Job 30

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Emisgindi, sapingan-burwigana anga alliardamalad. Ar we-sapingan-e-babgana an-achu-sibad-wawaad-edarbemalad-edarbega an imaksasuliled.

²Ar anga-arbamarye-sogele, ¿ar ibu wis anga imaksamalale? Ar bar gargangued nikasurmalad.

³We-dulemar, neg-mutikidba negsulidganba gaamakdidamalad, ukudmaada gudidamalad, boniganba galitodidamalad.

⁴We-dulemar ibmar-gunnegala, gagan-moododba ibmar-gwag wedidamalad, gagan-e-malimarse-bakale, gundii damarbalid.

⁵Neggweburginbela isdar we-dulemar-dakdamalad, atursamaladye gin sogdamalad.

⁶Agala, we-dulemar dian-dinnaganaba gudidamalad, akwa-yaba, degi, ibegan-imbaba gudii damarbalid.

⁷Moli-uayasuid-goledyobi gagan-bulaba gormakdidamalad, degine, ikoganba doge-doge gudidamarbalid.

⁸We-dulemar dule-abelesurmaladid, agala, neggweburgi ononnolesmalad.

⁹”Emisgindi, aka we-sapinganga an dodogedga gued, amar-oalledga an gued.

¹⁰Ima an-dakdemalad, deyob-an-dakedbali angi bangudmalad, angi wii-minanai gusdamalad.

¹¹Emidi, Bab-Dummad bela-bela mesagwar an-imaksasoggu, dule-an-bendaked-satesoggu, anga bela-bela sabsur-ibmar sognanaid.

¹²Dule-isganamar an-argan-nuedsiki angi noarmalad, an-oitogegala, an-idu dukuar ambikusmalad. Angi-gwisguegala, napa-nakwemai sobsamalad.

¹³An-obelogegala, an-iduar gwisgunonimalad. Dule-bargaed-sate, an-obelononimalad.

¹⁴Igi bila-onomalad igar-ollo-imaksamaladba danidae, degi, galumar-ese-ailasmalad-birgi danidae, deyobi angi gwisgunonimalad.

¹⁵Ise an gwayale gusad, an nug-nika bar an itonadsulid, an-bendakleged mogirmar-yoggudeyob berguded.

¹⁶”Emisgindi, nue an-san bergudani an itoged, nunmaked-dummad-ibagan an-wionaid.

¹⁷An-garmarse-bakale, nunumaker an itogusad. Abali, an mutikidba galitomaidaed. Nunmaked gwen anga bergu an itosulid.

¹⁸Bab-Dummadi dukarba-an-gasagunaiyob an-wionaid. Akus-akus-bunnonaiyob an-imaknaid.

¹⁹Bab-Dummad olligangi an-barmeted, ukubyobi, degi, buruyobi an-imaksad.

²⁰”Bab-Dummad, an bese gornainad, gwen be an-itosulid. Be-asabinni an gwisgunonikinad, gwen be an-daksulid.

²¹Bab-Dummad, gwen-sabe be an-imaksulid, be-gangued-nikadba be an-baregindiid.

²²Igi ibmar burwaba-seleddae, deyobi, be an-imaksad. Burwa-oored-dummad-abarse be an-barmeted.

²³Bab-Dummad, neg-uan-urba be an-semaid an nue-wisid. Dule-burgwisar-seleddaedse be an-semaid.

²⁴”Dule-galakusmaidi, geg be bar sarsoged, dule-suli-suli-itogedgi-bendakleged-egisnaidi, geg be bar wioged.

²⁵¿Dule-boniba-galitodimaladba an bonai gussursi? ¿Dule-wilemalad an wiledaksasursi?

²⁶Anga-ibnued-gued an edarbediidgine, aka ibmar-isgana anga gunonikid. Ibagan-nuegan an edarbediidgine, aka ibagan-isgana anga nagunonikid.

²⁷Bane-bane sulibinsa an itodiid, gwen baisur-itoge an gudisulid. Unnila boniganba bane-bane an galitodiid.

²⁸An wile-itodiid, an bodiidbiid. Aisaar an, an-dulemarse bendakleged egisnaidaenad, degi, an bendakleged abenaidaenad, gwen an-bendaksurdamalad.

²⁹Emide, achu-sapur-e-gwenadganayob an gunonisunnad, irmon-senigan-e-gwenadganayob an gunonisunnad.

³⁰An-ukamar bela gudure naded, an-ukamar an-ibe yaas-yaas naded. Uellegedbali an-uka-diopisuli an itoged.

³¹An-gar-arpa-goledi, wilesakwaa gorgusad, an-gar-gammu-goledi, wilesakwaa gorgusbalid.”