1ꞌBa ngatsiꞌi xutaxa tsisetjen ꞌba kiko Jesús ngixkun Pilato, gobernador tseꞌe Roma.
2ꞌBa nga je tjindu ngixkun, ꞌetutsꞌinre nga kiskaninejere, ꞌba kitsu: —Kui xutabi kjaꞌe ndiya tifiko naxinandani̱. Titsu nga tichjaꞌnde nga sꞌe̱chjire xuta titjun César mé= xi machjintjai, ꞌba nde titsu nga kui xi Cristo, jngu rey ngayeje.
3ꞌBa Pilato tsiningiyare Jesús: —¿A ji= ni reyre xuta judío? ꞌBa Jesús kitsingojore: —Ji je ꞌba kisji.
4ꞌBa kio Pilato jako xi ngakure naꞌmiu ko xutankjiun, ꞌba kitsure: —Nime je sakuna̱ ngatꞌare xutabi.
5Tunga nchjabiu a tu si kitsu: —Jotsaꞌen kui tibakuya timinyasiyare xutankjiun ngayéje ngaꞌnde xi tjin nangi Judea. ꞌEtutsꞌinre nangi Galilea ꞌba kaꞌnda ngaꞌe je jaꞌe nga ꞌba titsaꞌen.
6ꞌBa kionga Pilato kjintꞌe kibi, tsiningiya tsa Jesús jngu xuta tseꞌe Galilea kuán.
7ꞌBa kionga kikꞌinre nga Jesús ndibani nangi Galilea, ña batexuma Herodes, ꞌbatsaꞌen kitsikasen Jesús ngixkun Herodes, xi ꞌba nde tijña naxinanda Jerusalén kui nixtjinbiu.
8ꞌBa kionga Herodes tsabe Jesús, ꞌñu tsja kuánre, ngatꞌa je ndaꞌe mejénnire skue. Ngatꞌa nkjin ndiya kjintꞌe ngatꞌa tseꞌe Jesús, ꞌba mejénre skue nga kui saꞌen jngu kjuakun.
9ꞌBa tsé tsiningiyare, tunga nijnguú en kitsingojo Jesús.
10ꞌBa ꞌba nde kio inya xi ngakure naꞌmiu ko chjine kjuatexuma nga ꞌñu inyakaninejere Jesús.
11ꞌBa ꞌbatsaꞌen Herodes ko chasoldadure joni tsajmi xi tumé chjire kitsiko Jesús. ꞌBa tsejnuke nga kitsikaja jngu najñu xi tsja kjiꞌi joni xi baja rey, ꞌba kitsikasen nganire Pilato.
12ꞌBa kui nixtjinbiu Herodes ko Pilato, xi ngandaꞌeñu stike xinkjin tsakaiñu, ꞌetutsꞌinre nga nda tsakaꞌa xinkjin.
13ꞌBa meni Pilato ꞌeñajan xi ngakure naꞌmiu ko xutaxa ꞌba ko xutankjiun,
14ꞌba kitsure: —Jun jaꞌekonuu̱ xutabi. Temixun nga timinyasiyare xutankjiun. ꞌBa ngixkún je tsiningiya_ra̱, ꞌba bi kisakuna̱ tsa tjinre je xutabi ngatꞌare ngayéje xi tefangiu.
15Ninga Herodes bi kisakutꞌare je. Kui kjua kitsikasen nganina xutabi. Ngu, je teꞌyo nga tumé kitsaꞌen xutabi xi ꞌbakore nga kueya.
16ꞌBamani, kꞌuexaa̱ nga sꞌe̱re ꞌba saꞌe suntjia̱n.
17ꞌBa xki nu xki nu nga sꞌi pascua, Pilato tjinnere nga tsikꞌejñandai jngu xuta xi kjiyuya nduya.
18Tunga tu jngu kitsaꞌen jndare xutankjiun nga kiskiꞌndaya, ꞌba kitsu: —¡Ngatjanikꞌen xutabiu! ¡Tikꞌejñandainii̱ Barrabás!
19Barrabás kisꞌeya nduya, ngatꞌa ngajin naxinanda Jerusalén kiskjanko nchja xi tseꞌe Roma, ꞌba kitsikꞌen jngu xuta.
20ꞌBa Pilato mejénre nga sikꞌejñandai Jesús, kui kjua jako ngani xutankjiun.
21Tunga xutankjiun ngisa ꞌñu kiskiꞌndaya, ꞌba kitsu: —¡Tjatꞌai kru xutabiu! ¡Tjatꞌai kru xutabiu!
22ꞌBa xi majánni ndiya Pilato jako ngani, ꞌba kitsure: —Ngu, ¿mé= kjua xi chꞌotjin kitsaꞌen xutabi? Nimé tisakuna̱ xi ꞌbakore nga kueya. ꞌBamani, kꞌuexaa̱ nga sꞌe̱re ꞌba saꞌe suntjia̱n.
23Tunga xutankjiun ngisa ꞌñu si kitsaꞌen nga tsiꞌare Pilato nga kꞌuetꞌa kru Jesús, kaꞌnda nga kjinisinre.
24Kui kjua Pilato kitsjani enre nga kꞌuetjusunre mé= xi inyamiꞌa.
25ꞌBa meni kitsikꞌejñandai xuta xi xutankjiun jaꞌajin, xuta xi kjiya nduya ngatꞌa kiskjanko nchja xi tseꞌe Roma ꞌba kitsikꞌen jngu xuta. ꞌBa kitsingantsja Jesús, tuxi sikoni jotsaꞌen mejénre xutankjiun.
26ꞌBa kionga Jesús inyafikatꞌa kru, kitsuba jngu xuta xi tseꞌe nangi Cirene, xi Simón ꞌmi, xi ngijña tjindibani. Kui xi kitsikaꞌanijin kru, ꞌba kitjenngi Jesús.
27ꞌBa nde nkjin xuta tjenngire ko yanchjin xi inyakjiꞌndantjai Jesús ngatꞌa kjimaꞌonre.
28Tunga kitsikuꞌbe Jesús ꞌba kiskutsejenꞌa yanchjinbiu, ꞌba kitsure: —Jun yanchjin Jerusalén, bi an chiꞌndantjainuu̱. Tusa chiꞌndo ngatꞌa tsojon ꞌba ngatꞌa tseꞌe kiꞌndinu.
29Ngatꞌa kjuaꞌe= nixtjin nga ꞌbi kuetsu xuta: “Ndaxure yanchjin xi ꞌndi, xi niñajanni kisꞌeyaꞌmore ninga bi kitsikaki kiꞌndi.”
30ꞌBa kio kuetsure nindu: “Tixuneni.” ꞌBa kuetsure tjengiu: “Tꞌeꞌmoni.”
31Ngatꞌa tsa ꞌbi mataꞌen ya xkjuen, ngisa= tu ku̱ataꞌen kionga je kixi —kitsu Jesús.
32ꞌBa tjenko nchjabiu jó nchja chꞌokun xi ꞌba nde kꞌuetꞌako kru Jesús.
33ꞌBa kionga je echu ngaꞌnde xi Nindaku Mikꞌen ꞌmi, kio yatꞌa kru Jesús ko ngojó nchja chꞌokunbiu. Jngu ngate kixire ꞌba jngu ngate skjunre.
34ꞌBa Jesús kitsu: —Naꞌen, tichatꞌa_ri, ngatꞌa bi be mé= xi inyatsaꞌen. ꞌBa chasoldadu kitsiskaya najñure Jesús, tuxi xianire ꞌyá= xi kꞌuakore ꞌba sikaꞌbire xinkjin.
35ꞌBa kio inya xutankjiun nga inyakutsejenꞌa. ꞌBa kaꞌnda xutaxa inyatsisubare Jesús, ꞌba kitsu: —Kui xutabi kitsikꞌangi xuta xi kjaꞌere. Ngatatsikꞌangi tajngu yojore ngandaꞌe tsa kjuakixi nga kui xi Cristo xi Naꞌenchana jaꞌajin.
36ꞌBa chasoldadu ꞌba nde inyatsisubare Jesús ngayeje. Kitsitiñatꞌare ꞌba kitsjare binu san.
37ꞌBa inyatsure: —Tsa ji xi reyre xuta judío, tikꞌangi tajngui yojori.
38ꞌBa nde kisꞌetꞌa ngasun nkꞌa ku Jesús jngu yate xi tsu: “Kui=bi xi reyre xuta judío.”
39ꞌBa jngu xuta chꞌokun xi ñatjen kjitꞌako kru Jesús, ꞌbitsaꞌen chꞌo kitsure: —Tsa ji xi Cristo, tikꞌangi tajngui yojori ꞌba ꞌba nde tikꞌanginii̱ ji̱n.
40Tunga xi ngijngu jatiko xutabiu, ꞌba kitsure: —¿A bi kunye Naꞌenchana, ninga ndekuini kjuanima temitjaꞌaxtiuni?
41ꞌBa tjin= ndiyare nga temitjaꞌaxtia kjuanima ña, ngatꞌa ꞌba fa ni tsaꞌen teꞌbechja jo kjiñaꞌan. Tunga kui xutabi tumé xi chꞌotjin kitsaꞌen.
42ꞌBa saꞌe jako Jesús, ꞌba kitsure: —Jesús, tikjaꞌetsjen ngatꞌa tsaꞌan kionga je kuatexumai.
43ꞌBa Jesús kitsure: —Kjuakixi= xi xinra̱, nga ngandaꞌe kuenikonaa̱ ngankꞌaa, ngaꞌnde ña nda chun.
44ꞌBa kionga je mején nyusen nixtjinbiu, kuajñu ngayéje ngasunꞌndio kaꞌnda nga̱ chuba ján nga kuangixun.
45ꞌBa tsuꞌbiu bi nde kjiꞌyanire. ꞌBa masen kitijndajen najñu xi kitjenchja ngaꞌnde xi ꞌñu tsje tseꞌe ningu.
46ꞌBa Jesús ꞌñu kiskiꞌndaya, ꞌba kitsu: —Naꞌen, ngaya ndsai teꞌbejñaa̱ inimana̱. ꞌBa nga je ꞌba kitsu, kꞌen.
47ꞌBa kionga xi ngakure chasoldadu Romano tsabe mé= xi kuán, kitsichjire Naꞌenchana, ꞌba kitsu: —Kjuakixi= nini nga kui xutabi jngu xuta xi kixi.
48ꞌBa kionga ngatsiꞌi xutankjiun xi kio kuañajan nga inyakutsejenꞌa, tsabe mé= xi kuán, ꞌñu kjimabare nga kiji ngani ndaba.
49Tunga ngatsiꞌi xuta xi bexkun Jesús kjin inya nga inyakutsejen mé= xi tjima. ꞌBa ꞌba nde kio inyajinre yanchjin xi jendetjenngi ꞌnda nga ꞌetju nangi Galilea.
50ꞌBa kio tijña jngu xutaxa xi Kuse ꞌmi xi Arimatea tseꞌe, naxinanda xi tijña ngajinre nangi Judea. Xi nda xuta ꞌba kixi fiko yojore ngixkun Naꞌenchana.
51Xi ꞌba nde tikuyare nixtjin nga kuatexuma Naꞌenchana ꞌba xi bi tijngu kakun jo tsaꞌen joyare xutaxa xi yakꞌa ꞌba nga jo kitsaꞌen.
52ꞌBa kui kikun Pilato ꞌba tsiꞌare yojore Jesús.
53ꞌBa kionga je tsꞌajentꞌa kru, yaxtejun jngu najñu tjibe ꞌba yajñaya jngu tsju xi kitjuꞌngi jngu naxi, ña nisaꞌyajín sꞌeyanijin.
54Kui nixtjinbiu xuta judío inyaꞌbenda xi skine sꞌi pascua, ꞌba je tiꞌbetutsꞌinre nixtjin nga nikjaꞌaya.
55ꞌBa yanchjin xi tjenko Jesús ꞌnda nangi Galilea kiji ꞌba tsabe tsju, ꞌba kiskutsejen jótsaꞌen kisꞌejña yojore Jesús.
56ꞌBa jendiba ngani ndaba ꞌba ꞌenda nanda xi ixi jen ko tsajmi xi nda jen. ꞌBa yanchjinbiu kitsikjaꞌaya nixtjin nga nikjaꞌaya, jotsaꞌen tsu kjuatexumo.
