Joba 30

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Tedae a kum la kai lakah aka noe long khaw, kai taengah luem uh coeng. Te rhoek kah a napa pataeng ka boiva kah ui taengah khueh ham ka hnawt lah mako.

²Amih kut dongkah thadueng khaw kai taengah metlam a om? Amih te a hminkhah lamni a paltham.

³Vaitahnah neh khokha rhamling lamkah, pumhong loh hlaem vaengah, khohaeng neh imrhong kah rhamrhae te a cilh.

⁴Tangpuem dongkah baekkoi te a hlaek uh tih, a buh la hlingcet yung a khueh.

⁵A nam lamloh haek uh tih, amih taengah hlanghuen bangla a o uh.

⁶Soklong cakhom kah laipi neh thaelsawk khui ah kho a sak.

⁷Tangpuem khuiah pang uh tih, lota hmuiah poem uh.

⁸Aka ang ca rhoek neh ming mueh ca rhoek ni khohmuen lamloh a hawt uh.

⁹Te dongah amih kah rhotoeng la ka om coeng tih, amih taengah ol la ka om.

¹⁰Kai aka tuei rhoek tah kai lamloh lakhla uh tih, ka mikhmuh ah la timtui khaw tuem uh pawh.

¹¹A lirhui lakah ka lirhui he pawl coeng. Te dongah kai he m'phaep tih, ka mikhmuh ah kamrhui han tueih uh.

¹²Bantang kah hlangyoe aka tlai loh ka kho a kalh. Amih kah rhainah caehlong te kai taengah a picai uh.

¹³Ka talnah khuiah ka hawn a mak uh tih, amih aka bom pawt khaw hoeikhang uh.

¹⁴A puut aka len bangla ael uh tih, a khohli rhamrhael hmuiah paluet uh.

¹⁵Kai soah mueirhih pai tih, khohli bangla ka moeihoeihnah a hloem vaengah, kai kah khangnah te khomai bangla a yah.

¹⁶Kai lamloh ka hinglu a kingling coeng tih, phacip phabaem khohnin loh kai n'tuuk.

¹⁷Khoyin ah ka rhuh te ka pum dong lamloh a cueh. Kai aka thuek he a dim moenih.

¹⁸Thadueng cungkuem dongah ka pueinak a phuelhthaih tih, ka angkidung te rhawnmoep bangla ka vah.

¹⁹Kai he dikpo khuila n'dong tih, laipi neh hmaiphu bangla n'thuidoek.

²⁰Na taengah bomnah kam bih dae kai nan doo moenih. Ka pai akhaw kai he nan yakming moenih.

²¹Kai soah a muen la na poeh tih, na ban thaa neh kai nan konaeh thil.

²²Kai he khohli dongah nan phueih. Kai nan ngol thil vaengah kai nan paci sak tih, lungming cueihnah a yawn.

²³Mulhing boeih kah tingtunnah im la, dueknah neh kai nan mael sak ham khaw ka ming.

²⁴A yoethaenah khuiah bombihnah a yaak vaengah, kut aka thueng he lairhok dongah a om moenih.

²⁵Khohnin a mangkhak dongah ka rhap tih, khodaeng dongah ka hinglu a omdam moenih.

²⁶A then ka lamtawn vaengah boethae ha pawk. Vangnah te ka ngaiuep vaengah a hmuep ha pai.

²⁷Ka bung he tlawk tih a kuemsuem moenih. Kai he phacip phabaem khohnin loh n'doe.

²⁸Khomik a tal dongah maelhmai a hmuep la ka cet. Hlangping neh ka pai tih bomnah ka bih.

²⁹Pongui kah a manuca neh, tuirhuk vanu kah a hui la ka om.

³⁰Ka vin khaw kamah dong lamloh mu tih, ka rhuh khaw kholing neh tlum coeng.

³¹Ka rhotoeng te nguekcoinah la, ka phavi rhah ol la poeh.