Luuka 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Yimɓe heewɓe kornii jantaade kulle gaɗuɗe hakkunde men,

²hono no seediiɓe gila puɗɗooɗe, laatiiɓe kaadime'en konngol ngol ɓee, kaalaniri en nii.

³Tawfilus tedduɗo, mi wiɗike kulle ɗee fuu gila arannde, mi tawii ana haani mi winndane ɗum no waɗiri nii,

⁴yalla aɗa heɓa taƴoral jannde nde njanngine-ɗaa ndee yo goonga.

⁵E ley jamaanu Hirudus, kaananke Yahuudiya, jottinoowo sadaka biyeteeɗo Jakariyaa ana woodunoo. Omo jeyaa e waalde Abiya, ɓii Haaruuna oo. Jom suudu Jakariyaa duu yo iwdi Haaruuna, innde mum yo Elisabet.

⁶Ɓe ɗiɗon fuu ɓe fooccitiiɓe yeeso Laamɗo, eɓe njokki jamirooje Joomiraaɗo e sariyaaji mum fuu, ɲiŋoore fuu walaa e maɓɓe.

⁷Kaa ɓe keɓaalino ɓiɗɗo, sabi Elisabet laatinoke dimaro, kasen duu ɓe ɗiɗon fuu ɓe naywii.

⁸Ɲannde wootere, Jakariyaa ana golla golle mum yottingol sadaka yeeso Laamɗo, sabi ɲannde mum yo waalde makko jeyti.

⁹Nde wonnoo yottinooɓe sadaka ana mboownoo waɗude urwa, nii urwa nanngi mo faa o naata Suudu Dewal Mawndu nduu, o ura ton uurdi.

¹⁰Jamaa oo fuu darii sella ana duwoo wakkati mo uurdi ndii uretee oo.

¹¹Oon wakkati, malaa'ika Joomiraaɗo ɓanngani mo, darii ɲaamo urirde ndee.

¹²Nde Jakariyaa yiinoo malaa'ika oo ndee, taƴi, darii ana siɲɲa.

¹³Malaa'ika oo wii mo: —Jakariyaa pati hul, sabi duwaawu maa jaabaama. Jom suudu maa Elisabet rimante ɓiɗɗo gorko, inndiraa ɗum Yaayaa.

¹⁴Oon ɓiɗɗo waddante seyo manngo, heewɓe ceyorto pinaaɗe makko,

¹⁵sabi o laatoto tedduɗo e Joomiraaɗo. O yarataa doro, o yarataa huunde fuu ko sigirta. O heewan Ruuhu Ceniiɗo gila e ley reedu inniiko,

¹⁶o wartiran ɓiɓɓe Israa'iilankooɓe heewɓe e Laamɗo Joomiraaɗo mum'en.

¹⁷O ardoto Joomiraaɗo oo warde, o wonda e ruuhu e baawɗe ɗe annabi Iliyaasa heɓunoo, faa o wartira ɓerɗe baabiraaɓe faade e ɓiɓɓe mum'en, faa o wartira murtuɓe duu e hakkille fooccitiiɓe, kaɲum e moƴƴinande Joomiraaɗo oo leɲol lanndiniingol.

¹⁸Jakariyaa lamndii malaa'ika oo, wii: —Hono hen anndiran-mi ɗum goonga? Sabi miin mi naywii, jom suudu am oo duu waɗii duuɓi.

¹⁹Malaa'ika oo jaabii mo, wii: —Miin woni Jibiriilu darotooɗo yeeso Laamɗo, mi nelaaɗo e maa faa mi haalane oo kabaaru lobbo.

²⁰Ndennoo jooni a muumɗan. A haalataa so wanaa wakkati mo ɗum tabiti, sabi a goonɗinaali haala am. Haala am kaa tabitoyan so wakkati majjum warii.

²¹E ley ɗum fuu tawi yimɓe ɓee ana ndoomi Jakariyaa, ana kaaynaa ko ɓooyni ɗum ley Suudu Dewal Mawndu too.

²²Nde o yalti ndee, o ronki haaldude e maɓɓe. Ɓe paami won ko jergii e makko e ley Suudu Dewal Mawndu nduu. O darii omo haalda e maɓɓe muumankoore, o heddii e muumaaku.

²³Nde o tilinoo e golle makko ndee, o hooti suudu makko.

²⁴Caggal ɗeen balɗe, Elisabet jom suudu makko oo reedi, dammbii hakke lebbi joy, ana wiya:

²⁵—Ɗum woni ko Joomiraaɗo waɗani kam nde wattani kam hakkille, ittani kam dukkuru hakkunde yimɓe.

²⁶E ley lewru Elisabet jeegoɓurdu nduu, Laamɗo neli malaa'ika Jibiriilu e ngeenndi mbiyeteendi Nasaraatu ley leydi Galili,

²⁷faade e surba mo taanii Daawuuda biyeteeɗo Yuusufu sabbi. Surba oo ana wiyee Mariyama.

²⁸Malaa'ika oo naati ɗo Mariyama woni ɗoo, wii ɗum: —Aan e jam, keɓuɗo moƴƴere Laamɗo. Joomiraaɗo ana wondi e maa.

²⁹Haala kaa jiiɓi hakkille Mariyama, darii ana miila ko ngoo jowtaango waawi laataade.

³⁰Nii malaa'ika oo wii mo: —Mariyama pati hul! Sabi a heɓii moƴƴere iwnde e Laamɗo,

³¹a reedan, ndimaa ɓiɗɗo gorko, inndiraa ɗum Iisaa.

³²Oon ɓiɗɗo laatoto tedduɗo, o noddirte Ɓii Laamɗo Toowɗo. Laamɗo Joomiraaɗo hokkan mo laamu maamiiko Daawuuda.

³³O laamoto iwdi Yaakuuba, laamu makko timmataa abada.

³⁴Mariyama wii malaa'ika oo: —Hono ɗum laatortoo, mi anndaa gorko?

³⁵Malaa'ika oo jaabii mo, wii: —Ruuhu Ceniiɗo jippoto e maa, baawɗe Laamɗo Toowɗo oo kuurete no ɗowdi nii. Saabe ɗum, ɓiɗɗo mo ndimataa oo noddirte Ceniiɗo, noddirte Ɓii Laamɗo.

³⁶Haya ƴeew, sakiike maa Elisabet duu ɓamii reedu, taweede mo naywii fuu, mo riman ɓiɗɗo gorko. Ana wiyetenoo mo dimaro, kaa jooni omo woni e lewru makko jeegoɓurdu,

³⁷sabi walaa fuu ko Laamɗo waawaa.

³⁸E oon wakkati, Mariyama wii: —Miin, mi korɗo Joomiraaɗo. Yo laatanoram no mbiiru-ɗaa nii. Caggal ɗum, malaa'ika oo witti, seli e makko.

³⁹E ley ɗeen ɲalaaɗe, Mariyama immii law yehi ngeenndi Yahuudiya ngootiri ngonndi dow baamle kaaƴe.

⁴⁰O naati galle Jakariyaa, o jowti Elisabet.

⁴¹Nde Elisabet nannoo jowtaango makko ndee, ɓiɗɗo gonɗo e reedu mum oo dillinii, Elisabet hebbinaa Ruuhu Ceniiɗo,

⁴²ilinii, wii: —A barkinaaɗo hakkunde rewɓe, ɓiɗɗo mo caaw-ɗaa oo duu yo barkinaaɗo.

⁴³Miin, ko ngon-mi faa inna Joomam naata galle am?

⁴⁴Nde jowtaango maa toɓɓinoo e nowru am ndee, ɓiɗɗo gonɗo e reedu am oo dillinike saabe kuyam.

⁴⁵A welii hoore, aan goonɗinɗo ko Joomiraaɗo fodan maa koo laatoto.

⁴⁶Mariyama wii: —Yonki am ana yetta Joomiraaɗo,

⁴⁷ɓernde am ana heewi seyo Laamɗo Kisinoowo kam,

⁴⁸sabi o yurmike kam, miin, korɗo makko lo'uɗo oo. Gila jooni jamaanuuji fuu noddiran kam belɗo hoore.

⁴⁹Sabi Jom Baawɗe oo waɗanii kam kulle mawɗe! Innde makko yo seniinde.

⁵⁰Yurmeende makko herataa e hulɓe mo abada.

⁵¹O gollirii golleeji mawɗi junngo makko semmbinngo, o saakii mawninkiniiɓe.

⁵²O ɓoortii kaanankooɓe iwde e laamu mum'en, o toownii leyɗuɓe.

⁵³O haarnirii yolbuɓe kulle lobbe, o wirfintinii taajiri'en juuɗe ɓole.

⁵⁴O faabike Israa'iilankooɓe, jiyaaɓe makko, o yeggitaali yurmaade Ibarahiima e iwdi mum faa abada, hono no o fodanirnoo njaatiraaɓe men nii.

⁵⁶Mariyama faɓɓidi e Elisabet ko waarata e lebbi tati, caggal mum, hooti suudu mum.

⁵⁷Wakkati ɓeynugol Elisabet yottii, o ɓeyni o heɓi ɓiɗɗo gorko.

⁵⁸Taakallemme'en makko e sakiraaɓe makko nani hinnee mawɗo mo Joomiraaɗo waɗani mo oo, ceyodii e makko.

⁵⁹Nde cukalel ngel hiɓɓinnoo yontere ndee, ɓe ngari taadude ngel. Ɓe njiɗiino inndirde ngel baaba maggel Jakariyaa,

⁶⁰kaa inna maggel jaɓaali, wii ngel inndiree Yaayaa.

⁶¹Ɓe mbii ɗum: —Sii maa fuu walaa inndiraaɗo ndee innde.

⁶²Ɓe lamndorii baaba maggel muumankoore, homo yiɗi ɓiyum oo inndiree.

⁶³Jakariyaa lamndii alluwal, winndi e maggal: «Innde maggel yo Yaayaa.» Ɓe fuu ɓe kaaynaa.

⁶⁴Oon wakkati fuu, hunduko Jakariyaa yoppitaa, ɗemngal mum humtaa, watti haalde e yettude Laamɗo.

⁶⁵Kulol nanngi hoɗuɓe e seraaji ɗii ɓee fuu. Kasen duu ɗum saakii e ley haayre Yahuudiya fuu.

⁶⁶Nanɓe ɗum ɓee fuu ndesi ɗum e hakkillaaji mum'en, ana mbiya: «Koɗum ngel cukalel foti laataade?» Sabi ɓe njii baawɗe Joomiraaɗo ana e maggel.

⁶⁷Jakariyaa, baaba cukalel ngel, heewi Ruuhu Ceniiɗo, sappii, wii:

⁶⁸—Jettooje ngoodanii Joomiraaɗo, Laamɗo Israa'iila, sabi faabike yimɓe mum, soottitike ɗum'en.

⁶⁹O waddanii en kisinoowo tedduɗo iwɗo e suudu Daawuuda, kaadime makko oo

⁷⁰hono no o haalirnoo e kunduɗe annabaaɓe makko seniiɓe gila arannde nii.

⁷¹O fodii o danndan en e konnee'en men, o ittan en e juuɗe wayɓe men.

⁷²O ɓannginanan en yurmeende nde o ɓannginani maamiraaɓe men ndee, sabi o miccitike aadi makko ceniindi ndii,

⁷³ɗum yo hunoore nde o hunanii maama men Ibarahiima. Hunoore ndee woni o hokkan en

⁷⁴rewirde mo rafi kulol ley nguurndam men fuu e ley senaare e fooccitaare yeeso makko, tawi en ittaaɓe e juuɗe konnee'en men.

⁷⁶Aan duu ɓinngel am, a noddirte annabaajo Laamɗo Toowɗo, sabi a ardoto Joomiraaɗo oo warde faa moƴƴinanaa mo laawol,

⁷⁷faa anndinaa yimɓe makko o hisiniran ɗum'en yaafaamuya luutti.

⁷⁸Sabi Laamɗo men yo keewɗo yurmeende, faa o faaboroo en nannduɗo e fooyre iwrunde dow,

⁷⁹yalla ana fooynana wonɓe e nimre, fooynana wonɓe e kulol maayde, watta koyɗe men e laawol jam.

⁸⁰Suka oo ana mawna, hakkille mum ana ɓeydoo. O jooɗii ley ladde jeereende faa wakkati mo o ɓannginanaa Israa'iila.