1Gↄrↄ pla gbɛra ò ò Yusufunɛ a de tɛn gyã kɛ, akũ à a nɛ́ gbɛ̃nↄn planↄ Manase kũ Ɛflaimuo sɛ̀tɛ à gɛ̀ɛ kũńwo.
2Kũ ò ò Yakubunɛ a nɛ́ Yusufu sù a gwa, à kokari kɛ̀ à fùtɛ à vùtɛ a gádo musu.
3À pì Yusufunɛ: Luda Gbãnasĩndapinkide bò à sùma zaa Luzu, Kanaanↄ bùsun, à arubarikaa dàmagu
4à pìmɛnɛ áni tó mà nɛ́ i manamana, áni ma kara mà gↄ̃ burinↄ dizi ũ áni bùsuu pì kpá ma burinↄa ma gbɛra ń pↄ́ ũ ari gↄrↄ sĩnda pínki.
5Tera sà nɛ́ gbɛ̃nↄn pla kũ n ń í Misila ari màgↄ̃ su n kĩnaanↄ ma pↄ́nↄmɛ. Ɛflaimu kũ Manaseo gↄ̃̀ ma nɛ́nↄ ũ lákũ Rubɛni kũ Simɛↄo de nà.
6Nɛ́ kũ ĩni ń i ń gbɛranↄ mɛ́ onigↄ̃ de n pↄ́ ũ, oni ń túbi ble ń vĩ̀ninↄ kĩnaa.
7Zaakũ kũ matɛn su kũ Mɛsↄpↄtamiao, n da Rahila gà zɛ́n Ɛflata kũ òdi pi tera Bɛtilihamu lɛ́i zaa Kanaanↄ bùsun, akũ ma a vĩ̀ zɛ́n gwe.
8Akũ Isaraila Yusufu nɛ́nↄ gwà à pì: Dínↄn gwee?
9À pì a denɛ: Nɛ́ kũ Luda ma gba lanↄn gwe. Akũ Isaraila pì: Ǹ mↄ́ kũńwo ma kĩnaa mà sa'olɛ kɛńnɛ.
10Zĩkũna Isaraila wɛ́ bùsa àtɛn gu e manaro, akũ Yusufu nài kũ nɛ́ pìnↄ. Isaraila lɛ́ pɛ̀pɛḿma à ń kpá a kùla,
11akũ à pì Yusufunɛ: Mádi da yã mà wɛ́ sinlɛ doro, akũ Luda tò ma n e kũ n nɛ́nↄ dↄ.
12Yusufu ń gó a de gbála, akũ à kùtɛnɛ à a arɛ pɛ̀tɛ.
13Akũ Yusufu a nɛ́nↄ kũ̀ ń pla ń pínki. À Ɛflaimu kũ̀ kũ ↄplao Yakubu ↄzɛ kpa, akũ à Manase kũ̀ ↄzɛ kpa Yakubu ↄpla kpa, akũ à nài kũ nɛ́ pìnↄ.
14Akũ Yakubu a ↄ pã̀kↄ̃la à a ↄpla nà Ɛflaimu kũ à de dakũna ũ mìia, à a ↄzɛ nà Manase kũ à de daudu ũ mìia.
15Akũ à sa'olɛ kɛ̀ Yusufunɛ à pì: Luda kũ ma dizinↄ Ibrahĩ kũ Isaakuo táa ò kãao, Luda kũ à dòmɛnɛ arɛ ma kunnaa gũn ari kũ a gbãrao,
16a Malaika kũ à ma bo a vãnin pínki à arubarika da nɛ́ díkĩnanↄgu, à tó ògↄ̃ ń sísi ma tↄ́a, kũ ma dizinↄ Ibrahĩ kũ Isaakuo tↄ́o, à tó ògↄ̃ kↄ̃ manamana andunia gũn.
17Kũ Yusufu è a de a ↄpla nà Ɛflaimu mìia, adi kɛnɛ nnaro. À a de ↄ kũ̀ de à go Ɛflaimu mìia à na Manase pↄ́a
18à pì: Lɛnlo Baa, gbɛ̃ díkĩna mɛ́ à daudu ũ. Ǹ n ↄpla na a mìia.
19Akũ a de gì à pì: Má dↄ̃ ma nɛ́, má dↄ̃. Àpi sↄ̃ ani gↄ̃ buri ũ, anigↄ̃ zↄ̃kↄ̃, ama a dakũna zↄ̃kↄ̃ nigↄ̃ deala, a buri nigↄ̃ dasi.
20Zĩ kũ̀a à sa'olɛ kɛ̀ńnɛ à pì: Isarailanↄ ni sa mana okↄ̃nɛ kũ á tↄ́o oni pi Luda tó ǹ gↄ̃ lán Ɛflaimu kũ Manaseoo bà. Lɛmɛ à Ɛflaimu dò Manasenɛ arɛ lɛ.
21Akũ Isaraila pì Yusufunɛ: Ma ka gana, ama Luda nigↄ̃ kú kãáo, ani ɛra à tá kãáo á dizinↄ bùsun.
22Sɛkɛmu bùsu mana kũ ma sì Amↄrinↄa kũ ma fɛ̃nɛdao kũ ma sáo, ma n gba, mↄkↄ̃n kũ ń de n vĩ̀ninↄla.
