1A taumiya bi Diyousep a giuwe te tamana i sida. Kamaina bi natunatuna Manase bi Ifleim i wai dolidi a nawa tamana lisinemo.
2Laḡannemo Deikap a giuwena gado, “Natum Diyousep i tava.” Ba Deikap i lauḡaiḡailisi te i kenamoito bi gabumo i miya.
3Deikap Diyousep i giuwena gado, “Keinanmo dobu Lus noponemo, Maimaituwa wailewapanina i laumaḡata bi i kavisuvisugu
4bi i giuweguna gado, ‘tagu yà voiyem te kwai natuna dabalala bi em tubulelesa ya wapa. Bi tedi Keinan doḡana sa vai bi sai taniwaga nonoḡe.’
5“Diyousep, niga natunatumdi labu Idipmo a tubuḡa muliḡa kaka e tava. Niga libilibidi Ifleim bi Manase kuna bewedina niganana yàwai natunaedina maibena natunatugu Lubin bi Simiyon.
6Bi libilibi muliḡa kwa bewedina ba tam natunatum. Tedi kaka tuwatuwagedi Manasa bi Ifleim isedimo edi doḡa sa legaudi.”
13Ḡome Diyousep natunatuna i natomedi Deikap matanemo bi Ifleim ḡeniyana yawaninemo i wai moito bi Manase kataiyana yawaninemo i wai moito.
14Bi geḡa te Deikap nimana i lai baledi te kataiyana Ifleim dabanemo bi ḡeniyana Manase dabanemo i sako.
15Kamaina bi Deikap natuna Diyousep i kavisuvisu bi i giuna gado, “Itagu Eiblaḡam bi tamagu Aisik, Maimaituwa a laulauduneyena, niga libilibidi ya kavisuvisudi. Tana taunana egu yawasana matabunemo i labegu te niga palatinemo maibena tauwaiḡamoḡamo sipu ya labelabedina.
16Bi ena aneya gebogebo matabudimo i labelabe kauwegu. Yà laulaupali te niga libilibidi dabedimo, tagu bi tamagu Aisik bi itagu Eiblaḡam isamai sa vato nawe. Bi yà laulaupali te tedi sai natuna dabalala bi dobumo edi dam ya didiga.”
17Laḡannemo Diyousep tamana i kita te kataiyana Ifleim dabanemo i sakosako ba Diyousep mote i wai nuwavisu. Tana i ḡoeḡoena maso kataiyana Manase dabanemo i sako.
18Taunana aubaina Diyousep i giuna gado, “Tamagu mote mainana, naniga taunana tautuwaḡa dabanemo kataiyam kwa sako.”
19Bi tamana mote i waianine bi i giuwena gado, “Natugu e sibe bai yà voivoiye. Gomana tautasi ena waibada ya didiga gulatana kaka tautuwaḡa. Ifleim yai natuna bi ena tubulelesa ya didiga. Bi gomana tautuwaḡa kota mainana yai lava dididiga bi ena dam ya didiga.”
20Kamaina bi ḡome i kavisuvisudi bi i giuna gado, “Sauginemo Islael lavedi isemimo lava sa ka kavisuvisudi, ba tedi sa giuna gado, ‘Ka laulaupali te Maimaituwa ya kavisuvisumi maibena Ifleim bi Manasa i ka kavisuvisudina.” Niga mainana tana Ifleim isana i gei sako bi muliḡa kaka Manase.
21Kamaina bi Deikap natuna Diyousep i kavisuvisu bi i giuwena gado, “Niganana tagu mayagu e vai ḡotona te yà peki. Bi Maimaituwa kaka ya labemi bi ya munaḡemi, iteitemi edi dobu Keinanmo.”
