Yuba 32

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Elifasi nun Bilidada nun Sofara yi ba falan tiyɛ Yuba xa, bayo a yi a yɛtɛ mirixi tinxinden nan na.

²Nayi, Elihu yi xɔlɔ, Busi kaan Barakɛli a dii xɛmɛn naxan Rami xabilani. A xɔlɔ Yuba xili ma, amasɔtɔ a yi a falama nɛn a a tinxin Ala yɛtagi.

³A mɔn yi xɔlɔ xɛmɛ saxanne ma, bayo e mi yabi faɲin sɔtɔxi Yuba ra, na feen yi lu alo Ala nan findixi fe kalan na.

⁴Bayo e yi fori a xa, Elihu yi a sabari, a munma yi falan ti Yuba xa.

⁵Koni Elihu to a to yabi mi yi fa xɛmɛ saxanna ne dɛ, a yi xɔlɔ.

⁶Nayi, Elihu, Busi kaan Barakɛli a dii xɛmɛn yi falan ti, a naxa, “N tan nan mɔn foningeyani, fonna nan ɛ tan na, nanara n yi xuruxurunma, n gaxu n ma kolonna yitɛ ɛ ra.

⁷N yi a mirixi nɛn, n naxa, ‘Fonne nan lanma e falan ti, fonne nan lan e fekolonna xaranna ti.’

⁸Koni ɲɔndin naxan na, naxan xaxinla fima muxun ma, niin nan na ra, naxan kelima Ala Sɛnbɛ Kanna niiraxinli.

⁹Siimayaan xa mi tun fama fekolonna ra, kiti kɛndɛn kolonna mi fama foriyaan xan xɔn tun.

¹⁰Nanara, n na a falama, n naxa, ‘Yuba, i tuli mati n fan na. N fan xa n ma kolonna yita i ra.’ ”

¹¹“Han iki, n bata ɛ falane ramɛ, n yi waxi ɛ fe kolon falane nan namɛ fe yi, han ɛ yi ɛ falane yɛba.

¹²N na n tuli matixi nɛn ɛ ra ki faɲi, koni ɛ tan sese a fala mi Yuba kɛnɛnxi, ɛ tan sese mi a falane yabixi a faɲin na.

¹³Ɛ nama a fala, ɛ naxa, ‘Nxu bata yabin sɔtɔ fekolonni fa fala Ala nan keden nɔɔn sɔtɛ Yuba ma, muxun mi a ra.’

¹⁴Yuba mi a falane tixi n tan xan xili ma, n mi a yabima alo ɛ tan.”

¹⁵“Yuba, i lanfane bata tunnaxɔlɔ e ma, e mi fa i yabima, fala mi fa e xɔn.

¹⁶N mɔn xa lu sabarixi ba, hali e to mi fa fala tima, bayo e bata e dundu, e mi fa yabi tima?

¹⁷N fan waxi n ma yabin ti feni. N fan waxi n ma kolonna yita feni,

¹⁸bayo fala gbegbe n kui, n xaxinla n nadinma n xa falan ti,

¹⁹na bata n bɔɲɛn nate, alo manpa nɛnɛn naxan wuyenna a sa seen balanxini bɔma.

²⁰N xa falan ti, nanara a godɛ, n xa n dɛni bi, n yi n ma yabin fi.

²¹N mi muxu yo rafisama a bode xa. N mi muxu yo matɔxɔma.

²²A yɛtɛna, n mi fatan muxu matɔxɛ, xanamu, naxan n daxi na yi n faxama nɛn mafurɛn.”