1Te meba sogo bidama nosali, augwaligo Josepbolo te po wali, “Nago aya gasi elalubao,” wai. Tama Josepgo aga ogwa si, Manase me Efraim si oda sobadi, tama augwali pelama, aga aya sugi pali.
2Te bidi dabego Jekopbolo te tiwai po wali, “Te nago ogwa Josepgo te nage suainu asalio.” Tialima, Israel te dwasianu bomo elama gana hodaluama, tama betiba duagulali.
3Josep sabalubosi, tama Jekopgo agabolo te po wali, “God te Tigidali Bomo Elalubo te enaba te hanu Lusde te Kenande pedelali, tama agai ena wiegi yai mobo menama,
4tama agai te po wali, ‘Te eno nagebolo wai hauwa mawaibao, tama nago waigo wąį dabe te bidi hani hauwa pedelaibao. Te augwalibolo te e tǫ menama, tama augwaligo tǫ gagalama, sesemane sogo bidaibao.’
5Ena nage bidibo digi te Isipba asisąbadi, tama nago wego ogwa si ame nani. Te megi eno homugo te ogwa si te eno ogwa si mu tiwai bidimainogo ebao. Efraim me Manase te ena ogwa mu si, te Ruben me Simeon te tiwai si dao.
6Tiali goli, te nago wego nosali ame nabo wai dabe, te augwali naga wai mu yaibao. Tama nosali te deli deli haniba tǫ dobabo sogo, te nago nosali ame nabo wai dabe te Efraim dali Manase dali sigo hanide te augwaligo tǫ sa munama, saibao.
7Eno te kolesaga yali, magi baso meni, polobadu te naga ida Resel te ena te Mesopotemiadu ma asobadi, te aga isali. Tama tede ena moni homu dene genuai mu yai. Aga te Kenan tǫde isali, te da te bulu Efratade te dwasianu digibulu gana bidibadi tiali. Eno aga te Efrataba pabo sunumi sesegede pubulai,” wali. Efrata te Betlehem bulu dao.
8Jekopgo te Josepgo ogwa si sulama, tialima agai te tiwai po hanalu wali, “Te e ogwa si te dego wai si dawe?”
9Tama Josepgo te po wali, “Te eno ogwa si da. Godigo te Isipde augwali si te enabolo mani.” Tialima, Jekopgo te po wai, “Eno homugo te augwali si enaba odasa asama, te augwali si eno mobo mawaibao,” wali.
10Jekop te monu dabe elama, tama agai gedugo te nai dabe bugagia suainu ebo te usu meni yai. Josep aga ogwa si odasa aselama, tama Jekopgo augwali si nogo tola selama, tama augwali si nono nani.
11Te Jekopgo Josepbolo te po wali, “Polobadu eno homugo te eno nage ma sugobe da, te homu yali. Tiali goli, megi Godigo ena gogoliyu, sula tagalubaso, tama eno nage me, te naga ogwa si dali, te eno megi dage suali,” wali.
12Tama Josepgo te aga ogwa si te Jekopgo sągą pagede bidali te ma dobola siyu, tama agai Jekop gedude te agai gesabidi te tǫba basi gulali.
13Josepgo augwali si nogo tola sali. Te dolo nogo badu Josepgo te Efraim nogogo tuali, te Jekopgo aga pobase nogo badu tumainu yali. Tama pobase nogogo te Josepgo Manase nogo tuali, te aga Jekopgo dolo nogo badu tumainu yali, tama agai augwali si te Jekop pageba odasa pali.
14Tiali goli, te Jekopgo nogo hasegelama, dolo nogo dali pobase nogo dali si agabe selama muyu, tama agai dolo nogo te Efraim toboluba muani, aga te sabi ogwa bidi tama. Tama agai pobase nogo te Manase toboluba muani, aga te gomunai ogwa dao.
15Tialima, agai augwali si mobo te tiwai mani, “Te eno wąį Abraham, me te eno aya Aisak, augwali si te God gedude bugagia bilali. Eno homugo te Godigo te e wai si dali dwagi yai sę emainao. Te Godigo ena bugagia tonaluyu, ena odasa asali, te megi ede ena bidibao, agai te augwali mobo momainao.
16Te mobo bidi enselgo tigide pedelali God, te agai ena tonaluyu, tama ena me dolobe, eno homugo aga digi mobo te augwali si momainao. Te eno homugo te eno nogi me, te eno wąį Abrahamgo nogi me, te eno aya Aisakgo nogi me, te augwali sigo hanide elaluaibao. Te augwali sigo wai hauwa mu ame nenama, tama genuai hani bage pedelaibao. Godigo augwali side tama timainao,” wali.
17Te Josepgo suali, te aga ayago dolo nogo te Efraimgo toboluba mubaso, te agai hagela homu yali. Tama agai aga ayago nogo te Efraimgo toboluba mubo te sela sąnama, tama te Manasego toboluba muainu yali.
18Tama agai te tiwai po aga ayabolo wali, “Aya, nago te yali sę dolo ebeo,” wali. “Te e ogwa da, aga te gomunai ogwa dao. Te nago dolo nogo aga toboluba mugi sogo da, te usu igi dao,” te po wai.
19Tiali goli, aga ayago te agai po wali me pabeo. Menio. Agai te tiwai po Josepbolo wali, “Eno koneani, ogwao. Eno koneanio. Te Manasego hani wąį dabe te augwali hani me te genuai pedelaibao. Tiali goli, te aga ama sabi bidi da, te genuai bidi pedelaibao. Tama agai wąį dabe te augwaligo te Manasego hani te aiyaba elaluama, tama augwali te genuai hani bidi sibi mu pedelaibao,” wali.
20Tialima, Jekopgo augwali si te sogo te mobo po mayu, te tiwai po wali, “Te augwaligo te Israel dabebolo hanalu, te dage si mobo mani tiwai emainu, te gasa bidi dabego me te Godigo augwali mobo mao po hanalu waibao. Te augwaligo te po waibao, ‘Godigo dage te Efraim de Manase te augwali sibolo yali tiwai yao,’ tama waibao,” te po wali. Jekopgo te tiwai elama, te agai Efraim te podolama, te Manase nosali ilali.
21Nosali Jekopgo Josepbolo te po wali, “Odao! Te pąde ena isainu ebao. Tiali goli, God te nage dali bidama, tama agai nage te naga aya dedego tǫba ma odasa paibao.
22Sekem te wiegi yai tǫ mu dao. Eno te Amor dabe dali te hwą ge bainat me enesigi sigo boi hwįnama, tama augwaligo te tǫ eno sali. Tama ena digi eno te tǫ te eno nagebolo naga megi mobao. Eno te naga ama dede augwalibolo me magobeo,” Jekopgo Josepbolo te po wali.
