Yuba 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Teman kaana Elifasi mɔn yi falan ti, a naxa,

²“Adamadiin tɔnɔna Ala ma ba? Hali xaxilimana, a tɔnɔn luma a yɛtɛ nan tun ma.

³I na tinxinɲɛ ayi, na tɔnɔna Ala Sɛnbɛ Kanna nan ma ba? Xa fɛ mi i sigati kiin na, na munanfanna a ma ba?

⁴I mirixi a ma ba a Ala i ratɔrɔnma nɛn, a i xali kiti sadeni, i to gaxuxi a yɛɛ ra?

⁵I ya fe ɲaxine mi gbo ba? I hakɛne dan mi na.

⁶I yi tolimaan tongoma i ngaxakedenne yii fuun nin, i yi e dugine ba e ma, i yi e magenla lu.

⁷I mi yi igen soma muxun yii min xɔnla naxan ma, i yi tondi donseen soɛ kamɛtɔɔn yii.

⁸Yamanan yi sɛnbɛmaan nan yii, wasoden nan yi dɔxi yamanani.

⁹I yi kaɲa gilɛne raxɛtɛma nɛn e yii genla ra, i yi kiridine ɲaxankata.

¹⁰Nanara, i rabilinxi luti ratixine ra, gaxun yi i suxu xulɛn.

¹¹Nayi, i mi dimini ito toma ba, i mi fufani ito toma ba naxan i rabilinxi?”

¹²“Ala mi kore xɔnna xan ma ba? Sarene mato kore, e mate pon!

¹³I a falama, i naxa, ‘Ala nanse kolon? A nɔɛ kitin sɛ kunda dimin xanbi ra ba?

¹⁴Kundana a yɛɛ ma, a mi sese toma, a nɛma kore xɔnna rabilinɲɛ.’

¹⁵I mɔn waxi lu feni kira fonni ito xɔn ba, muxu ɲaxine sigan tima naxan xɔn?

¹⁶E faxan nɛn benun e waxatin xa li, alo fufa gbeen banxi kanken xalima kii naxan yi.

¹⁷E yi a falama nɛn Ala xa, e naxa, ‘I masiga nxu ra. Ala Sɛnbɛ Kanna nan i tan na, koni i nɔɛ nanse ligɛ nxu ra?’

¹⁸Anu, Ala nan e banxine rafe nafunla ra. Ee! Ɲaxudene fe yitɔnxine raɲaxu n ma!

¹⁹Tinxindene na e to gbaloni, e sɛwa. Sɔntarene e magelema nɛn, e naxa,

²⁰‘En yaxune bata raxɔri! Tɛɛn yi e yiiseene halagi.’ ”

²¹“Lanna xa lu ɛ nun Ala tagi, nayi, i bɔɲɛ xunbenla sɔtɔma nɛn, i hɛrin sɔtɔ.

²²Ala i xaranma naxan ma, i na suxu, i yi a falane sa i bɔɲɛni.

²³Xa i mɔn fa Ala Sɛnbɛ Kanna ma, a mɔn i sɛnbɛ soma nɛn. I xa tinxintareyaan masiga i konna ra,

²⁴i xa i ya xɛma faɲin woli ayi bɔxɔni, hanma i sa a bira xude yi gɛmɛne longonna ra.

²⁵Ala Sɛnbɛ Kanna nan xa findi i ya nafunla ra, alo xɛmaan nun gbeti fixɛ gbeena i xa.

²⁶Nayi, i sɛwan sɔtɔma nɛn Ala Sɛnbɛ Kanni, i xunna kenla sɔtɔ Ala yɛtagi,

²⁷i yi a maxandi, a yi i yabi, i yi i dɛ ti xuine rakamali.

²⁸Xa i fena nde ragidi, Ala a rakamalima nɛn i xa, kɛnɛnna luma nɛn i ya kiraan birin xɔn.

²⁹Ala na muxuna nde rayagi, i a falama nɛn a Ala na ligaxi nɛn bayo wasoden nan na kanna ra, koni, naxan na a yɛtɛ magodo, Ala na rakisima nɛn.

³⁰Ala nan sɔntarene xunbama, nanara, xa i sariɲan, a i xunbama nɛn.”