Rookashi 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Iroñaaka okaatzi 15 ojarentsi ipinkathariwenteeyakirini maawaeni jeekayitatsirini kipatsikipaeni riraga oroomajatzi iwaero Teweeryo Seesari. Ari rotyaantakiri riraga Poonshiyo Peraato ipinkathariwentziri joreeyajatzi. Eejatzi rotyaantakiri riraga Erooreshi ipinkathariwentziri riraga karireeyajatzi; omaanta rirentzi Erooreshi, iwaero Jiripi, ipinkathariwentziri riraga itooryajatzi eejatzi tarakoniitejatzi. Eejatzi riraga Rijaañashi ipinkathariwentziri awireeñajatzi.

²Eejatzi iroñaaka ipinkathariwenteeyirini ñaanakowenantatsiripaeni Aanashi eejatzi Kaejashi. Roojatzi ijeekantapaaka Jowa, itomi Jakariiyashi, janta okaankiityeenta. Ikantakiri Tajorentsi: —Nokowaki iroñaaka pikenkithatakaeri atziripaeni, eenitatsi nokowakiri pikamanteeyeririni.

³Ikanta ikinakinayitanakini rirori othapyaakiini iñaa iitachari Joriraani, ikanteeyakirini atziripaeni: —Pikenkithashiryagaeya, eero pikimitagaa paerani, pookaero kaari kameethatatsi panteeyakirini, roojatzi ikamintheeyantemirini Tajorentsi: eero ikenkithashiryaakoteemiro pantawitarini. Roojatzi nokaawoshitakotanteeyakimirini Tajorentsi riyotantyaari atziri awijakoteemi.

⁴Paerani ikenkithatakotzitakarini Jowa riraga kamanantzirorini iñaani Tajorentsi iitachari Iseeyashi. Iroka rojankinatakotzitakaririni, ikantzi: “Eenitatsi iinja atziri kenkithatakayerini atziripaeni janta okaankiityeenta, ikanteri: ‘Paamayarirapa Awinkatharite. Pikameethatanaki iñaaperotantapaakimiri pikameethatzi. Aririka pikameethatanaki pikimityaawo awotsi kameethatatsiri ikinantapaakyaari Jewaperowenantatsiri: powameethatero iñaaperotanteeyapaakyaaworini.

⁵Pikiyagaanteero opompaetopaeni, pityaakiyiteroni otenkanaapaeni, powameethatero maawaeni. Eejatzi powameethatero awotsi tzipitayitatsirini, otampatsikatantyaari kameetha, okameethapankaatanee. Noshiyakaawentashitakawo iroka.

⁶Roojatzikya maawaeni atziripaeni iñeeyantawakyaarini owawijaakoeyeririni, riraga Rotyaantanewo Tajorentsi’ ”.

⁷Ikantaka ipokashiteeyawitakarini osheki atziri ikowawitaka ikaawoshitakoeyaarinimi Tajorentsi. Omaanta riraga Jowa eenitatsi ikanteeyawakiririni: —Eerokateeyakini maankipaeni: pikimiteeyakarini kamaaripaeni. Tema osheki pamatawitanteeyini, eejatzi pitheeyawaetashita. Tee okameethatzi pantziri. Tee pikowaeyawitani piyaate paamariki kaari tsiwakanitatsini, rootaki pikowantawitakari pikaawoshitakotyaarimi Tajorentsi.

⁸Pikowakirika nokaawoshitakotawakimiri Tajorentsi, pityaawo pikenkithashireeya, pijeekanteeyaari kameetha, pookaero kaari kameethatatsi pantapiinteeyakirini niyotantyaari tee pikimiwita paerani. Eero pikantawaetashita: “Nosheninkatakari Awaraamani, rootaki niyotantakari aritaki nawijakotee”. Pamatawitashitaka eeroka apaniroeni. Ikowakirikami riraga Tajorentsi, imatero ipeyiromi atziri iroka mapika, osheninkatanteeyaaririmi rirori aritaki rantakiromi. Omaanta eerokapaeni eerokawitaka icharineeteni Awaraama, eerorika paapatziyari rirori patsipetashitakawo pisheninkawitakari: rooma pajankanekira kimitakimi mapi: pikijotzira.

⁹Maawaeni inchato kaari kithokitatsi tema ari atowaeyakironi apiyoteeyeroni atagaeyeroni paamariki. Eejatzi eerori pikimiteeyakawoni inchato kaari kithokitatsi. Kyaaryoowa rookimikari eerori Tajorentsi paamariki kaari tsiwakanitatsini.

¹⁰Rojampiteeyakirini riraga atziripaeni: —¿Iitaka pikoyiri nanteeyerini?

¹¹Rakanakiri: —Otzimirika apite piithaari, pipagaanteri ashironkaenkari apaani. Otzimimotzimirika osheki powanawo, pipagaanteri eejatzi ashironkaenkari. Pikaminthaantapiinte.

¹²Eejatzi ipokashitakiri Jowa aayitziririni koriki: rayiniri riraga oroomajatzi, osheki ramatawitziri eejatzi atziripaeni. Tema raagaantzitapiintakiri. Ipokashiiyakirini ikowaki ikaawoshitakoeyawakirini Tajorentsi, rojampitapaakiri: —¿Oetarika nanteri naari piyotantenari kyaaryo naapatziyakari rirori?

¹³Ikantawakiri: —Eero powanaashitawo eeroka apaniroeni paashitzitantyaariri iyorikite atziri, omaanta pimonkaataperotero kameetha ikantakimiri oroomajatzi.

¹⁴Eejatzi ipokashiiyakirini apaanipaeni joraaro, rojampitakiri: —¿Oetaka nanteri naari? Ikantawakiri: —Eero pikijashitari atziri pikowantyaari pominthaayeri paapithatantyaariri iyorikite, eejatzi eero pikowantari payitantyaariri iyorikite. Pikimoshirewenteri ipinatzimirira piwinkatharite, eero pikoyi ipaetemi paashini.

¹⁵Ikanta raamagaeyarini Jesokirishito, iitashiteeyawitani rooteentsi rareetya. Ikenkithashiryaakoeyirini ikantzi: “¿Rirotakima Jowa Rotyaantanewo Tajorentsi?”

¹⁶Omaanta ikanteeyakirini Jowa: —Nokaawoshitakoeyakimirini Tajorentsi iñaaki: kaari pomeentsitachani. Iinja ipokapaakirika Awinkatharite, osheki nopinkathaperotakiri, rooma naaka tee nomonkaatari naari. Rotyaanteeyeeni rirori Ishire Tajorentsi ojeekantanakimi pajankaneki, owameethateeyemini.

¹⁷Iinja rinashitakagaeyaarini irira kameethatatsiri eejatzi kaari kameethatatsi. Akimitzirowanki aari anashitawo okithoki pankirentsi, kitekiyiteentsirini eejatzi anashitakawo roori jampipentakitatsiri. Akempoyeero okithoki, inta atayero jampipentakiri. Eejatzi ikimiteeyeeni rirori impaetakinari, riraga Rotyaantanewo Tajorentsi: ikamintheeyerini aapatziyeeyaririni, irira iñaaperotakiri ikameethatzi. Omaanta riraga theenkiriripaeni ari rowashironkagaeyakirini. Tema iñaaperotakiri tee ikameethatzi.

¹⁸Aritaki ikenkithatakaapiintziri Jowa: ikamantapiinteeyakirini atziri tsika ikanteeyaa ikameethatanteeyaari, eejatzi ikamantziri tsika ikanteeyaa rawijakotanteeyaarini.

¹⁹Eejatzi ikantakiri riraga Erooreshi: —Tee okameethatzi pantayitzirini. Paapithatakiri pirentzi iina rowaga Eroriiyashi. Eeniro osheki paashini kaari kameethatatsi pantayitzirini. Roojatzi ikijanakiri Erooreshi. Ipinkathariwenteeyirini karireeyajatzi, rootaki imatantakawori raakaantakiri Jowa, shepik, romonkyaagakaantakiri. Eekiro riyaatatzi rantaperotanakiro kaari kameethatatsi.

²¹Tekirani romonkyaagakaanteetziri Jowa, eejatzi tekirani ikenkithatakotakiri Tajorentsi riraga Jesoshi, tema riraga Jowa ikaawoshitawenteeyakarini Tajorentsi osheki atziri. Eejatzi riraga Jesoshi ikaawoshitawentakari ashitariri, roojatzi ikenkithatakaantakariri irira. Omapokapaaka ayiitashitapaakiri Ishire Tajorentsi, opoñaaka jenokinta. Oshiyawitapaakari jamomo. Eejatzi ikemaeyawakironi ikantakiriri Tajorentsi: —Eeroka notyomi nonintashireperotzimi. Osheki nokimoshirewentakimi.

²³Okaataki rojarentsite Jesoshi 30, ritantanakawori ikenkithatakagaeyirini ijoriiyotzinkaritepaeni. Omawitya ikenkithashiryaaka maawaeni atziri rirotaki itomi Josee, rirotaki itominthori, riraga jewatatsiri ikoñaatzi. Eekiro rimpaetapaaki reentsiteperopaeni Josee. Iriri riraga Josee iwaero Erii.

²⁴Iriri riraga Erii iwaero Mataani. Iriri riraga Mataani iwaero Rewii. Iriri riraga Rewii iwaero Meeriki. Iriri riraga Meeriki iwaero Jaanani. Iriri riraga Jaanani iwaero Josee.

²⁵Iriri riraga Josee iwaero Matateyashi. Iriri riraga Matateyashi iwaero Amooshi. Iriri riraga Amooshi iwaero Nawooni. Iriri riraga Nawooni iwaero Eeshiri. Iriri riraga Eeshiri iwaero Nagae.

²⁶Iriri riraga Nagae iwaero Maatari. Iriri riraga Maatari iwaero Matateyashi. Iriri riraga Matateyashi iwaero Shemee. Iriri riraga Shemee iwaero Joseeki. Iriri riraga Joseeki iwaero Joraa.

²⁷Iriri riraga Joraa iwaero Jowanaani. Iriri riraga Jowanaani iwaero Reeja. Iriri riraga Reeja iwaero Jorowaweeri. Iriri riraga Jorowaweeri iwaero Jaratyeeri. Iriri riraga Jaratyeeri iwaero Neeri.

²⁸Iriri riraga Neeri iwaero Meeriki. Iriri riraga Meeriki iwaero Ariitzi. Iriri riraga Ariitzi iwaero Kojaami. Iriri riraga Kojaami iwaero Eremoraami. Iriri riraga Eremoraami iwaero Eere.

²⁹Iriri riraga Eere iwaero Joshoe. Iriri riraga Joshoe iwaero Eriyeshaari. Iriri riraga Eriyeshaari iwaero Joriimi. Iriri riraga Joriimi iwaero Mataa. Iriri riraga Mataa iwaero Rewii.

³⁰Iriri riraga Rewii iwaero Shimiyo. Iriri riraga Shimiyo iwaero Joraa. Iriri riraga Joraa iwaero Josee. Iriri riraga Josee iwaero Jonaani. Iriri riraga Jonaani iwaero Eryakiimi.

³¹Iriri riraga Eryakiimi iwaero Mereeya. Iriri riraga Mereeya iwaero Maenaani. Iriri riraga Maenaani iwaero Mataata. Iriri riraga Mataata iwaero Nataani.

³²Iriri riraga Nataani iwaero Iraviiri. Iriri riraga Iraviiri iwaero Isayii. Iriri riraga Isayii iwaero Oweeri. Iriri riraga Oweeri iwaero Woosho. Iriri riraga Woosho iwaero Sharimoo. Iriri riraga Sharimoo iwaero Naashoni.

³³Iriri riraga Naashoni iwaero Aminagaawa. Iriri riraga Aminagaawa iwaero Araami. Iriri riraga Araami iwaero Aarani. Iriri riraga Aarani iwaero Eshiromi. Iriri riraga Eshiromi iwaero Paareshi. Iriri riraga Paareshi iwaero Joraa.

³⁴Iriri riraga Joraa iwaero Jakoowo. Iriri riraga Jakoowo iwaero Ijaaka. Iriri riraga Ijaaka iwaero Awaraama. Iriri riraga Awaraama iwaero Taree. Iriri riraga Taree iwaero Nakoori.

³⁵Iriri riraga Nakoori iwaero Sherooko. Iriri riraga Sherooko iwaero Ragaawo. Iriri riraga Ragaawo iwaero Pereeki. Iriri riraga Pereeki iwaero Eeweri. Iriri riraga Eeweri iwaero Jaari.

³⁶Iriri riraga Jaari iwaero Kaenaani. Iriri riraga Kaenaani iwaero Aratajaari. Iriri riraga Aratajaari iwaero Sheeme. Iriri riraga Sheeme iwaero Noe. Iriri riraga Noe iwaero Rameeki.

³⁷Iriri riraga Rameeki iwaero Matojareeni. Iriri riraga Matojareeni iwaero Enoko. Iriri riraga Enoko iwaero Jareeri. Iriri riraga Jareeri iwaero Maarareeri. Iriri riraga Maarareeri iwaero Kaenaani.

³⁸Iriri riraga Kaenaani iwaero Enooshi. Iriri riraga Enooshi iwaero Seete. Iriri riraga Seete iwaero Araani. Paerani riwetsikantakariri Tajorentsi riraga Araani.