1Gurↄ plaaa gbɛra wà ò Yusufunɛ à dee e gyãa kɛɛ, ben à a nɛ́ gↄ̃ↄn plaaanↄ Manase kↄ̃n Ɛflaimuo sɛ̀ɛ à gàańyo.
2Kɛ̀ wà ò Yakubunɛ à nɛ́ Yusufu mↄ̀ à gwa, à aĩa kɛ̀ à fɛ̀ɛ à vɛ̃̀ɛ a gádo musu.
3À bè Yusufunɛ: Luda Gbãapingide bↄ̀ à mↄ̀mazi zaa Luzu, Kanaa bùsun à aubarika dàmagu
4à bèmɛ é tó mà nɛ́ i maamaa, é ma kaara mà gↄ̃ boriinↄ dezi ũ, é bùsu pì kpá ma boriinↄa ma gbɛra ń pↄ́ ũ ai gurↄ píngi.
5Tia sa nɛ́ gↄ̃ↄn plaaa kɛ̀ n ń í Igipiti ai màgↄ̃ mↄ́ n kiianↄ ma pↄ́nↄmɛ. Ɛflaimu kↄ̃n Manaseo gↄ̃̀ ma nɛ́nↄ ũ lán Rubɛni kↄ̃n Simɛↄo dɛ nà.
6Nɛ́ kɛ̀ nɛ́ ń i ń gbɛraanↄ bé weégↄ̃ dɛ n pↄ́ ũ, aↄ̃é ń túbi e ń vĩ̀inↄ kiia.
7Zaakɛ kɛ̀ mɛ́ɛ suu kↄ̃n Mɛsↄpↄtamiao, n da Rasɛli gà zɛ́n Ɛflata kɛ̀ wè be tia Bɛtɛlɛmu lɛ́zi zaa Kanaa bùsun, ben ma à vĩ̀i zɛ́n gwe.
8Ben Isaraili Yusufu nɛ́nↄ gwà à bè: Dénↄn gwee?
9À bè a denɛ: Nɛ́ kɛ̀ Luda ma gba kɛ̀nↄn gwe. Ben Isaraili bè: Ǹ mↄ́ńyo ma kiia mà sa'olɛ kɛńnɛ.
10Zikũ Isaraili wɛ́ɛ bùsa èe guu ee maaro, ben Yusufu sↄ̃̀zi kↄ̃n nɛ́ pìnↄ. Isaraili lɛ́ pɛ̀pɛḿma à ń kpá a kùla,
11ben à bè Yusufunɛ: Mɛ́ɛ kpákpaa yã mà wɛ́ɛ sinlɛ dↄro, ben Ludaa tò ma n e kↄ̃n n nɛ́nↄ dↄ.
12Yusufu ń gú a de gbála, ben à kùɛnɛ à a aɛ pɛ̀ɛ.
13Ben Yusufu a nɛ́nↄ kũ̀ ń plaa ń píngi. À Ɛflaimu kũ̀ kↄ̃n ↄplaao Yakubu ↄzɛɛzi, ben à Manase kũ̀ a ↄzɛɛzi Yakubu ↄplaazi, ben à sↄ̃̀zi kↄ̃n nɛ́ pìnↄ.
14Ben Yakubu a ↄↄ pã̀kↄ̃la à a ↄplaa nà Ɛflaimu kɛ̀ dɛ dãaro ũu mìa à a ↄzɛɛ nà Manase kɛ̀ dɛ daudu ũu mìa.
15Ben à sa'olɛ kɛ̀ Yusufunɛ à bè: Luda kɛ̀ ma dezinↄ Ibraĩ kↄ̃n Isaakuo táa òo, Luda kɛ̀ dↄ̀mɛ aɛ ma kuuna guu ai kↄ̃n a gbã̀ao,
16à Malaika kɛ̀ ma bↄ à zaaan píngi, à aubarika da nɛ́ kɛ̀kiinↄn, à tó wàgↄ̃ ń sísii ma tↄ́a, kↄ̃n ma dezinↄ Ibraĩ kↄ̃n Isaakuo tↄ́o, à tó aↄ̃gↄ̃ kↄ̃ↄ maamaa anduna guu.
17Kɛ̀ Yusufu è a de a ↄplaa nà Ɛflaimu mìa, èe kɛnɛ nnaro. À a de ↄↄ kũ̀ lɛ à gu Ɛflaimu mìa à na Manase pↄ́a
18à bè: Lɛnlo Baa, gbɛ̃ kɛ̀kii bé à daudu ũ. Ǹ n ↄplaa na à mìa.
19Ben à de gì à bè: Má dↄ̃ ma nɛ́, má dↄ̃. Àpi sↄ̃ eé gↄ̃ borii ũ, eégↄ̃ bíta, mↄde à dãaro bíta égↄ̃ dɛàla, à borii égↄ̃ pari.
20Zĩ beeea à sa'olɛ kɛ̀ńnɛ à bè: Isarailinↄ é sa maaa okↄ̃nɛ kↄ̃n a tↄ́o aↄ̃é be Luda tó ǹ gↄ̃ lán Ɛflaimu kↄ̃n Manaseo bà. Lɛmɛ à Ɛflaimu dↄ̀ Manasenɛ aɛ lɛ.
21Ben Isaraili bè Yusufunɛ: Ma ka gana, mↄde Luda égↄ̃ kúao, eé ɛara à táao a dezinↄ bùsun.
22Sɛkɛmu bùsu maaa kɛ̀ má sì Amↄrinↄa kↄ̃n ma fɛ̃ɛdaao kↄ̃n ma sáo, ma n gba, mmↄn kɛ̀ ń dɛ n vĩ̀inↄla.
