n tɔnxɔnna ra.

²³N mi yi na ligɛ bayo n gaxuxi Alaa gbalon yɛɛ ra, n mi nɔɛ tiyɛ a yɛtagi a nɔrɔni xa n yi na liga nun.”

²⁴“N yi n yigin sa xɛmani ba? N yi a fala, n naxa, ‘I tan nan n kantan seen na?’ Ɛn-ɛn de!

²⁵N sɛwa nɛn n ma hɛrigɛ gbee kanyaan na ba, n nafunla naxanye sɔtɔ?

²⁶N to sogen to xɔlɛ, hanma n to kiken nayabuxin to kore xɔnna ma,

²⁷n bɔɲɛn mi kunfa wundoni. N mi e batu mumɛ.

²⁸Xa n yi na liga nun, na yi findima nɛn hakɛn na kitisane naxan natɔrɔnɲɛ, nayi n bata yi Ala ramɛ nun naxan kore xɔnna ma.”

²⁹“N sɛwa nɛn n yaxuna ɲaxankatan na ba? N na n bodon nɛn ba, fe ɲaxine to a li?

³⁰N mi n yaxune danga alogo Ala xa e faxa, bayo n mi tinɲɛ yulubin tongɛ n fala xuine xɔn.

³¹Naxanye birin yi fama n konni, ne yi a falama nɛn, e naxa, ‘Muxun birin lugoma suben na Yuba konni.’

³²Xɔɲɛn mi yi xima tandeni mumɛ, n yi n ma dɛɛn nabima nɛn dangu muxune xa.

³³N na n ma murutɛ feene luxun nɛn ba alo adamadi gbɛtɛye? N na n hakɛne luxun n yɛtɛ yi ba?

³⁴N yi gaxuxi yamana falan nan na ba? I laxi a ra a n yi gaxuxi denbayane maraɲaxun nan yɛɛ ra ba, han n yi n dundu, n lu n konni?

³⁵A yi rafanɲɛ n ma n ma mawuga xuiin yi ramɛ! N ma fala dɔnxɛne ni i ra, n na n yii fɔxɔn sama naxan ma, Ala Sɛnbɛ Kanna xa n yabi. Xa n yaxun yi mawuga kɛdin sɛbɛ n xili ma, na yi rafanɲɛ n ma.

³⁶N yi a sama nɛn n tungunna ma, n yi a so n xunna alo manga kɔmɔtina.

³⁷N nan n sigati kiin yɛbama nɛn a xa, n yi fa a yɛtagi alo kuntigina.”

³⁸“N ma bɔxɔn yi gbelegbele n xili ma ba? N ma xɛɛne yi e mawuga n fari ba?

³⁹N yi muxune bogi seene don ba, n mi e saren fi? N yi e kanne tɔrɔ ba?

⁴⁰Xa n yi na liga nun, nayi, ɲanle xa sabati n ma xɛɛne ma, benun murutun xa sabati, sɛxɛn yi sabati, benun fundenna xa sabati.” Yubaa falane danna ni ito ra.