1Ye kene tani in, ngan Sisa Agustus itara betanga medana atu pang di tooltool nga le imot yo tiyepe ye tana mai Rom nga, be di le imot ole tiwodo edi ilo ye rau ke kaungu di tooltool edi.
2Ngan dada ke kaungu di tooltool edi i, in pombe kulkulunu ye kene yo Kurinius iyei tool kuto mai be matan kala tana mai Siria ye i.
3Le nga di tooltool le imot yo tiyepe ye malala kidi diedi nga, ngan timulumulu pang ye malala kidi tapdi, a be la titar edi.
4Ngan Yosep tani in ipa ye rara ke Dawiti. Le nga imadit ye malala Nasaret ke tana mai Galili a ilo pang Yudia ye malala mai ke Dawiti, yo ene Betlem i.
5Ngan Yosep tani in ikaua Madia, yo titarkala panga be iyooloo, in a yaru tilo be lo titar edi ilo ye rau lapau. Bong ye kene tani, in Madia kapono maiyoko ke pasuiungu oo.
6Le nga yaru tiyepe Betlem go, inbe lal yo be Madia ipasuiu natunu ye i, in pombe,
7ngan le ipasuiu natunu tamoto mumuanga. Motong la iduku ye wam, inbe ipatakeno du ye koror yo titar kaningi kidi asara ilo ye i, in lono, yesoo rumu yo ke di lowo nga, ngan ipon le imot.
8Ye ni tani in di tooltool pattu tiyepe ke diki ke malala mai tani, a nen ngan be bong ngan matadi kala di asara kidi yo edi sipsip nga.
9Motong la bangabangana ke Tool Mai atu in idu pombe pang ye di, inbe Tool Mai nunngana ilangarai di le titattadai mai san.
10Bong ngan bangabangana tani in iwete pang di nen, “Oi, kin katattadai be! Kapalongo, au i akaua bingi dook mata pang la asi nga. Bingi dook mata tani in ole iyei di tooltool nga le imot le lodi ponana welewele.
11Nookoot bong katai i, garup atu ipasuiu natunu malala mai ke Dawiti. Ngan kase tani in Tool Mai Kirisi yo muku ngan Maro itara betanga medana ye be ole ikau ang le imot a ipamulang ye so dook tiap tani yo be igarungang i.
12Inbe tarkilanga ki yo be lomim galanga ye, in nen. Ole kakamata kase atu yo tiduku ye wam, inbe tipatakeno du iken koror lono yo titar kaningi kidi asara ilo ye i.”
13Bangabangana ke Maro tani in iwete nen a imot, ngan le pattu leu inbe di bangabangana ke Maro liliti mai tipa ke malala ke Maro a tisi ye bangabangana tani a tikodo, inbe tiyitmaka Maro ene. Tiyei ne,
14“Tayitmaka Tool Mai Maro yo iyepe ete i, in ene. Inbe di tooltool ke tana yo Maro lono pang di mai san nga, ngan ole ikaua lo silene ki pang di a tiyepe ye.”
15Motong la di bangabangana ke Maro tina ngan tiyege di sila tiyepe, inbe timulu a tilo pang ye malala ke Maro. Le taun di tooltool yo matadi kala di asara nga, ngan timadit le tiyei ne, “Oo, nga ole talo pang Betlem a lo takamata so tani yo pombe ni a Tool Mai iweta paidi i.”
16Le nga tipa tarai a tilo, ngan le lo tikamata Madia iye Yosep inbe kase mitiap tani yo tipatakeno du ikenen koror lono i.
17Tikamata kase tani a imot, motong la tiwete tomonai betanga tina yo bangabangana ke Maro in iwete pang di ye kase mitiap tani nga.
18Ngan nen le di tooltool le imot yo tilongo betanga kidi tooltool yo matadi kala di asara nga, ngan titakrai ye.
19Bong Madia in itar betanga tina ngan le imot lo lono, inbe lon kaua urata ye.
20Motong di tooltool yo matadi kala di asara ngan timulu pang ye urata kidi mulu, inbe tiyitmaka Maro ene le ilo ete. Yesoo, lodi ponana ye so le imot yo tilongo inbe tikamata nga, ngan le kanono moolmool ben tina yo bangabangana ke Maro iwete pang di ye nga.
21Ngan ke limi be ru iman a ila, le ye ke limi be tol ki, motong la titoo momo kidi Yuda a be tikoro kase mitiap tani in tinini, inbe tisu ene ye Yesu nga. Ngan ene tani in bangabangana ke Maro iweta muku pang Madia, motong la kapono ye nga.
22Motong la tiyepe le ilo ye lal ke be Yosep iye Madia titoo betanga yo iken ye ger ke Maro yo ikap pang Mose nga, a be tikarata di le tinidi igalanga ye Maro matana. Le nga yaru tikaua natudi tani a tilo pang Yerusalem, be lo titara kase tani lo Tool Mai baene,
23ben tina Ger ke Tool Mai iwete nga. Ngan iwete nen, “Di kakase tamoto mumuanga le imot yo tinadi tipasui di nga, ngan be tikap di pang Tool Mai.”
24Le nga yaru tilo lo titoo Ger ke Tool Mai yo iweta a tiwode lo ye rau be tiparoro “bal utu ru, too bal kase ru” panga i.
25Ye kene tani in tool atu yo iyepe Yerusalem, in ene la Simion i. Ngan ya in tool noonoonoo, inbe igaua lono le atu pang Maro. Inbe Maro Amunu Silene ipamede be iyepe a inam le lo ikamata tool yo Maro ipootoo be ole iyei di tooltool ke Isrel le lodi iken dook mata i.
26Inbe muku ngan Maro Amunu Silene iwete panga nen, be ole iyepe nen le ikamata Tool Mai Kirisi yo Maro ipamede betanga medana ye i, ngan la be imata nga.
27Nen le Simion tani in Maro Amunu idiwidiwoo be imadit a ilo pang koonoo lono ke bareme mai ke sungunu. Motong la Yosep iye Madia tikaua natudi Yesu a tilo bareme mai ke sungunu lono, in lapau, a be tiyei urata le titoo betanga tina yo Ger ke Maro iwete be tiyei nga.
28Ngan nen le Simion tani in ikaua kase tani le isipoo ye baene, inbe itada pang ete be iwete lo ponana ki pang Maro ye. Iyei ne,
29“Oo Tool Mai, au i akamata so kanono moolmool ye matak, ben tina yo kutara betanga medana ye pau nga, le be nen ngan kumalum pau, au kapraingi kiong, a amata nookoot nga, ngan lok ponana.
30Yesoo, nookoot nga akamata tool yo be ipamulam ye so dook tiap tani yo be igarungam i, in ye matak oo.
31Ngan tool tani yo kupootoo be iyei urata tani i, in pombe mallangana ye di tooltool nga le imot matadi.
32Ya in ben sul loloana, le ole nunngana ilangarai di tooltool yo tipa ye rara kidi Yuda tiap a be tikamata ni ye, inbe ole di tooltool tipayit di tooltool kiong ke Isrel edi ye.”
33Ngan nen le Yesu tamana le tinana tilongo betanga ke Simion tina yo iwete nga, le yaru lodi belebele leu ye.
34Motong la Simion ipamede di ye betanga dook mata, inbe iwete pang Yesu tinana Madia nen, “Kase i, Maro ya taunu la itaru i, a be nen iyei di tooltool ke Isrel, le alunu la be tiwala muridi pang Maro a irautoo di, inbe alunu la be titara lodi medana pang Maro a iyitmak di nga. Maro itaru be iyei tarkilanga panga, bong di tooltool alunu ole tiyei ben koi ki.
35Ngan la ole so tina iken sollono ye di tooltool lodi nga, ngan ole ise le iken mallangana. Inbe ong taum in ole lom massingi ye dawa ben pul matana la be isopala lom i.”
36Garup atu yo itoko urata ben Maro koonoo i, in ene la Ana i. Ya in Panuel natunu garup, inbe ya in ipa ye rara ke Aser. Muku ngan ikere le iye nintooroo tiyepe ye rai limi be ru. Motong nintooroo imata a iyei tap a iyepe sokorai le se rai ki 84 a iyei konga ki taunu. Ngan Ana tani in iyege bareme mai ke sungunu pitiap yege, bong ye ke le bong, ngan iyepe bareme mai ke sungunu lono be ipatarau a isung pang Maro. Inbe ye lal kapala ngan ole isapa ye kaningi so, inbe ipas le ipatarau leu.
38Ngan ye kene yo Yosep iye Madia tikaua Yesu a tilo bareme mai ke sungunu lono nga, ngan ya lapau iyepe. Le iman ikodo potai ye di, inbe iwete lo ponana ki pang Maro. Inbe igasa kase tani in pang di tooltool le imot yo titar matadi a tinama Maro be ipamulu di tooltool ke Yerusalem nga.
39Yosep iye Madia tiyei so le imot yo Ger ke Tool Mai iwete be tiyei, ngan a imot, motong la timulu a tidu pang tana mai Galili, pang ye malala mai kidi tapdi yo Nasaret i.
40Motong la kase tani in kene idik mulu le gurana ki mai. Inbe Maro ipaponi ye lo galanga le lon galanga dook mata san, inbe Maro lono panga le iyeii dook mata lapau.
41Ye rai kanakana nga, ngan Yesu di tamana le tinana tilo pang Yerusalem ye gaongo mai kidi Yuda yo tiwete ene ye Paskimoolooningi ke Maro i.
42Le nga tiyepe a Yesu rai ki sangaul be balana ru, motong la di tamana le tinana titoo momo ke lal mai kidi Yuda tani le tikaua Yesu lapau a tiye tilo pang Yerusalem.
43Ngan tilo tiyepe ye lal ke Paskimoolooningi tani in a imot, motong la Yesu di tamana le tinana be timulu pang malala kidi. Ngan kase mai tiap tani yo Yesu i, in sila iyepe nango la Yerusalem ngo, bong tamana le tinana lodi galanga ye yo sila iyepe, ngan tiap.
44Yaru tiyeisa o iye di diedi kapala ngan tipa. Le nga yaru tipa ye ke atu a tidu. Motong la yaru tisere, a titortor di rara kidi le di tooltool kidi kapala ye nga.
45Bong yaru mala be tipuske tiap, motong la timulu pang Yerusalem be lo matadi saraii.
46Ngan yaru tikaua urata mai san ye serenge le lo ke tol ki, motong la tipuske Yesu tani yo iyepe bareme mai ke sungunu lono nga. Ya in iye di pannoongoo tiwur a ilongo betanga kidi, inbe itor panin di ye betanga kapala.
47Ngan di tooltool yo tilongo Yesu tani in irau betanga kidi kuto maimai tina ngan dook mata nga, le nga titakrai ye lo galanga ki.
48Inbe di tamana le tinana tina ngan tikamata le titakrai welewele ye lapau. Motong la tinana iwete panga nen, “Alei natuk, nga yelei be kuyei dada nen pam nga? Au i aye tamam nga lomam modoko yong, le amkaua urata mai san ye serengong.”
49Motong la Yesu itor di nen, “Nga yelei be angru kaserau nga? Angru nga lomim galanga yau nen o ke be ayepe ye ni san mulu tiap, bong be ayepe ye rumu ke Tamak leu.”
50Bong yaru lodi galanga ye betanga yo iweta i, in lono ki tiap.
51Motong la Yesu iye di timulu a tidu pang Nasaret du tiyepe, inbe ipas le itoo betanga ke di tamana le tinana leu. Bong tinana in itar so tina ngan le imot lo lono, inbe lon kaua urata ye.
52Ngan Yesu kene idik mulu le iyei tool maiyoko, inbe lo galanga ki ise le mai. Inbe Maro lono dook mata panga, inbe di tooltool le imot lodi dook mata panga lapau.
