1Naama vaiti poluma, ti ʋaani, ti ɠɛ Zozɛfe ma: «Wɛlɛ, è-ɠɛɛ ɠa zeeɓɛzu.» É ná-doun zunu felegɔiti seɠeni ya, Manasee ta Efelayime.
2Ti liini, ti daazeeli Zakɔɓe ma ga: «È-loun zunui Zozɛfe ɠa ʋaazu è ʋɔ bɛ.» Izelayɛle zuvikɛiti kpein gaalɛɛni ba, é wuzeɠe, é zei ná-betei zu.
3Zakɔɓe ɠɛni Zozɛfe ma: «GALA Zɛbɛi-Pɛ-Maliɠii ɠulani bɛ̀ kɛlɛma Luze, Kanaan yooi zu, é tuya looni bɛ̀.
4É ɠɛni mà: ‹Nà è ɠɛɛzu ga kpuɠu nu, gè è ɠaawɔɔlɔ, gè è ɠɛ ga zii mɔinmɔin. Nà niima yooi ve è-mavofodai ʋɛ, ɗɔun ɗa zeɠena ná, toɠa ɠɛ ɠɔ ga è-mavofodai nɔnɔ.›
5Doun zunu felegɔiti ti zɔlɔɔgai è ʋɛ Ezipete yooi zu, aisa gè ʋa ʋa è ʋɔ bɛ, Efelayime ta Manasee, naati ta ɠɛ ga nɔ̀nɔiti, eɠɛʋelei nɔ Luɓɛn ta Simiyɔnni ti la zèa.
6Kɛlɛ, dointi è ti zɔlɔɔga niiti poluma, naati ta ɠɛ ga ɗɔnɔiti. Ta tɔnɔ ma ʋoganii zɔlɔɔ ti-liɛni ta-yooi zu.
7Mazɔlɔɔ gè ɠɛni ɠalesu ma, gè ɗa zeɠe Padan-Alame, Lasɛle zaani pelei zu kòbaʋɛ, Kanaan yooi zu, ná maa la ɠɛni ɠoozani gola Efelata ʋa. Miná ɠa gè maaɠuluni ná, Efelata pelei zu.» (Efelata é lolisu ɓalaa ga Ɓɛteleyɛme.)
8Izelayɛle wɛlɛni Zozɛfe ná-doun zunuiti ba, é ɠɛ ma: «Ɓɛni ka ga niiti?»
9Zozɛfe kɛɛɠɛ wooɠaaʋoteni, é ɠɛ ma: «Dòun zunuiti kana, GALA ge ti vea zèa ʋɛ.» Izelayɛle ɠɛni ma: «Nà è maanɛɛnɛzu, ti maaɓuɠa lɛɛ bà, ga gè tuya loo ti ʋɛ.»
10Izelayɛle ɠaazuʋɛti maaɓidini pɔlɔzaɠagi maaʋele ma, é la mɔ ɠɛni wozaɠaazu fɔɔn. Zozɛfe ti zeɠeni, é ti maaɓuɠa ba. Izelayɛle laaʋɛɛni ti-ɠomagaʋɛti, é ti nɛɛnɛ.
11Izelayɛle ɠɛni Zozɛfe ma: «Gè la ɠɛni ɠisiɛzu ga nà è-ɠaazuʋɛ ɠa ʋolu mɔnɔ, kɛlɛ wɛlɛ, GALA ge vaa bu vɔlɔ gè ɠaazula è-lointi ma.»
12Zozɛfe ná-doun felegɔiti kulani kɛɛɠɛ ɲiibiiti zɔɠɔzu, é nɔkɔ zooi ma.
13Naa ʋoluma Zozɛfe ti felegɔ pɛ seɠeni, é Efelayime zoni ga zeezai, é naa lo Izelayɛle ɠɔʋɛzu ʋelei, é Manasee zo ga ɠɔʋɛi, é naa lo ga Izelayɛle yeezazu ʋelei, é ti maaɓuɠa ba.
14Kɛlɛ Izelayɛle zeezai maaleni, é pɛɛ Efelayime unma, nii é ɠɛni ga loungoi, é ɠɔʋɛzu ʋele yeei wuzeɠe, é pɛɛ Manasee unma. É zeeiti gaaʋolani ba, anɛɛ ni Manasee ɠa é ɠɛni ga doun mɔungi.
15É tuya looni Zozɛfe ʋɛ, é ɠɛ ma: «GALAGI niigi kɛ̀ɛ Aɓalaame ta kɛ̀ɛ Izaake ti ziɛni gaazu, GALAGI nii togai tùɠɔ sìi ma voloi pɛ su eyɛsu za,
16geezuɠeelai nii é kìzoga faa ɲɔi kpein ma, naa tuya loo niima zunu loungoiti bɛ. Ti ɗa ti loli ga dàaseigi, ta kɛ̀ɛni daaseigi, Aɓalaame ta Izaake, ti wola ɠaawɔɔlɔ zooi zu ná pɛ.»
17Zozɛfe kaani ga kɛɛɠɛ ɠa yeezai laazu Efelayime unma, naa la ɠɛni nɛɛni bɛ. É kɛɛɠɛ yeei zoni ga é seɠe Efelayime unma, é lii la Manasee unma ʋelei.
18Zozɛfe ɠɛni kɛɛɠɛ ma: «Mina kɛ ɠana kɛ̀ɛ, mazɔlɔɔ nii ma gelei ɠa é ga doun mɔungi. È-yeezai la nɔungi ma.»
19Kɛɛɠɛ ɠɛlɛni, é ɠɛ ma: «Gè kwɛɛ, dòun zunu, gè suɠwɛɛ. Tɔ ɓalaagi toɠa ʋaazu ɠɛɛzu ga nuɓusɛ mɔinmɔin, gaawɔɔlɔ. Kɛlɛ deɠe zunui ɠa wɔɔlɔzu, é leʋe tɔun ba, mavofodaiti ta ɠɛ ga zii wola.»
20Naama volo ná, é tuya looni ti felegɔ ʋɛ, é ɠɛ ma: «Izelayɛle nuɓusɛiti ta wo-laaseigi wo ta-luyai zu, ti ɠɛ ma: ‹GALA ge è ɠɛ ga Efelayime ta Manasee ɠɛʋele.› » Zekana é Efelayime leʋeni da Manasee luɠɔ.
21Izelayɛle ɠɛni Zozɛfe ma: «Sàa yeei ɠana ʋa zeelizu, wɛlɛ GALA ka ɠɛɛzu wo ʋa, toɠa wo ɠaaɠale ma, é li ga woye, wo-mɛmɛwolani ta-yooi zu.
22Nɔ̀un nà, nà Sikɛme yooi zeɠezu, gè da ɗɔnɔi ma, é leʋe è-ɠɛɛlointi tɔnɔi ʋa, nii gè kulani Amɔɔl nuiti zea, ga nà-boɠa zɔkpɔi, ta nà-kilɛgi.»
