Job 30

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹«Canan noga cayno caycajta ricamar ichanga shullcä cajcunapis asipäman. Paycunapa papänincunata nogaga manami munämanchu caran uywäcunata täpaj allgucunawan purinallanpäpis.

²Paycunataga ¿imapäräshi munäman caran? Paycunapaga callpanpis mananami carannachu

³manchariypaj yargay captin, muchuywan pishipacaptin. Chunyaj chaqui jircacunachömi chacaypa jajchej chaquisha sapicunallata.

⁴Ashgaj jachacunata shatacunacho ashej. Asta retämapa sapincunatapis micoj.

⁵Paycunataga marca-masincunapis jitarishami caran. Paycunataga suwacunata gaticachajnöraj gayanacushpan gaticachaj.

⁶Chaymi paycunaga tiyaj machaycunallacho, ragra uchcucunallacho, gaga uchcuncunallacho.

⁷Shira rurincunacho wagaj. Shata rurincunallacho goturpaycaj.

⁸Paycunaga caran imatapis mana yachaj, mamaynaj taytaynaj. Nasyunnincho tiyananpis mana camacaranchu.

⁹«Cananmi ichanga paycuna asipäman. Asipämänan cashami jutëtapis parlan.

¹⁰Fiyupa melanäcamashpanmi nogapita witicun. Cärämanpis togapämanraj.

¹¹Cananga, Tayta Diosmi ima-aycäpis manana cananpaj camacächisha. Pengay-tucushami caycä. Chaymi imanillarpis mana rispitamannachu.

¹²Ñaupämanmi juc röpa runacuna shuntacämun. Nircur wañuchimayta yarpashpan sajtaman, magaman.

¹³Caminötapis chapacarcärin. Manami pipis canchu nogata yanapämänanpäga.

¹⁴Pergaraycaj curralpa uchcun caycajpa yaycojnörämi nogamanga gaparpashpan shamun.

¹⁵Fiyupa mancharishami ricacushcä. Rispitamashanpis cananga wayranömi illaraycan. Alli ricasha cashäpis pucutaynömi illgacäcusha. Ima-ayca charashäpis pucutayno illgacäcusha.

¹⁶«Cananga wañuypis janächönami. Nogaga fiyupa llaquicullarnami caycä.

¹⁷Tullöcamarämi nanaynëpis chayaycäman. Mana chawaypami chacaycunapapis nanaycäman.

¹⁸Cuncäpita apritamajnömi aptacarcaman. Jämayta cachanätapis manami dëjamannachu.

¹⁹Nogataga mitumanmi jitarimasha uchpata-jina, ñuchu allpata-jina.

²⁰«Tayta Dios, gamtami mañacaycämö yanapämänayquipaj. Chaypis manami yanapämanquichu. Gamta ruwacaycämö. Chaypis manami cäsumanquichu.

²¹Nogataga fiyupami chiquicarcamashcanqui. Fiyupa rabyashami gaticachaycämanqui.

²²Gammi camacächishcanqui wayra apamänanpaj, löcu wayra tapsir-ushamänanpäpis.

²³Musyaycänami wañuchiyta munaycämashayquitaga. Musyaycämi wañojcuna caycashanman chayachimänayquitaga.

²⁴«Nogami ichantaga pishëpacojtapis yanapashcä. Fiyupa llaquicuycho caycajtapis salbashcä.

²⁵Nogaga ñacajcunata ricaycur cuyapar wagaj cä. Nogaga muchupacajcunatapis cuyapaj cä.

²⁶Nogaga cushisha goyaytami yarparä. Nishäga chayamasha llaquicuymi. Achquita shuyaraycarä. Nishäga chacayllami caycan.

²⁷Shongöga fiyupami ushaycan. Nogaga fiyupa llaquicuyllachömi caycäpis.

²⁸Goyaycäpis fiyupa llaquishallami, intiman mana llojshejnölla. Täparaycämajcunapa ñaupanchömi mañacö pillapis yanapaycamänanpaj.

²⁹Atojcunapa wauguinnömi, tucupa amïgunnömi caycä.

³⁰Llapan garämi yanayacäcusha. Pasaypa wagruypa-wagrur aywaycan. Rupaywanmi intëru cuerpöpis rupariycan.

³¹Arpä wagashanpis llaquicuyllapämi. Pincullöpis llaquicuyllapämi wagan.