1Ma chiney e pi’in pagel nib bitir ngog e yad ma gosgos nigeg! Ni pi chitamangirad e bogni’ nib m’ayfan ni ku dabi pagan’ug ni ngar ayweged e pilis rog i matanagiy e saf.
2Bogi pumo’on ni dakriy angirad ngabang, ni yad ba me’waer ni dabkiyag ni ngar rin’ed ba maruwel rog.
3Karamad’ ko gafgow ma yad be yim’ ko bilig ni yad ma girgiriy likngin e gak’iy nib fengfeng nnep’, u yungi ban’en ni kan’ag.
4Yad ma pug yoch ke pan u ted ni desert ngu’ur ked, ni mus nga lik’ngin e gek’iy ni wolguw ni dariy lamen!
5Gubin e girdi’ nma tolul ngorad nge tulufrad, ni gowa yad be tolul ko mororo’.
6Ur pired u lan e pi yiy, ngu thilthilin e war u tanggin yungi rech.
7U ra gowolgad u rom u magerger ni bod e gamanman ni ka ra chichirgad nga ta’bang u tanggin yoch ke gak’iy.
8Ba ulung i dariy ban’en ni bfel’ ngay nib m’ayfan ni dariy fithingrad! Ni tulufrad nga wuru’ e binaw.
9Chiney e karbad yad be minmin ngog; ri dakriyfag ku gu mang ba gosgos u wan’rad.
10Yad be sonogor ngog; yad be galongeged yad rog, yu gu yad ra guyeg miyad thuw nga but’.
11Got e ke me’waer nigeg dakriy ban’en nrayag rog, ka ra chelgad ngog ni yad be gafgow nigeg, ni dakriy fag u wan’rad.
12Re ulung i kirebney e yad be cham ngog ni tinowey; yad be tulufeg; yad be fal’eg rogorad ni ngar thanged gag.
13Kara thabey niged gag, yad be guy rogon ni ngar thanged gag; ma dariy be’ nra talegrad.
14Ka ra t’ired e yoror nga dakenag ka ra awgad ngog ka ra chuchuyed gag nga’ar;
15Ke li’eg e marus; kem’ay fag ni bod buchuth i nifeng ma fla’ab rog e ke ling ni bod bangi manileng.
16Chiney e ngum’; ya dakriy e magif ko gafgow ni gu be tay.
17Ra nep’ ma yibe longlonguy gubin e yil rog; ma amith ni gu bay u fithik’ e der tal.
18Ya Got e ke malle’ nga belel’un e mad rog ke lepoy ke gulep.
19Me mafiyeg nga fithik’ e rungdu’, ku gu bod e ab.
20Got, ku gu piningem, ma da mur fulweg lungug; ma nap’an ni gu meybil, ma da mur motoyil.
21Ga be gad pa’am ngog; ga be gafgow nigeg u polo’ i gelngim.
22Ka mu pag ku gu un ko nifeng; ga be gadeg u fithik’ e yoko’.
23Gu manang ni ga be fekeg i yan ko yam’, ko gin gubin e girdi’ nra yan ngay.
24Mang ni ga be og ngak be’ ni dakuriy rogon, ni be’ ni dakriy ban’en nra m’ag rok kemus ni be wenig ni nge kireban’uy ngak?
25Mog, da gu un ko meyor ko pi’in ni yib e magawon ngorad ma da i kireban’ug ko pi’in nike t’uf e ayuw rorad?
26Ug nameg e felfelan’ nge tamilang, ma gafgow nge lumor e yib.
27Ke th’ibeg e marus ko magfan’ nge amith; gubin e rran ni gu be gafgow.
28Gu be yan u fithik’ e rumug, ni dariy ra’en e yal’ riy; Gu be sak’iy ngalang u fithik’ e yo’or ngu’ug man ayuw.
29Ka ri gafgow lamag ni go’ gag ni bod e meyor ko pilis ni jackal fa ba arche’ ni ostrich.
30Ke lumor dowag; ma gu be yik’ nga gelngin e gowal u dakenag.
31Immoy bingyal’ ni ug rung’ag e musik nib felfelan’, ma chiney kemus ni lingan e kirban’ nge meyor e gu be rung’ag.
