ISƆBU 30

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Di mmɔ̀nnì ibí iì nɛ́ n dɑú, inyi ìì cicɛbɛ̀ do í sɑ̀nnɛ̀ m bo bɛ̀ nɛínnɛ̀mɛ̀ simɔɔ́ sìì cɛ̃mmù n wũɔ̃.

²Bɛ̀ ketɛ́ kɛ do yóó n dɔɔ̀ bɑ? Bɛ wɛ̃rímú í yó mbo kɛ́mɔntɛ.

³Mɛsémmɛ̀ nɛ̀ dikònnì dɛɛ̀ bɛ̀ potɛ́ kɛ̀ bɛ̀ mɔ̀tɛ́, kɛ ɑ̃́ɑ̃́ ntɛdɔntɛ̀ kɛ wɑnti bɛ̀ bo mɑnkoo mù tɛdɔnkpetɛ̀ ĩ́nkɛ̀ dɛ̀mɑrɛ̀ í dɛ̀ bo.

⁴Kɛ kɛ̃ĩti sifɑ̃kɛsi sitekɛsí yɔ, kɛ cɑ́ɑntɛ, kɛ̀ itecĩɛ̃ ntú bɛ kó mudiì.

⁵Bɛ̀ do bɛ̀ bɛ̀timu, kɛ níí mbɛ̀ bɛ̀ti kɛ úú kɛ dò mbɛ̀ tu bɛyóóbɛ̀.

⁶Bɛ̀ do fòù yɛkondɑkɛ miɛkɛ nkɛ, titɑ̃dèntì miɛkɛ nɛ̀ yɛpèrɛ̀ fíè.

⁷Bɛ̀ do ɔ̃ nhokɛ tifɑ̃pèùtì miɛkɛ nkɛ kɛ kuɔ̀, kɛ kũrí kũrí tifɑ̃ɑ̃̀tì miɛkɛ.

⁸Bɛmbɛ bɛ̀ɛ̀ do tú isĩntɛ́bí kɛ̀ bɛ yètɛ̀ í bo, bɛ̀ do puotì bɛ̀ kɛ bɛ̀ bɛ̀tì dihɛì.

⁹Bɑ̀mbɑ̀ mbɛ̀ɛ nɛ́ n diè, míì nɛ́ nɑɑ́ mbɛ kó fɛonnìfɛ̀.

¹⁰Bɛ̀ m pɛ̃̀mmu kɛ m bùtínnɛ́, kɛ̀ í yĩɛ̃kɛ bɛ̀ bo n suumɛ̀ n yììkɛ̀ tinɔ́ntɔ̃ũtì.

¹¹Kuyie nkuù tɔ̃̀tɛ n tɑ̃mmù kɛ n dií nyifɛi, kɛ̀ bɛ̀ dèkù n yĩ́nkɛ̀ kɛ í yĩɛ̃̀kù.

¹²Bɛ̀ ìtɛ́ ditĩ̀nnì ndi kɛ còḿmú kɛ m buɔ̀ nyiwɛ̃ĩ kɛ bo m bɔ, bɛ̀ keù icɛ nyi kɛ kɔriní m borɛ̀ kɛ bo n dɔɔ̀ mɛyɛi.

¹³Bɛ̀ peri n cɛ nku, bɛ̀ wɑnti kɛ bo n kuɔmu, bɛ̀ ketɛ́ kɛ í dɔ́ òmɔùu bɛ̀ teennɛ̀.

¹⁴Bɛ̀ tèntɛ kuduotí nku, kɛ uríní yɛdombirɛ ĩ́nkɛ̀ mɛcɑ̃ɑ̃, kɛ kɔrinɛ̀ m borɛ̀.

¹⁵Kufɔ̃wɑɑ́ nkuù nh ɑutɛ́ kɛ kɑ̀útóo n sɑ̃nni kuyɑɑkù ɔ̃ɔ̃ yĩ́mɛ̀, kɛ̀ n wɛ̀ì pɛ̃ɛ̃tóo diwɛtirì kɔ̃mɛ.

¹⁶Di mmɔ̀nnì n fòmmu muù pɑɑrɛ, mɛhɑ́ɑ́rìmɛ̀ kó yɛwe yɛɛ̀ n sɔ̃̀ńkɛ́.

¹⁷Kɛyènkɛ̀ mɔ̀nnì kuyonku kuù ɔ̃ɔ̃ nni ncɑ́ɑ́ nkɛ tɑɑ̀ n kṹɔ̃̀, kɛ n dɔmmù bɑ́ nyí mɔkɛ mɛom̀pùmɛ̀.

¹⁸Kuyie mpĩ n yɑɑ̀bòrì ndi nɛ̀ muwɛ̃rímú kɛ tùtɛ, kɛ̀ dɛ̀ cɛ̃̀tínnɛ́ n fɔ̃̀níí.

¹⁹Kuù m bɔ ntisɑ̃sɑ̃ɑ̃̀tì miɛkɛ, kɛ̀ n sɑ̃̀ɑ̃́tɛ́nɛ̀ mutɑ̃́ɑ̃́ nnɛ̀ mutɑ́pɛí.

²⁰Kuyie, n kuɔ̀nnɛ̀ fɔ̃́ nwe, ɑ mɛ nyí kémmú, n cómmú ɑ ììkɛ̀ nkɛ, kɑ̀ɑ bùútóo n kpɛ́í.

²¹A tiikɛní n kpɛ́í nkɛ, ɑ m puotìnɛ̀ ɑ wɛ̃rímú mumɔu ndi.

²²A n tùótɛ́nɛ̀ kuyɑɑkù nku kɛ tɔ kɛ kɔrinɛ̀, kɛ̀ kuyɑɑkù m puotì kɛ n kóommu.

²³N yɛ̃́mu kɛ dò nhɑ n kũntinɛ̀ mukṹṹ mborɛ̀ ndɛ, timɔu kó dimúnnɛ́mɑ́ù.

²⁴N do í fɛ̃́ũnko bɛcĩ̀rìbɛ̀, bɛcĩ̀rìbɛ̀ do ɔ̃ɔ̃ í nkuɔ̀ nkɛ̀ m bùútóo.

²⁵Bɛ̀ɛ̀ do bo mɛhɑ́ɑ́rìmɛ̀ miɛkɛ n do bɛ kuɔ̀mmu mɛsémmɛ̀, mɛsémmɛ̀ do m bonɛ̀mu bɛsénnìbɛ̀.

²⁶N do yɛ̃́ kɛ tú n yóó yɑ̀ mɛsɑ̀ɑ̀ mmɛ, kɛ nɛ́ yɑ̀ mɛyɛi, n do yɛ̃́ kɛ tú kuwenniku kuù kèríní, kɛ nɛ́ yɑ̀ dɛ̀ m bììtoomɛ̀.

²⁷N nɑutì tiì kòńnì kɛ kónnì, mɛfɛ̃́ṹtímɛ̀ kó yɛwe yɛɛ̀ n sɔ̃̀ńkɛ́.

²⁸M bonɛ̀ mɛyɛǹcɑɑ̀rìmɛ̀ mmɛ, diwɛ̀ì í bo, kɛ̀ n kó tinɑ́ɑǹtì tu didɑbònnì bɛnìtìbɛ̀ cuokɛ̀.

²⁹Kɛ̀ n dɑbònnì te kɛ̀ n nɑɑ́nnɛ̀ yɛkpɑmɑɑ̀, kɛ nɛitinɛ̀ icuo.

³⁰Kɛ̀ n kɔ̃̀mmɛ̀ sɔ̀ùtɛ kɛ pekíi, kɛ̀ n kṹɔ̃̀ binɛ̀ kukɔ̃ntonnìkù.

³¹N kùtìdùkù nɑɑ́ mmukṹṹ nkɔku nku, kɛ̀ n tɑ̃rifɛ nɑɑ́ ndidɑbònnì kɔfɛ.