Yuba 11

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Nama kaan Sofara yi falan tongo, a naxa,

²“Fala wuyaxini itoe yabi mi na ba? Falan nan tun yoon fima muxun ma ba?

³Muxune dundɛ i ya fala ɲaxine bun ma ba? I magelen tiyɛ ba, muxe mi i rayagi?

⁴I a falama, i naxa, ‘N ma fekolonna sariɲan, fɛ yo mi n na Ala yɛtagi.’

⁵Koni, xa Ala yi waxi falan ti feni nun, xa a yi a dɛni biyɛ a falan ti i xa nun,

⁶xa a yi a fekolonna wundone fala i xa, naxanye fan xaxinla xa, nayi, i yi a kolonma nɛn a Ala mi i hakɛne birin saranxi i ra.”

⁷“I nɔɛ Ala miriyane kolonɲɛ? I nɔɛ Ala Sɛnbɛ Kanna sɛnbɛn danna kolonɲɛ?

⁸A mate dangu kore xɔnna ra. I nanse ligɛ? A tilin laxira xa. I nanse famuma?

⁹A kuya dangu bɔxɔn na, a gbo dangu fɔxɔ ige baan na.

¹⁰Xa Ala fa muxune suxɛ, xa a e xili kiti sadeni, nde nɔɛ a matandɛ?

¹¹Amasɔtɔ, Ala fuyantenne kolon, a na hakɛn to, a mi a yɛɛn naxiyɛ a ma.

¹²Koni, kɔmɔn mi nɔɛ findɛ xaxilimaan na, alo sofali xuruxin to mi barɛ burunna ra.”

¹³“I bɔɲɛn nafindi Ala ma, i yiin ti a tan xa,

¹⁴i mɛ i hakɛne ra, i nama tin tinxintareyaan yi so i konni.

¹⁵Nayi, fɛ mi luma i ra, i xunna kenla sɔtɔma nɛn, i findi muxu kɛndɛn na, i mi fa gaxuma sese ra.

¹⁶I ɲinanma nɛn i ya sɔxɔlɛne ra, i ɲinanma nɛn e xɔn alo igen naxan danguma xude wunla ra.

¹⁷I ya siimayaan makɛnɛnma nɛn alo yanyi tagina, a dimin yi lu alo xɔtɔnna.

¹⁸I lannayaan sɔtɔma nɛn, bayo i yigin sɔtɔma nɛn, Ala i rakantanma nɛn i lu bɔɲɛ xunbenli.

¹⁹Muxu yo mi fa i raxulunɲɛ i ya xixɔnli, muxu wuyaxi fama nɛn i xandideni.

²⁰Koni, ɲaxudene yɛɛn danxuma nɛn, e yigin kalama nɛn, e yengi fa tixi sayaan nan na.”