IOBU 30

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹A harihari idia ese e hevasehalaigumu, uru gabena taudia ese. Tamadia na bama dadaraidia; egu sisia ida egu seri ireḡudia ai basinama halaodia.

²Idia imadia goadadia amo bama abia ḡauna namona be dahaka? Edia goada vada e ore.

³E dabumu bona e hitolodia dikadikamu dainai, idia ese tano kaukauna na tano ḡaḡaena ai e ḡauaiamu.

⁴Idia ese doe anianidia bona au raudia e abidiamu, bona lagwa ramudia e ḡeidiamu.

⁵Taunimanima bogaragidia amo e luludia lasimu; muridia amo e lolomu, henao tauna murina amo bema lolo na heto.

⁶Ororo dadairadia ai e nohomu, bona tano koupadia ai bona nadi-gini kohuadia ai.

⁷Uda ai e ḡoumu, bona au ginigini henudiai e hetabira boumu.

⁸Kavakava besena, mai harina dikana; tano amo vada e havadia lasi.

⁹A harihari lau na edia ane ḡauna ai vada nala; edia gwaurai-gwaurai herevana ai vada e halaogu.

¹⁰Idia ese e ihi-ihiraigumu, asie raka henigu kahimu; vairagu ai e kanudi bagubagumu.

¹¹Dirava ese egu peva maorana vada e ruhaia bona vada e hahemaraigu dainai, lau vairagu ai idia ese edia haheauka vada e negea daure.

¹²Idibagu kahana ai hearuru taudia na e tore isimu, e lulugu lasimu; edia hahebua-tari daladia amo e ala-ala henigumu.

¹³Idia ese egu lao dalana e hadikaiamu; ihadikagu karadia e goadalaimu, ta ese se laodia ahumu.

¹⁴E ḡiḡia dobi maḡuna amo bema didi vareai na heto idia na e maimu: maḡu e heḡiḡi dobimu ai idia na e aru e maimu.

¹⁵Hahegari na latagu ai e kaumu; egu momokani e lulua ohomu, lai ese bema hodaia oho na heto; egu noho namo na e pukimu, ori na heto.

¹⁶Harihari lalogu na hisihisi ese e gugubaiamu, hisihisi dinadia ese vada e abigu;

¹⁷hanuaboi ai turiagu e hisihisimu, e gugubagumu hisidia na asie dokomu.

¹⁸Mai daḡedaḡena ida egu dabua e dabaia taomu; e ḡuigumu, aiogu mukona na heto.

¹⁹Dirava ese vada e tahogu dobi, kopukopu lalonai; lau na ḡahu bona kahu heḡereḡeredia ai vada nala.

²⁰Lau na boi henimumu, to so haere henigumu; na ginimu, to so itagumu.

²¹Lau inaigu ai vada ola, oi imamu goadana amo vada o daḡedaḡe henigu.

²²O abigu isimu lai latanai, egu gui ḡauna ai o halaoamu; lai gubana reḡena ai o tahogu isi tahogu isimu.

²³Oibe, lau dibagu oi ese ba hamasegu; bona mauri taudia iboudiai edia vada o gwauraia hidi rumana ba siaigu lao.

²⁴Tau ta ese vada e heḡiḡi dobi rumana senuna amo imana basine toia roro a? Ena hisihisi ai basine boiboi, ta ese baine durua helaoreana, a?

²⁵Ena dina vada e dika tauna taina asina tai a? Lalogu na se hisihisi ogoḡami taudia daidiai a?

²⁶A namo na tahuava negana ai, dika na egu ai e kau; bona diari na nariava negana ai, dibura na e kau.

²⁷Lalogu na e hekwarahimu, se laḡa animu; hisihisi dinadia ese e davarigumu.

²⁸Kopigu vada e hakoremaia, to dia dina ese; hebou ai na tore isimu, na tai henidiamu, bae kahagu.

²⁹Lau na uda sisiadia tadikakadia, bona kokokoko turadia.

³⁰Kopigu koremana e hevaka ohomu, bona turiagu na e araia morumorumu.

³¹Egu gitara reḡena na rohe-ahu reḡena ai e laomu, bona egu ivilikou reḡena na taitai taudia gadodia ai e laomu.