Job 30

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Iyan, guntaan edsudien a te menge etew he menge vetan-en pa kedì, he kenà egkeseriǥan is menge amey zan. Egkeseriǥan pa is menge asu ku he vantey te menge kerehidu ku.

²Hengkey is egkekuwa ku puun kayi te menge etew he memeluya wey egkeveley?

³Utew sikandan memeǥasà tenged te kewewezai wey kegkevitil zan. Ebpengamuy-amuy zà sikandan te egkekaan dan diyà te sibsivayan minsan mezukilem en.

⁴Ebpemezuten dan wey egkeenen dan is ebpenuvù diyà te sibsivayan, minsan is meladsem he zalid te kayu he inibru.

⁵Edsegseǥen sikandan pehendiyà te meziyù te menge emurè dan te inged, ne egkulehien sikandan he henduen be te menge tekawen.

⁶Diyè dan dà ed-ubpà te menge zal-ug, diyà te vudsi te menge vatu, wey ziyà te menge vudsi te tanà.

⁷Henduen sikandan te menge langgam he edtaul ziyà te ketelunan, ne edhahasekhasek sikandan diyà te lempek te zezeisey he kayu.

⁸Wazè dan pulus wey wazà nekekilala kandan, ne midsegseg sikandan puun te tanè dan.

⁹“Ne ǥuntaan edsudien a te menge anak dan pinaaǥi te kanta. Nehimu a he egkeengitan para kandan.

¹⁰Igkelimezangi e zan wey edlikayan e zan. Ne kenè dan en egkenawànawà is ed-ileb te vuked ku.

¹¹Guntaan te ebpeluyahan a wey edresayen a te Megbevayà, ebeelan dan en is egkesuatan dan te ebaal kayi te kediey.

¹²Edsurungen a kayi te wazà pulus he menge etew. Midlitaǥan dan is ebeyaan ku, wey edtinguhè dan te kedezaat kedì.

¹³Ebelevaǥan dan is beyeey ku te kedezaat kedì. Mibmezeeǥen dan minsan wazà midtavang kandan.

¹⁴Edsurungen e zan, iring dan te menge sundaru he ziyà mebayà te meluag he vudsi te migevà he verengbeng.

¹⁵Utew subra is kegkahandek ku, wey naawà is dengeg ku wey ketiǥeyunan ku he iring te ǥapun he inlayap te mevandes he keramag.

¹⁶Ne ǥuntaan henduen be te ebpatey ad; kenà egkeengked is kegkerasey ku.

¹⁷Emun mezukilem ne ed-al-al is menge tulan ku; is mesakit he egkeǥezam ku kenà egkeengked.

¹⁸Pinaaǥi te zesen te Megbevayà, mibpekel e zin. Migewezan din is lieg te kumbalè ku

¹⁹ne intimbag e zin diyà te vasak. Ne neiring a te eliyavuk wey avu.

²⁰“Nengumew-umew a kenikew, Megbevayà, piru wazè ka medtavak. Midhitindeg a ziyà te etuvangan nu, piru wazà a kenikew seǥipaa.

²¹Nehimu ka he mesipala kediey. Migamit nu is dekelà he ǥehem nu te kedrasey kedì.

²²Henduen be te ibpelayap a kenikew te keramag wey ibpevelvelikid a kenikew te vagyu.

²³Netuenan ku he ed-uwiten a kenikew ziyà te lugar te menge minatey, ziyà te lugar he inteǥana nu he egkepeveyaan te langun he etew.

²⁴“Wazà etew he mibpesipelahan ku he zuen din elentusen wey ebpehizuhizu tenged te kelised.

²⁵Ebpekesineǥew a ganì emun duen etew he edlised. Utew ku igkehizu is menge pubri.

²⁶Piru te kebperateng ku he meupiya is ebeelan kayi te kediey, mezaat hinuun is mibeelan kayi te kedì. Ebpen-ahà a te merayag piru kerusireman is nekeuma kayi te kedì.

²⁷Kenè en egkeengked is kesakit te ǥehinawa ku. Andew-andew is kebpekesaǥad ku te elentusen.

²⁸Mibmeitem is lundis ku kenà tenged te keinit te andew, kekenà, tenged te zaru. Midhitindeg a ziyà te kezekelan su ebpetavang a.

²⁹Is laǥeng ku henduen be te taul te leew he asu wey kegkaǥi te ekang.

³⁰Mibmeitem is lundis ku wey egkengepadpad is keǥang ku. Ne utew metikang is dateng ku.

³¹Nehimu he mekeseseeng is daǥing te alpa ku wey pulalè ku.”