SAN LUCAS 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Chihno min ne, quechica Dihvo vo nduh ya̱n nduh ya̱n, ricuahn ye ndudo ndah yahn vederihquentiyon yahn Dendiohs. Nduco ye nduh che ndichio apóstol yahn ye.

²Namin nduco ye ya̱hn ihyan nda̱hta che ndetenda̱h ye vaco chihnga̱ che chenun ihyan ma̱n, ihyan nda̱hta che din ye che ndoyahn ye ma̱n. Va̱n nda̱hta chahn nduco María yahn ya̱n Magdala, ihyan min che chenun ndache vaco chihnga̱ ro mena̱n, ndetenda̱h ye.

³Namin nduco Jua̱na, nda̱hta yahn Chuza, a̱ma sa̱hn ndina̱n yahn rey Herodes. Nduco Susa̱na ma̱n, nduco ya̱hn ca nda̱hta che chinan ye Dihvo vo nduco tume yahn ye ma̱n.

⁴A̱ma ya̱hn ihyan yahn queri a̱ma ya̱n, ndo da̱ma ye na̱n Dihvo vo, ne nte ye ejemplo cuh, chihnevan ihyan chahn:

⁵―Cuahn a̱ma ihyan, retuhdo ye ndute nda̱ta yahn ye. Cuahn che retuhdo ye ne, chera neve ndute chihto yune. Chemin ne, chendinun ihyan, ne nda̱ ya̱hda, ne cheh te.

⁶Te neve ndute ne, chera na̱n tu. Cuahn che quenda̱h ne, tih yahn che ndo cuma ya̱hn na̱n tu me.

⁷Te neve ndute ne, chera va̱n chano ya̱n. Chihta da̱ma nduco chano ya̱n chahn, ne quenun ma̱n chenda̱ta me.

⁸Te neve ndute ne, chera na̱n ya̱hn ndah, ne quenda̱h, ne chi yahn, ca̱de ciento queri a̱ma. Chihno nte ye ejemplo me ne, tuhme a̱ma dito ra̱hn ye: ―Nducoya̱ca nchuhn, ¡cuendedecadino ndah ne yahn ejemplo me!

⁹Tuhme tumerune ihyan apóstol chahn ihyan: ―¿Deh conahn ejemplo che nte ne me ne?

¹⁰Ra̱hn ye ri ye ihyan chahn: ―Nchuhn ne, te Dendiohs che conahn ne yahn vederihquentiyon yahn ye. Ate ihyan chena̱hn sih ne, renté nduco ye dema̱n nduco ejemplo, ca̱va che ndihchero no ye, ne hua nchana̱n ye, cahnevan no ye, ne hua conahn ye.

¹¹’Tuhca̱ conahn ejemplo me: Ndute nda̱ta me ne, nduhca̱ Ndudo yahn Dendiohs.

¹²Ndute che chera chihto yune me ne, nduhca̱ ndudo che rihnevan a̱ma o ihyan, ne ndeta̱hno renda̱ chundah, ne rehnevi se Ndudo me chete chedave yahn ye, ca̱va che hua cotahno ye, ne hua ndevahn ye.

¹³Ndute che chera na̱n tu me ne, nduhca̱ Ndudo che rihnevan ta̱ma te o ihyan, ne renevahnecun ye numacuahn vedeyeno. Ate nduhca̱ chenda̱ta che metah cua ya̱no dihyoduto tihchan ye, te cuahn che rechuhrihn ye, o redin ta̱n ihyan nduco ye ca̱va Ndudo me ne, ndeta̱hno rihcoma̱n ye.

¹⁴Ndute che chera va̱n chano ya̱n me ne, nduhca̱ Ndudo che rihnevan ta̱ma te o ihyan, ate a̱ma rendedecadino ye yahn ntiyon yahn ye ro ro ma̱n, nahn yahn ye vedecuihca che va iyehnse cuh ma̱n, nahn quendi ye vedeyeno yahn ma̱n ye ma̱n. Chemin che hua ri redin Ndudo me che ndah nduco ye.

¹⁵Ate ndute che chera na̱n ya̱hn ndah me ne, nduhca̱ Ndudo che rihnevan ta̱ma te o ihyan, ne renevahnecun ye numacuahn chedave yahn ye, ne riquendi ye. Ihyan chahn che redin Ndudo yahn Dendiohs che ndah nduco ye.

¹⁶Quendi Dihvo vo ricuahn ye: ―Nde a̱ma ihyan ne, hua renahn ya̱hn ye a̱ma candil ca̱va che ca̱hco ndeh ye ma̱n cajún, o ma̱n yundo. Rihco ye na̱n che ya̱co, ca̱va che co ro dave yahn ihyan che renda̱ ye.

¹⁷Tihca̱ nducuahn che rá̱hn rí nchuhn cuahn che a dema̱n vo ne, va che cuahndudo nchuhn, cahnevan ihyan. Nducuahn che rá̱hn, andahre a̱ma rihn ca̱va che conahn ihyan, ate conahn ye.

¹⁸’Chemin che cuihnevan ndah nchuhn ndudo che rá̱hn, te ihyan che ndah renahn ye ne, nde tahque ndah ca conahn ye, ne ihyan che hua ndah renahn ye ne, va che cona̱n ye nde tah sihn che chenahn ye.

¹⁹Nda̱ chaco Dihvo vo nduco dihno ye, ne hua chi chenda̱ ihyan chahn na̱n che quenun ye, te a̱ma ya̱hn ihyan chenun ye min.

²⁰Tuhme ra̱hn ihyan ri ye Dihvo vo: ―Chaco ne nduco dihno ne, vatendi ye cua̱hn chevah, nahn ndihchero ye ndih.

²¹Ra̱hn ye ri ye ihyan chahn: ―Ihyan che rihnevan ye Ndudo yahn Dendiohs, ne redinahn ye ne, a ihyan chahn che rendihché ihyan nduhca̱ chacó ma̱n, nduhca̱ dihnó ma̱n.

²²A̱ma yune ne, chenda̱ Dihvo vo chete a̱ma ba̱rco nduco ihyan apóstol yahn ye, ne ra̱hn ye: ―Cuhn vo nduco nchuhn ta̱ma la̱do viche ca̱h. Tuhme cuahn ye nduco vih.

²³Ura che cuahn ye nduco vih ne, quiya̱do Dihvo vo, ne cana̱n rano yuhne ta̱n, nde a rito nune chete ba̱rco me, adeche cuehchenun chete vine me.

²⁴Chahn ihyan chahn, ndedetuhche ye Dihvo vo, ne ra̱hn ye: ―¡Ihyan Ricuahn! ¡Ihyan Ricuahn! ¡Cuentuche ne, te adeche cuehchenun vo va̱n nune! Necuan Dihvo vo, ne chihco dihn ye yuhne ta̱n me, ne quendite dihn vine me.

²⁵Tuhme tumerune ye ihyan chahn: ―¿A hua ritahno nchuhn? Ate ihyan chahn ne, a̱ma rahn ino ye, a̱ma redihya ye ri, ne retumarune vih ye: ―¿Duhra ihyan cuh?, te nde yuhne, nde vine, redinahn che rihquentiyon ye.

²⁶Chihno min ne, nda̱ ihyan chahn ya̱n Gadara, a̱ma ya̱n che va ta̱ma la̱do viche yahn vine yahn Galilea.

²⁷Ndeta̱hn che ndiquenda̱h Dihvo vo chete ba̱rco me ne, nda̱ a̱ma sa̱hn ya̱n min na̱n ye. Sa̱hn min ne, a ra̱hn cuahn che chenun vaco chihnga̱ sa̱hn. Deva̱ne se, quechica se, nde hua quenun se va̱co se, te na̱n rehche tena̱hn ne, min quenan se.

²⁸Cuahn che ndihchero se Dihvo vo ne, chahn nda̱ se, chehntihya se na̱n ye, ne cah se: ―Jesús, Da̱ya Dendiohs che a̱ma yudo vederihquentiyon yahn ye, ¿dehco che reca̱hdenun ne yune yáhn? Ricá favor ndih che hua din ne che chuhríhn.

²⁹Tihca̱ ra̱hn se, te Dihvo vo ne, a chihquentiyon ye vaco chihnga̱ chahn che ndiquenda̱h sa̱hn. A̱ma ndeh yune cuahn che retumanga̱n vaco chihnga̱ chahn sa̱hn ne, redechiche ihyan sa̱hn nduco cadena, ate rihno rendeh se cadena me, ne riquenda vaco chihnga̱ chahn sa̱hn va̱n chano.

³⁰Dihvo vo ne, tumerune ye sa̱hn: ―¿Deh doche ne? Ndahconan se: ―Legión duché. Tihca̱ duche se yahn che a̱ma ya̱hn vaco chihnga̱ chenun sa̱hn.

³¹A̱ma chica vaco chihnga̱ chahn favor ihyan che hua dechuh ye va̱n ruchiya̱hn.

³²Min nino va̱n chano ne, chenan a̱ma ya̱hn cuche, reh te. A̱ma chica vaco chihnga̱ chahn che ca̱h yune ye che conda̱ chete cuche chahn, ne ca̱h yune ye.

³³Tuhme ndiquenda̱h vaco chihnga̱ chahn sa̱hn min, ne chenda̱ cuche chahn. Cuche chahn ne, cochahn te, rano te na̱n ndava, ne cheranun te chete vine me, cuahn ico te.

³⁴Cuahn che ndihchero sa̱hn che redin cuda̱do cuche chahn che tihca̱ chi ne, chano se. Cuahn se, chengo se ihyan viya̱n ma̱n, ihyan ra̱ncho ma̱n.

³⁵Tuhme cuahn ihyan viya̱n ndihchero ye deh che chi. Cuahn che nda̱ ihyan chahn na̱n che quenun Dihvo vo ne, ndihchero ye sa̱hn min che a ntiquenda̱h vaco chahn sa̱hn. Va se chihto na̱n Dihvo vo, quenun se tino yahn se. A va cua̱co dave yahn se, ne dihya ihyan chahn chi.

³⁶Tuhme ihyan che ndihchero ye ne, rente ye nduco ihyan che nda̱ chahn ta̱ca̱ chi che ndiquenda̱h vaco chihnga̱ chahn sa̱hn min.

³⁷Nducoya̱ca ihyan che vate ye ya̱hn yahn ya̱n Gadara, a̱ma dihya ye chi. Chemin che ra̱hn ye ri ye Dihvo vo che nda̱ca ye ya̱n min. Tuhme chenda̱ Dihvo vo chete ba̱rco, cona̱hn ye.

³⁸Sa̱hn che a ntiquenda̱h vaco chahn sa̱hn ne, a̱ma rica se Dihvo vo che ca̱h yune ye che conduco se ihyan. Ate hua ca̱h yune ye, ne ra̱hn ye ri ye sa̱hn:

³⁹―Conahn cua̱hn ndevaque, ne cuente yahn vederihno chahte che din Dendiohs ndoque. Tuhme cona̱hn se, ne chacotuhn se ndudo numacuahn viya̱n me yahn vederihno chahte che din Dihvo vo nduco se.

⁴⁰Cuahn che ndaconan Dihvo vo viche la̱do cuh yahn vine me ne, a̱ma ya̱hn ihyan nevahnecun ye ihyan numacuahn vedeyeno, te nducoya̱ca ye ne, chenan rino ye ihyan.

⁴¹Ura min nda̱ a̱ma sa̱hn ndina̱n yahn ya̱co, duche se Jairo, ne chehntihya se na̱n Dihvo vo, chica se favor ihyan, ca̱va che ca̱hn ye va̱co se,

⁴²te va a̱ma ndiya̱hn ra ta̱hn dihn yahn se, a ri te tenduh ndichio nduyo. Cheta̱h cah ta̱hn, adeche coh te. Tuhme cuahn Dihvo vo, ne nde hua ri che ca̱ca ye, te a̱ma ya̱hn ihyan nduco ye.

⁴³Min va̱n ihyan chahn, nduco a̱ma nda̱hta che cah te, rendora te yun ro ro. A ri ndichio nduyo che quenan cah me ta̱hn, ne a chihno nducuahn yahn te che va che renedihve te sa̱hn doctor. Ate nde a̱ma se hua chi dico se ta̱hn.

⁴⁴Chahn nda̱ te cua̱hn veda̱me Dihvo vo, nahn ta̱h te tino yahn ye, ne ndeta̱hno cheguan rahn yun me ta̱hn.

⁴⁵Tuhme tumerune Dihvo vo: ―¿Duh nahn ta̱h tino yáhn ne? Nducoya̱ca ye ra̱hn ye te ndiyu ihyan chahn. Pedro nduco combiero yahn ye ne, ra̱hn ye: ―Ihyan Ricuahn, a̱ma ya̱hn ihyan chenun chiche ye chihto na̱n ne, ¿dehco che retumerune ne duh nahn ta̱h tino yahn ne?

⁴⁶Ate ra̱hn Dihvo vo: ―Va duh che nahn ta̱h tino yáhn, te checadinó che ndoyahn a̱ma ihyan nduco vederihquentiyon yáhn.

⁴⁷Ndihche nda̱hta me che a checadino Dihvo vo, ne chahn nda̱ te, chehntihya te na̱n ye, nde tuno rendoh te. Tuhme neca̱h cuande te ihyan na̱n nducoya̱ca ihyan ya̱n deh cuande che nahn ta̱h te tino yahn ye ma̱n, nduhca̱ che ndeta̱hno ndoyahn te ma̱n.

⁴⁸Ra̱hn Dihvo vo ri ye ta̱hn: ―Da̱yá, yahn che chitehne ne, a ndoyehn. Dehve rahque. Co conahn.

⁴⁹Nde metah cuihno ca̱hma Dihvo vo cuahn che nda̱ a̱ma ihyan ndeva̱co Jairo, ne ra̱hn ye: ―A chih ta̱hn dihn da̱ya ne. Ametah deh cuande che quenda ne Ihyan Ricuahn.

⁵⁰Chihnevan Dihvo vo, ne ra̱hn ye ri ye Jairo: ―Hua co ran. Cuitehne che co conán di, ne ta̱hn dihn daye ne, ndaconan conan te.

⁵¹Cuahn che nda̱ ye ndeva̱co se ne, hua ca̱h yune ye che chenda̱ nducoya̱ca ihyan nduco ye, dema̱n Pedro ma̱n, Jacobo ma̱n, Jua̱n ma̱n, nduco chida ta̱hn dihn me ma̱n, nduco chaco te ma̱n.

⁵²Rah ra̱n nducoya̱ca ihyan ma̱n, raco ye ma̱n, ca̱va ta̱hn dihn me. Ate ra̱hn Dihvo vo: ―Hua cuaco nchuhn, te ta̱hn dihn tih ne, dehve ndih te, te quiya̱do te.

⁵³Ate riyon nan ihyan chahn ihyan, te a devano ye te ta̱hn dihn me ne, a ndih te.

⁵⁴Tuhme cheta̱h Dihvo vo ta̱h te, ne a̱ma dito ra̱hn ye: ―Ta̱hn dihn, ¡cuenecuen!

⁵⁵Nta̱ vaco ta̱hn dihn me, ne ndeta̱hno necuan te. Chihquentiyon Dihvo vo che ca̱h ihyan chahn, cheh te.

⁵⁶Chida te nduco chaco te ne, a̱ma cuahn ino ye. Ate chihquentiyon Dihvo vo ihyan chahn che hua ca̱hma ye nduco nde a̱ma ihyan, che ndedetuhche ye ta̱hn.