1Iok mala pol nga hoena te hele lange Iosep ke te teke, “Temem kou singina haleles.” Pomalam Iosep mene tutuna mur nai neu, Epraim pe Manase kela te nau tote temene.
2Te la ol pe mele hele lange Iakop ke teke, “Tum Iosep pai koi puris lo. Teke at ke nau tote iong.” Ol pe Iakop mene kikina ngana unne ke are haka nga nena hete.
3Pe hele lange Iosep ke teke, “NeHalang Nenge Nena Kerkerenga Palaungana Toto lohot nge iau nga tuele tana nge Lus nga ich nenge Kenan. Pe hele ke teke lape poi ke nek toto at nge iau,
4ke teke ke, ‘Lape E poia tutum mur ke iri halang toto. Pe iong lape o lohot ke hulua nga ich temeria iong. Pe lape e tunge ich nei lange lem tete mur ke reria ia ol.’ ”
5Pe Iakop rahaka mule pe hele, “E at ke e lohot nge iong nge Ekipto ero kura pe tutum mur tatamanna nai lo. Ke Epraem pe Manase, iau tutuk mur ia iri ke pomange Rupen iri nai Simion.
6Pe tutum mur nenge te ha nga rume nge iri nai, iong tutum mur ia iri ol. Pe lape te mene reria ich nga nenge tiria Epraim pe Manase te nauele.
7E hele ke mai iange letek ia tam e Resel. Nga etue nenge mo i nge Mesapotamia ke mo la mulmule nga ich nenge Kenan, mo naue kileng Eprata ke la nga tau kura pe tam mete. Ol pe e alohite i nga kue ilina, nga kue nenge song ke lala nge Eprata.” (heueu nei te hetue ke ene Petlehem.)
8Iok, nga etue nenge Iakop naue Iosep tutuna mur, ontei ke teke, “Itei hel nemai?”
9Pe Iosep hele lange temene ke teke, “Nga etue nenge e at ke e tu nge Ekipto NeHalang tunge tutuk mur tatamanna nai. Ke iri nai laka.” Ol pe Iakop hele, “O mene iri at nge iau ke e pete iri.”
10Iakop matana pulu ala pe nau ke nek ero ol iange tuauna toto lo. Pomalam Iosep mene tutuna mur ke te la rochroi toto nge temene ke lau hite iri.
11Pe Iakop hele lange Iosep ke teke, “Iau e teke ma lape e nau mule iong ero ol. Pe ero. Heueu panei NeHalang poia iau ke e nau mule iong pe tutum mur pule.”
12Ol pe Iosep mene hot kelia tutuna mur nga Iakop apena pe tualou sio la nga ich nga temene matana.
13Pe Iosep rahite tutuna mur nai neu ke te la rochroi nge Iakop. Rahite Epraim nga penna tamalmal ke la nga Iakop penna hoioi pe rahite Manase nga penna hoihoi ke la nga Iakop penna tamalmal.
14Iange Epraem i kino pe Manase i soke. Pe ero. Iakop lopakiua penna ke tal heke penna tamalmal nga Epraem palpanna pe talheke penna hoioi nga Manase palpanna.
15Ol pe Iakop onteia NeHalang ke poi ke urana lange Iosep pe nena hana mur pe hele ke teke, “NeHalang; lek tete Apraham pe temek Isak te nanas tau tote lemem ngam, pe iong Nehalang nenge o nauele iau nga e ha ngak nike ke at heueu nei.
16Pe o poi ke manga angkelo nenge mene mule iau nga ure poreke ngana mur. Heueu e ontei iong ke o poi ke urana lange aina tatamanna nai nei. Nge iri mana lape hehei pe hana te hetue ek pe te hetue lek te Apraham pe temek Isak eria pule. Pe o poia tuturia mur ke te lohot ke iri halang toto nga ich.”
17Pe Iosep iech ero iange nau pe temene tal heke penna tamalmal nga Epraem palpanna. Ol pe rahite temene pena tamalmal nga Epraem palpanna ke teke tal heke la nga Manase palpalna.
18Pe Iosep hele lange i, “Temek! Kol nei nge ha tala koi. O tal heke perim tamalmal la nga palpalna.”
19Pe temene ulo ele i pe hele ke teke, “Kolek, e eteia la. I pule tutuna mur pe nena tete mur lape te lohot ke iri halang toto pule. Pe tina nenge kino, tutuna mur pe na tete mur lape iri halang toto pe te hele haka toto nge iri ke pomange hehei pe hana nga tuele kina mur nge halang toto.”
20Iok Iakop pete iri nga etue neu pe hele ke teke, “Nga etue nenge Israel mur te teke te onteia NeHalang ke poi ke nek lange mele hel, lape te hetue tutum mur nai nem eria. Pe lape te hele ke te teke, ‘NeHalang lape poi ke nek toto lange imo ke pomange Epraem iri nai Manase.’” Ke nga kue nei mana Iakop talue Epraem ke i muka nge Manase.
21Ol pe Iakop hele lange Iosep ke teke, “O nau at, iau e metmete lokoi. Pe NeHalang lape tu luluch nge imo pe lape mene mule imo ke ala mule nga lemo tete mur reria ich nge Kenan.
22Pe ich unne nge urana toto kou tu nga tuele tana nge Sekem, pe lape e tunge lange titim mur ero. Lape e tunge lange iong mana. Nge nike mo hunel luluch nge Amor mur pe e mene mule ich nem nga lek kaleu pe pakpaka nge e riringia nga kileng nem.”
