1Wa nsuꞌwi tiꞌyun yijan chaꞌ lka Tiberio emperador nu lka ndloo la ꞌin nten tyukwi ñaꞌaan chalyuu, Poncio Pilato lka ndloo nde lo yuu ꞌin Judea, tñan ꞌin Tiberio kanꞌ bra kanꞌ; loꞌo nu naan Herodes kanꞌ, lka yu ndloo lo yuu ꞌin Galilea tyempu kanꞌ; loꞌo Felipe, taꞌa ngula Herodes kanꞌ, lka yu ndloo lo yuu ꞌin Iturea loꞌo lo yuu ꞌin Traconite ti kwiꞌ tyempu kanꞌ; loꞌo xka nu naan Lisanias, lka yu ndloo lo yuu ꞌin Abilinia bra kanꞌ.
2Ti kwiꞌ bra kanꞌ lka Anás loꞌo Caifás xꞌnan sti joꞌo. Bra kanꞌ ykwiꞌ Ndiose loꞌo Xuwa sñiꞌ Zacarías seꞌen ndiꞌin yu niꞌ kixinꞌ,
3kanꞌ chaꞌ mdoꞌo Xuwa mdaꞌan yu nde lo ntenꞌ tyukwi ñaꞌaan tuꞌwa chku Jordán kanꞌ; ykwiꞌ ꞌa Xuwa loꞌo nchga nten nu mdyoꞌ tiꞌin seꞌen ndiꞌin yu, chaꞌ ka jyuꞌu tiꞌ neꞌ ꞌin kiꞌya nu ndiꞌin ꞌin neꞌ, chaꞌ kulaa yaꞌ neꞌ nchga chaꞌ kuxi kanꞌ. Bra kanꞌ ndukwatya Xuwa ꞌin neꞌ kanꞌ. Kuꞌni Ndiose chaꞌ tlyu tiꞌ ꞌin neꞌ kanꞌ bra kanꞌ, ndukwin Xuwa.
4Wa lka chaꞌ kanꞌ, sa ñaꞌan lka chaꞌ nu ngwaꞌan ayman Isaías lo kityi; ayman kanꞌ lka nu ykwiꞌ chaꞌ ꞌin Ndiose loꞌo nten nu ngwa sꞌni. Nde lka chaꞌ nu ndukwa lo kityi kanꞌ: Kwen ꞌa nnen nxiꞌya ska nten niꞌ kixinꞌ: “Bra ti slaa wan ska tuwiin seꞌen kan ykwiꞌ nu nka Xꞌnaan” ndukwin nu nxiꞌya kanꞌ. “Xñii suꞌwe wan tuwiin seꞌen tyijin ykwiꞌ.
5Kuꞌni xaꞌan wan nchga tutkaꞌ, loꞌo kuꞌni wan chaꞌ katen nchga kiꞌya, nchga lo nten; xñii ñi wan nchga seꞌen nxitiꞌin tuwiin, loꞌo kuꞌni lkwa suꞌwe wan ñaꞌaan tuwiin” ndukwin.
6“Ndla ti ñaꞌan neꞌ tyukwi ñaꞌaan chalyuu, chaꞌ ka kulaa Ndiose ꞌin nten ꞌin nchga chaꞌ kuxi.” Ngwañaꞌan ngwa chaꞌ ngwaꞌan ayman Isaías lo kityi kanꞌ.
7Kaꞌan nten mdiyan seꞌen nduun Xuwa chaꞌ tyukwatya neꞌ. Bra kanꞌ ykwiꞌ Xuwa loꞌo nten kaꞌan kanꞌ: ―¡Sa ñaꞌan ngiꞌni kunan tlá, ngwañaꞌan ngiꞌni wan! ―ndukwin Xuwa―. ¿Ta wa mdiya nten nu mxitsen ꞌwan ni a? ¿Sa bra ni nduwe tiꞌ wan chaꞌ ta Ndiose nu tiꞌí ꞌwan bra nu tyii chalyuu a? ―ndukwin―.
8Suꞌwe sikwa, kwaꞌu wan ꞌwa si chañi chaꞌ wa ngulaa yaꞌ wan chaꞌ kuxi nu ndiꞌin ꞌwan; ja chkwiꞌ wan chaꞌ sñiꞌ Ndiose lka wan chunꞌ ndyoꞌo wan ꞌin ayman Abraham nu yuꞌwi ti sꞌni. Chaꞌ nu ñi chkwiǐnꞌ loꞌo wan ―ndukwin Xuwa―, chaꞌ ka ꞌin Ndiose kulo suwi Ni xka ta nten nu ka sñiꞌ Abraham, ja loꞌo wan, si nchka tiꞌ Ni; nxkeꞌ tiꞌ wan chaꞌ ja nsuꞌwi chaꞌ tiya ꞌin xka la nten kanꞌ, nxkeꞌ tiꞌ wan chaꞌ sa ñaꞌan lka kee re, ngwañaꞌan ti lka neꞌ kanꞌ ―ndukwin Xuwa ꞌin neꞌ―.
9Sa ñaꞌan nduun ska nten loꞌo chkwan yka ꞌin yu chaꞌ kwaja yu lo yka kwiñii ꞌin yu, ngwañaꞌan ngiꞌni Ndiose. Siꞌyu yu kanꞌ nchga yka nu ja ndyoꞌo nan loo, chaꞌ tikin yu yka kanꞌ lo kiiꞌ; ngwañaꞌan ta Ndiose nu tiꞌí ꞌin nten nu ja xlyaa kulaa yaꞌ chaꞌ kuxi nu ndiꞌin ꞌin neꞌ.
10Bra wa mdyii ynan neꞌ chaꞌ kanꞌ, bra kanꞌ mnichaꞌ neꞌ ꞌin Xuwa bra kanꞌ: ―¿Ni ñaꞌan tñan ka kuꞌni ba sikwa a?
11Bra kanꞌ ngwaꞌu Xuwa ꞌin neꞌ: ―Nde lka tñan nu kuꞌni wan ―ndukwin Xuwa―. Si nsuꞌwi tukwa ykanꞌ ꞌin ska wan, ta wan ska ꞌin ska nten tiꞌi nu ja nsuꞌwi ꞌin siyaꞌ ti; si nsuꞌwi nan nchku wan, bra kanꞌ suꞌwe wan chinꞌ chaꞌ ta wan ku nten nu ja nsuꞌwi ꞌa nan ku ―ndukwin Xuwa ꞌin neꞌ.
12Loꞌo yan chinꞌ neꞌ kuxi nu ndlo tñi ꞌin nten chaꞌ ꞌin neꞌ xka laꞌa tsuꞌ, yan neꞌ chaꞌ tukwatya Xuwa ꞌin neꞌ. Bra kanꞌ mnichaꞌ neꞌ kanꞌ ꞌin Xuwa: ―¿Ni ñaꞌan tñan ka kuꞌni ba ni, mstru? ―ndukwin neꞌ kanꞌ ꞌin Xuwa.
13―Ja tyijin ꞌa wan biyaꞌ chaꞌ kulo wan tñi ꞌin nten ―ndukwin Xuwa ꞌin neꞌ kanꞌ.
14Loꞌo chinꞌ neꞌ sndaru mdiyan neꞌ chaꞌ kunichaꞌ neꞌ ꞌin Xuwa bra kanꞌ: ―Loꞌo bare, ¿ni ñaꞌan tñan ka kuꞌni ba ni? ―ndukwin sndaru kanꞌ. ―Ja kulaa ꞌa wan nan nu nsuꞌwi ꞌin nten; ja xitsen ꞌa wan ꞌin neꞌ, ja suꞌwa ꞌa wan kiꞌya laja ti ꞌin neꞌ, chaꞌ kaja chaꞌ kanꞌ ꞌwan. Loꞌo bra kanꞌ ja chkwiꞌ ꞌa wan chaꞌ chinꞌ ti liyaꞌ ndiji ꞌwan ―ndukwin Xuwa ꞌin sndaru kanꞌ.
15Mdaꞌan ꞌa chaꞌ tiye neꞌ ndiꞌin neꞌ, chaꞌ mskeꞌ tiꞌ neꞌ chaꞌ Xuwa lka Krixtu nu wa kan ti lo chalyuu re.
16Bra kanꞌ ykwiꞌ Xuwa loꞌo nchga neꞌ nu ndiꞌin kanꞌ: ―Loꞌo tyiꞌa ti ndukwatyaǎn ꞌwan ―ndukwin Xuwa―. Loꞌo wa kan ti xka nten seꞌen ndiꞌin wan nu nchka la ꞌin ke naꞌ. Loꞌoǔn kuꞌni tnuǔn ꞌin yu kanꞌ. Suꞌwe ꞌa tñan kaja ꞌñaǎn, nxkeꞌ tiǎnꞌ, ni siya ti ndukwa snan yu kanꞌ xtiǐnꞌ. Loꞌo yu kanꞌ, ja ndukwatya yu ꞌin nten loꞌo tyiꞌa ti; xka ñaꞌan kuꞌni yu. Kuꞌni yu chaꞌ kanun Tyiꞌi Ndiose niꞌ kasiya ꞌin nten, bra nu tukwatya yu ꞌin neꞌ. Loꞌo kanꞌ kuꞌni luwi Ndiose ꞌin neꞌ kanꞌ loꞌo xaa ꞌin ykwiꞌ Ni, chaꞌ ngwañaꞌan ka suꞌwe ka tiye neꞌ ―ndukwin―.
17Sa ñaꞌan ngiꞌni xꞌnan tya, ngwañaꞌan kuꞌni Ndiose; sa ñaꞌan nxoꞌ tiꞌin xꞌnan tya ꞌin nskwaꞌ, ndikin yu lkaꞌ tlaꞌ loꞌo mti, ngwañaꞌan suꞌwe taꞌa Ndiose ꞌin nten. Bra kanꞌ suꞌwa Ni ꞌin nten xaꞌan chaꞌ skin neꞌ lo kiiꞌ nu ja ka ꞌa tyuwiꞌ siyaꞌ ti.
18Ngwañaꞌan kaꞌan ꞌa chaꞌ tiya ykwiꞌ Xuwa loꞌo nten, bra nu ykwiꞌ yu sa ñaꞌan chaꞌ suꞌwe nu kuꞌni Jesús.
19Loꞌo kanꞌ mstya Xuwa kiꞌya ꞌin gobernador Herodes chaꞌ yꞌni yu kunan ꞌin Herodías kwilyoꞌo taꞌa yu nu naan Felipe. Loꞌo ti ndiꞌin xka la chaꞌ kuxi nu yꞌni yu kula Herodes kanꞌ.
20Bra kanꞌ ja mdukwa Herodes chaꞌ nu ykwiꞌ Xuwa loꞌo, kuxi la yꞌni yu, msuꞌwa yu ꞌin Xuwa niꞌ ñaꞌan chkwan.
21Bra nu ti ji tsaa Xuwa kanꞌ niꞌ ñaꞌan chkwan, ti nduun yu tuꞌwa chku Jordán ndukwatya yu ꞌin kaꞌan ꞌa nten, bra kanꞌ mdiyan Jesús seꞌen ndiꞌin yu chaꞌ tukwatya Xuwa ꞌin yu. Laja nu ndukwatya yu ꞌin Jesús, bra kanꞌ ykwiꞌ Jesús loꞌo Ndiose, loꞌo ngalaa tuwiin niꞌ kwan bra kanꞌ.
22Ngwiꞌya Tyiꞌi Ndiose seꞌen ndiꞌin Jesús; sa ñaꞌan ndukwi ska kiñi cha kuun, ngwañaꞌan ngwiꞌya Tyiꞌi Ndiose lo jlyuꞌwe Jesús. Bra kanꞌ ynan neꞌ ykwiꞌ Ndiose nde niꞌ kwan: ―Sñiěnꞌ, suꞌwe ꞌa nka tiyeěn ñaꞌaǎn ꞌiin. Ndiya ꞌa tiǎnꞌ ꞌiin ―ndukwin Ndiose ꞌin Jesús.
23Kalatyii yijan nsuꞌwi Jesús bra nu mdyisnan ngiꞌni yu tñan ꞌin Ndiose Sti yu. Mskeꞌ tiꞌ neꞌ chaꞌ Se ngwa sti yu, loꞌo sti Se ngwa ayman Elí;
24loꞌo sti Elí kanꞌ ngwa ayman Matat; Leví ngwa naan sti Matat kanꞌ; Melqui ngwa naan sti Leví kanꞌ; Janan ngwa naan sti Melqui kanꞌ; loꞌo xka Se ngwa sti Janan kanꞌ;
25Matatías ngwa naan sti Se kanꞌ; Amós ngwa naan sti Matatías kanꞌ; Nahum ngwa naan sti Amós kanꞌ; Esli ngwa naan sti Nahum kanꞌ; Nagai ngwa naan sti Esli kanꞌ;
26Maat ngwa naan sti Nagai kanꞌ; loꞌo xka nu naan Matatías ngwa sti Maat kanꞌ; Semei ngwa naan sti Matatías kanꞌ; loꞌo xka nu naan Se ngwa sti Semei kanꞌ; sñiꞌ Judá ngwa Se kanꞌ;
27Joanán ngwa naan sti Judá kanꞌ; Resa ngwa naan sti Joanán kanꞌ; Zorobabel ngwa naan sti Resa kanꞌ; Salatiel ngwa naan sti Zorobabel kanꞌ; Neri ngwa naan sti Salatiel kanꞌ;
28loꞌo xka nu naan Melqui ngwa sti Neri kanꞌ; Adi ngwa naan sti Melqui kanꞌ; Cosam ngwa naan sti Adi kanꞌ; Elmodam ngwa naan sti Cosam kanꞌ; Er ngwa naan sti Elmodam kanꞌ;
29Josué ngwa naan sti Er kanꞌ; Eliezer ngwa naan sti Josué kanꞌ; Jorim ngwa naan sti Eliezer kanꞌ; loꞌo xka Matat ngwa sti Jorim kanꞌ;
30loꞌo xka nu naan Leví ngwa sti Matat kanꞌ; Simeón ngwa naan sti Leví kanꞌ; loꞌo xka nu naan Judá ngwa sti Simeón kanꞌ; loꞌo xka nu naan Se ngwa sti Judá kanꞌ; Jonán ngwa naan sti Se kanꞌ; Eliaquim ngwa naan sti Jonán kanꞌ;
31Melea ngwa naan sti Eliaquim kanꞌ; Mainán ngwa naan sti Melea kanꞌ; Matata ngwa naan sti Mainán kanꞌ; Natán ngwa naan sti Matata kanꞌ;
32David ngwa naan sti Natán kanꞌ; Isaí ngwa naan sti David kanꞌ; Obed ngwa naan sti Isaí kanꞌ; Booz ngwa naan sti Obed kanꞌ; Salmón ngwa naan sti Booz kanꞌ; Naasón ngwa naan sti Salmón kanꞌ;
33Aminadab ngwa naan sti Naasón kanꞌ; Aram ngwa naan sti Aminadab kanꞌ; Esrom ngwa naan sti Aram kanꞌ; Fares ngwa naan sti Esrom kanꞌ; loꞌo xka nu naan Judá ngwa sti Fares kanꞌ;
34Jacob ngwa naan sti Judá kanꞌ; Isaac ngwa naan sti Jacob kanꞌ; Abraham ngwa naan sti Isaac kanꞌ; loꞌo nu naan Taré ngwa sti Abraham kanꞌ; Nacor ngwa naan sti Taré kanꞌ;
35Serug ngwa naan sti Nacor kanꞌ; Ragau ngwa naan sti Serug kanꞌ; Peleg ngwa naan sti Ragau kanꞌ; Heber ngwa naan sti Peleg kanꞌ; Sala ngwa naan sti Heber kanꞌ;
36Cainán ngwa naan sti Sala kanꞌ; Arfaxad ngwa naan sti Cainán kanꞌ; Sem ngwa naan sti Arfaxad kanꞌ; Noé ngwa naan sti Sem kanꞌ; Lamec ngwa naan sti Noé kanꞌ;
37Matusalén ngwa naan sti Lamec kanꞌ; Enoc ngwa naan sti Matusalén kanꞌ; Jared ngwa naan sti Enoc kanꞌ; Mahalaleel ngwa naan sti Jared kanꞌ; loꞌo xka nu naan Cainán ngwa sti Mahalaleel kanꞌ;
38Enós ngwa naan sti Cainán kanꞌ; Set ngwa naan sti Enós kanꞌ; Adán ngwa naan sti Set kanꞌ; loꞌo ñi la chkwiǐnꞌ chaꞌ Ndiose lka sti ayman Adán kanꞌ, chaꞌ Ndiose lka nu wa mñan ꞌin Adán kanꞌ. Nchga nten nu ndukwa nin lo kityi re ni, ngwa neꞌ ayman ꞌin Jesucristo lo chalyuu nu ngwa ti sꞌni.
