ISƆBU 9

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Kɛ̀ Isɔbuu bɛ́i nkɛ dɔ̀:

²Mɔ́mmuɔ, n yɛ̃́mu kɛ dò ndɛ̀ mɛ ndò. Onìtì bo yĩ́mɛ kɛ dɔ̀ ò wenni Kuyie nyììkɛ̀?

³Kòò dɔ́ kɛ́sɛnninɛ̀ Kuyie kɛ̀ kù ò bekɛ yɛtɑnnɔ̀ tɛkɔupíítɛ̀ (1000), ò bɑ́ɑ́ nɑ kɛ́ kù tɛ̃̀ńnɛ́ bɑ́ ditɑnnùù dimɑ́ɑ̀.

⁴Kuyie nciìmu kɛ wɛ̃̀tɛ kɛ kpeńnì, we mbo nɑ kɛ́cómmú kɛ́ kù bɑ̀ɑo kɛ́yɛ̀ dɛtetìrɛ̀?

⁵Kuù ɔ̃ɔ̃ tuo nyɛtɑ̃rɛ̀, bɑ́ yɛ̀ bɑ́ nyɛ̃́ kuù miɛkɛ yɛ̀nnímɛ̀ kɛ̀ kù nɑmpɛ.

⁶Kuù ɔ̃ɔ̃ sɑ̃ntɛ̀ kɛtenkɛ̀ tɑ̀rì, kɛ̀ kɛ sɑ̃ǹkɛ̀ɛ mɛɛ̀rɛ̀.

⁷Kuù ɔ̃ɔ̃ pɛ́i ndiyiè kɛ̀ dì bɑ́ɑ́ yɛ̀nní, kuù cɑ̀nnɛ siwɑ̃̀ɑ̃.

⁸Kuù pitɛ́ tiwɛtì ku mɑ́ɑ̀, kuù cèntì dɑ̀mɛ́ɛ̀rì kó mɛniɛ nyĩ́nkɛ̀.

⁹Kuù dɔ̀ɔ̀ mukorimu nɛ̀ mu dɑ̀kɛ̀ kuù ɑ̃nnɛ́ siwɑ̃̀ɑ̃ sibotí sibotí.

¹⁰Kù dɔ̀ɔ̀ri dɛ̀ dɛumu dɛ̀ í dò nkɛ́nɑ kɛ́bɑntɛ́, ku diɛtì í dò nkɑɑ̀ nkɛ́deè.

¹¹Kɛ̀ kù pɛ̃nkɛ́ n yììkɛ̀ nyí yóó kù yɑ̀, kɛ̀ kù n dìńnɛ́nɛ̀ mbɑ́ɑ́ kù yɑ̀.

¹²Kɛ̀ kù pĩ nkɛ kérínɛ̀ we mbo fietɛ? Yɑ́ɑ̀ we mbo kù bekɛ kɛ́tú: A dɔɔri bɑ?

¹³Kɛ̀ ku miɛkɛ pɛikɛ wèè bo kɛ̀ còńnɛ́ ò í bo, bɑ́ dɑ̀mɛ́ɛ̀rì kó musĩ̀mmù mù bɑ́ɑ́ nɑ kɛ́ kù bɑ̀ɑ̀o.

¹⁴Mí nnɛ́ bo kù tɛ̃̀ńnɛ́ ɔ̃̀nti? M bo kù sɛi nhɔ̃̀nti ĩ́nkɛ̀?

¹⁵Bɑ́ kɛ̀ n nɑɑti n yí mɔkɛ m bo kù tɛ̃̀ńnɛ́ tì, m petìnkɛ bo kù mɔɔ mɛcĩ́ɛ̃́mmɛ̀ mmɛ kunku n kóo beéntì.

¹⁶Bɑ́ kɛ̀ n kù yu kɛ̀ kù yie n yí yóó n tɑ̃́, kɛ dò nkù kèè n tɑmmɛ̀.

¹⁷Kuù m puotì kuyɑɑkperíkù kɔ̃mɛ, kɛ n sɑ̃rì tiyɛ̃ĩti sɑ̃́ɑ̃̀ dɛtetìrɛ̀ kpɛ́í.

¹⁸Kù ɔ̃ɔ̃ í nni nyóu kɛ̀ n wei, kù n dií nkɛ n dií mmɛsémmɛ̀ mmɛ.

¹⁹Kɛ̀ dɛ̀ tu muwɛ̃rímú mmu kuù kpeńnì, kɛ̀ dɛ̀ tu tibeéntì nti we mbo dɑ́ɑ́tí kɛ́ kù yu tibeéntì?

²⁰Bɑ́ kɛ̀ n kpɛti ketɛ́ kɛ nù nnɑɑti kù bo tì sĩ̀nkùnnɛ, kɛ̀ n dɔ̀ɔ̀ri kù dɔ́ mɛ̀ kù bo yĩ́ n tú oyɛiwe.

²¹N dɔɔri kù dɔ́mɑ̀ɑ̀? M bɑ́ɑ́ nɑ kɛ́nyɛ̃́. N dɛmmu mufòmmu.

²²Dɛmɔu dɛmɑ́ɑ̀ ndi mí n kpɛ́í dɛɛ̀ te kɛ̀ n tu, kù kɔ̀ùmɛ̀ osɑ̀ɑ̀wè kù mɛ nkɔù oyɛiwe.

²³Kɛ̀ kuyɛ̃ĩku mɑkù donní kɛ kɔù bɛnitisɑ̀ɑ̀bɛ̀, Kuyie nhɔ̃ ndɑúmu.

²⁴Kuù duɔ́ nhoyɛiwe kɛtenkɛ̀ kòò kɛ̀ bɑkɛ́, kuù kɑ̃ɑ̃́ mbɛbeémbɛ̀ ììkɛ̀, kɛ̀ dɛ̀ í tú kunku we nni we nɑ́kɛ́?

²⁵N kó yɛwe cɑ̃rikɛ kɛ pɛ̃ɛ̃tóomu wèè nɔ mmuceé nho kɔ̃mɛ, yɛ̀ cɑ̃rikɛ kɛ pɛ̃ɛ̃tɛ́mu bɑ́ n yí di diwɛ̀ì mɑrì.

²⁶Yɛ̀ nùɔ́tɛ́ kudɑbɛkù yɑuku ɔ̃ɔ̃ yĩ́mɛ̀ mmɛ mɛniɛ nyĩ́nkɛ̀, fɛcĩrifɛ ɔ̃ɔ̃ domɛ̀ dɛkoribirɛ.

²⁷Nh ɔ̃ɔ̃ yĩ́ m bo yɛ̃̀mmu n kó isɑ́útìi, kɛ cɑ́tinnɛ n yɛ̀mmɛ̀, kɛ́mɔɔtɛ diwɛ̀ì,

²⁸Kɛ nɛ́ nkpɑɑ́ kɛ yĩɛ̃̀kù n kó mɛfɛ̃́ṹtímɛ̀, kɛ yɛ̃́ n yɛ̃́mɛ̀mu kɛ dò nkù í yó nni nwúó nhosɑ̀ɑ̀wè.

²⁹Míì bɑɑ yó ntú oyɛiwe, m bo bennɛ́ kɛ́nhɔù bɑ nkpɛ́í nɑ́kɛ dɛtetìrɛ̀?

³⁰Bɑ́ kɛ̀ n dɔ́ n wuɔnɛ̀ sɑfṹnnɛ̀, kɛ́nitɛnɛ̀ mɛdii nkóo ciɛkúrɛ̀.

³¹Kùu wɛ̃tɛ kɛ́ n tɑnnɛ́ tisɑ̃sɑ̃̀ɑ̃̀tì miɛkɛ, kɛ̀ n yɑ̀ɑ̀tì m pɛ̃̀.

³²Kù í tú onìtì kɛ̀ m bo kù tɛ̃̀ńnɛ́ tinɑ́ɑǹtì, yoo ti kɔtɛ tibeéntì mí nnɛ̀ ku.

³³Kòo pɑ̀ɑ̀tì mɔù do mbo ti cuokɛ̀, ò nɑ nti pùtɛ́ mí nnɛ̀ Kuyie.

³⁴Kuyie nfũũ nku dùɔ̀ n yĩ́nkɛ̀, Kù bɑ́ nsɔkɛ́ kɛ donnìnko n kɔ̃m̀bùɔ̀tì.

³⁵N nɑ nkù nɑ̀ɑ́nnɛ̀ kɛ í yĩɛ̃̀kù, òmɔù mɛ nyí bo m bo mmɑ́ɑ̀ ndi.