Yuba 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Yuba yi a yabi, a naxa,

²“Ɛ luma n ɲaxankatɛ han waxatin mundun yi, ɛ n sɔxɔlɛ ɛ falane ra?

³Ɛ bata n konbi han sanɲa ma fu, ɛ mi yagɛ n tɔrɛ sɔnɔn ba?

⁴Hali n bata tantan, n ma tantanna goronna luma n tan nan xun ma.

⁵Xa ɛ ɛ yɛtɛ yite n xili ma, ɛ yi n mafala n yagi feen na,

⁶nayi, ɛ xa a kolon a Ala nan tɔrɔni ito ragidixi n ma, a n mafilin a yalani.

⁷Xa n gbelegbele tɔrɔni ito bun, n mi yabi sɔtɔma. N na xinla ti n mali feen na, kiti kɛndɛn mi sɛ.

⁸Ala bata kiraan suxu n yɛɛ ra, n mi nɔɛ danguɛ, a yi dimin naso n ma kiraan xɔn.

⁹A bata n ma binyen ba n yi, a yi n ma xunna kenla ba n yi naxan yi luxi alo manga kɔmɔtina n xa.

¹⁰A bata n kala yiren birin yi, n naxɔrima nɛn. A bata n yigin kala alo wudin talaxina.

¹¹A bata xɔlɔ n xili ma han, a yi n yatɛ a yaxun na.

¹²A yɛngɛsone bata e malan, e fa n xili ma, e yi n konna rabilin.”

¹³“A bata ngaxakedenne masiga n na, naxanye n kolon, ne bata siga ayi pon.

¹⁴N kon kaane bata n nabeɲin, n lanfane yi ɲinan n xɔn.

¹⁵N ma muxune nun n ma walikɛ ɲaxanle birin n yatɛxi alo xɔɲɛna, n bata findi xɔɲɛn na e yɛɛ ra yi.

¹⁶N na n ma walikɛɛn xilima, koni a mi n yabima, hali n na a mafan.

¹⁷N ma ɲaxanla mi fa tinɲɛ n dɛɛn xirin ma, n ma fe bata raɲaxu n ma denbayaan ma.

¹⁸Hali dii ɲɔrɛne, n naɲaxu e birin ma, n na keli, e n mafala.

¹⁹N naɲaxu n xɔyi kɛndɛne birin ma, hali naxanye rafan n ma, ne bata e xun xanbi so n yii.

²⁰N bata doyen, n kidin nun n xɔnne nan gbansan fan n ma.

²¹N xɔyine, ɛ kininkinin n ma, ɛ kininkinin n ma, bayo Ala sɛnbɛn bata n ɲaxankata!

²²Nanfera ɛ n sagatanma alo Ala? Ɛ munma wasa n ɲaxankatadeni ba?”

²³“N yi waxi a xɔn ma nun n ma falane yi sɛbɛ, e yi sa kɛdini,

²⁴e yi sɛbɛ yɔxɔ lefaan ma wure ɲɔɛ ralemunxin na, e yi kɛrɛndɛn fanyen ma han habadan!

²⁵N na a kolon a n xunbamana a nii ra. Dɔnxɛn na, a kelima nɛn, a ti bɔxɔ xɔnna ma.

²⁶Hali n fati kidin birin na kun fureni, n gbindin sa Ala toma nɛn.

²⁷N na a toma nɛn, n na a tan nan toma, gbɛtɛ mi a ra. N kunfaxi na waxatin xɔn!

²⁸Ɛ a falama, ɛ naxa, ‘En na a sagatanma di? En fa fɛɛn mundun toma a ra a yalagi xunna ra?’

²⁹Anu, ɛ yi lan nɛn, ɛ gaxu silanfanna yɛɛ ra, amasɔtɔ Ala ɛ saranma nɛn ɛ ɲaxankatane ra sayaan na. Nayi, ɛ a kolonma nɛn a Ala kitin na.”