1Te Jisasgo aga wali asobo we bidibolo po begelai po me pusali. “Dagego sesemane sogo Godibolo gedu haluasa po weyu, nono meniama, tagalidali weyu, eno e po begelai po dagebolo pusubao,” wali.
2Jisasgo te po wali, “Te be nani mede te po tų dodolobo bidi me deli bidali. Te bidigo Godide wi isąyu, we bidide me wi isąyu bidali.
3Tama te be nanide te bidi isai wilawe we me deli bidali. Tama te wilawe we te po tų dodolobo bidi pageba asidu geali. Asiyu, ‘Nago eno po tų odao, eno boi bidigo po aiyaba elaluaibao,’ te po wagasidu geali.
4Tama te po tų dodolobo bidi hauwa sogo te wilawe wego wali pode ‘Menio’ wedu gebadi yali. Tiali goli, nosali aga homu begeleyu, aga homugo koneama, te po wali, ‘Eno God me, bidi me wi isąbadi goli,
5e we hauwa sogo asidu gebaso, eno aga po tų odama, tau mawaibao. Eno aga tau magi menigi sogo da, teda aga sesemane sogo asiyu, eno bomo sia sagi dao,’ te homu yali,” Jisasgo te po wali.
6Tama Genuai Bidi Jisasgo te po wali, “Dagego te gagea pai po tų dodolobo bidigo wali po odiąo.
7Te God aga sa muani we bidi augwaligo ulade me, hulide me aga hanalu wabo si, te God agai augwali tau magowe, ma magobewe? Agai bobenu bidama, tau sogowe?
8Eno dagebolo obao, menio, augwaligo hanalu wabo po agai odoyu, tama te tau sabo bodolu asobo si, agai tau mawaibao. Tiali goli, ena Godigo Bidi Mu ena e tǫba ma asobo si, enaba homu kolesaga mani we bidi eno sugowe?” Jisasgo te po wali.
9Te Jisas agai po begelai po me pusali. Te we bidi me badu augwaligo te tiwai homu yali, ‘Da naga doloba pai we bidi mu dao. Tiali goli, gasa we bidi tigidali te dwai we bidi dao,’ augwaligo te homu yali. Tama te homu yali we bidibolo Jisasgo e po begelai po pusali.
10Agai te po wali, “Te bidi si te Moni Lotu Be tempel be tomoba pali, Godibolo augwa po omainu yai. Te bidi me te Farisi hani bidi da. Bidi me, te gavman takis sabo bidi dao.
11Tama te Farisi hani bidi doligulama, aga homu tomode te po wali, ‘O God, ena da te gasa bidi dabe tiwai meni baso, eno nagebolo nage usu dao obao. Gasa bage augwaligo doado bage pesa ebo dao. Augwaligo te gavmanigo bomo yai po sela sąbo dao. Augwaligo penani ebo dao. Ena da u takis sabo bidi tiwai meni baso, eno nagebolo nage usu dao obao.
12Te Sarere deli tomode si sogo ena tubo nai gisilibo dao. Tama eno doado bage nogo si selama, te me deli nagebolo mabo dao, me badu nogo a olama, me badu nogo me si me si ena sabo dao,’ te Farisi hani bidigo te po wali.”
13“Tiali goli, te gavman takis sabo bidi digibulu uba doligi pelama, tama aga gedugo dagaluba ogwaba tonalubeo. Ena dwai dwai sę yalio te homu eyu, homu dene eyu, aga hagawiaba nogogo eledu bidali. Agai te po wali, ‘God, enade homu dene eyu, tau mao. Ena dwai dwai sę ebo bidi dao,’ te po wali.
14Eno dagebolo obao, e bidi aga beba ma peyu, Godigo aga yali dwai sę sela sąwai bidi dao. U Farisi hani bidi te tiwai menio. Mena bidigo te aga nogi me ugwaba sobaso, Godigo te bidi aiyaba elaluaibao. Ma, mena bidi imilasa bidibaso, teda Godigo te bidigo nogi ugwaba saibao,” Jisasgo te po wali.
15Te we bidi augwa wai puluba Jisas pageba magasali. Augwaligo agabolo te po wai hagede, ‘Nago nogo e wai puluba tobolude munama, bugagia bidabo po wao.’ Tiali goli, te Jisas wali pabo bagego te wai puluba dabe sela asobo sulama, tama te we bidibolo “Te sę ebo tagalao” po wali.
16Tiali goli, Jisasgo te wai puluba aga pageba i wali, te aga wali pabo bidi dabebolo te po wai, “Te wai puluba enaba asomainao. Tagala wagio. Eno wabo po e wai pulubago odalio. Te baso augwaligo ena tia sali. Tama te tobage homu ebo we bidi augwali Godigo we bidi tonalubo madigi tomoba asagameo. Konealuao.
17Ogwa dali wegi dali augwaligo Godigo wabo po odama, tia sali. Tama te tobage homu isąwai we bidi augwali Godigo we bidi tonalubo madigi tomoba pogobeo,” Jisasgo te po wai.
18Te Juda dabe tomode bidai nogi yai bidi me Jisas pageba asali. Agai Jisas hanalu wali, “Po ola mabo dwagi yai bidi, eno mena sę ebaso, ena tigidali sogo bidibo ula selama bidaibawe, ma gamonabo ula selama, bidada paibawe?” wali.
19Tama Jisasgo te bidigo po wei ponoyu, te po hanalu wali, “Enabolo magi baso dwagi yai bidi waliwe? Te dwagi yai bidi me menio. Te God deli naga te dwagi yai bidi dao.
20Nago te Godigo mani bomo yai po koneani. Te bomo yai po te da, penani sę egio, bidi ela mugio, bidi nai wi sigio, tibo po wagio, naga aya ida nogi ugwaba sao,” Jisasgo te po wali.
21Tama te nogi yai bidigo te po wei ponani, “Ao, ena gesi ogwade bidibadi, te bomo yai po te eno wali pabo gagalali. Tama wali pelama, megi me tama te pode me bidibao,” wali.
22Te Jisasgo te bidigo wali po odama, tama agabolo te po wali, “Magi nai me deli elalubuo, te sę nago ebeo. Nago beba pelama, naga doado bage tigidali selama, maketba munama, tama gasa bidi dabego abelaibao. Tama te doado bagede sali mone sobaso, te nai meni yai we bidi dobayao. Nago te sę ebaso, Godigo bidibo madide nago doado bage hauwa mu elaluaibao, nosali. Tama nago te sę elama, nage ena wali asao,” Jisasgo te po wali.
23Tiali goli, te nogi yai bidi agai Jisasgo wali po odama, aga homu sęgę mu yali. Magi baso meni. Agai sibage me, doado bage me, kisu delalubo, te nai tagalogobeo.
24Tama Jisasgo te bidi aga homu sęgę mu ebo suyu, te po wali, “Te walu hauwa munalubo we bidi, sibage hauwa munalubo bidi, augwali Godigo bomo tomoba pai hagede, te moni sinabo sę mu yaibao, tabiaibao.
25Te moni kibu kamel te ugwa hobolobo medabu agabele tomodu dula pabo si, teda sinabo sę eyu, tabigobeo, te masigi hauwa kisu munalubo bidi Godigo bomo tomo dologoba dula pai hagede, moni sę mu yaibao, tabiaibao,” Jisasgo te po wali.
26Jisasgo wali po odali we bidi noma siyu, augwaligo aga hanalu, te po wali, “Tama tibaso, Godigo mena we bidi ma dobola somainogo usu yaibawe?”
27Jisasgo te po wei ponani, “Te sę ebo, bidigo te sę yabo usu egobeo, te Godigo te sę ebo usu yaibao.”
28Tama te bidi nogi Pita agai Jisasbolo te po wali, “Suao. Dago be dabe tagalama, nage wali asobao,” wali.
29“Ao,” Jisasgo wali, “tama eno dagebolo e po obao, bidi mego aga be dabe, aga we, aga ama dede, aga ida aya, aga wai puluba tagalama, Godigo we bidi tonalubo sę tobade,
30tama te bidigo te tagalali nai genuai mu ma saibao, e tǫde bidibo sogode. Agai nosali sabo nai te polobadu tagalali nai te edelaibao. Tama nosali aga bida bida paibao, gamonaibao,” Jisasgo te po wali.
31Te Jisasgo aga wali asobo bidi nogo si olama, sągą me badu si selama, augwali te we bidi tagalama, augwa tedali bidali. Agai augwalibolo te po wali, “Edao. Da Jerusalem be naniba pobao. Tama da tede bidibadi, te polobadu bidai bidi dabego enade asęani po mu po pedelaibao. Ena da Godigo Bidi Mu dao. Augwaligo te Godigo enade wali po asęani, te po mu po pedelaibao, Jerusalem be nanide.
32Te Juda dabe augwaligo ena te Juda hani isąwai bagego nogoba mawaibao. Tama menama, te Juda hani isąwai bagego enabolo usu saibao, dwai po weyu, ena tigiba pesa sąwaibao.
33Augwaligo kibu wali bigo ena tudi badu elaibao. Tama augwaligo ena ela muaibao. Tiali goli, giliga sela sogo elama, ena ma hodaluaibao, bidaibao,” Jisasgo te po wali.
34Jisasgo te po olama, aga wali asobo bidi augwaligo te po page gisiga konebeo. Te po page geme dualali, tama Jisasgo magi naibolo waliwe augwaligo konebe.
35Te Jisas tųdu pobadi yaide, te dwasianu taun nogi Jeriko te pąba sabolama, te gedu widai bidi deli te tų sesegede dulaluyu, masigi gonodu bidali.
36Tama te gedu widai bidi agai te we bidi hauwa ela soabo u wabo odama, te po hanalu wali, “Magi ebawe?” wali.
37Tama augwaligo agabolo wali, “Te Nasaret bulu bidi nogi Jisas ela sobao,” wali.
38Te gedu widai bidigo i wali, “Jisas, te polobadu nogi yai bidi Devitgo Ogwa. Nage enade homu dene eyu, tau mao,” wali.
39Te polalubo bidi dabe augwaligo agabolo “Te po tagalao, sagia sao,” wali. Tiali goli, agai bomonama ma i wali, “Devitgo Ogwa, enade homu dene eyu, tau mao.”
40Tama tibaso, Jisas bilibo tagalali. “Te gedu widai bidi nogo tolasa asao,” wali. Tama te gedu widai bidi Jisas pąba asama, tama Jisasgo hanalu wali, “Nage eno magi sę emainuwe?”
41Te gedu widai bidigo po wei ponani, “Genuai Bidi, nago eno gedu ma dodolobaso, te eno gedu ma bulu ula bolo ma sueibao,” wali.
42Tama Jisasgo te po wali, “Suao. Nago enade tia sobaso, nago gedu dwagi yai ma ilai dao,” wali.
43Polo te bidigo gedu si dwagi yai ma pedelalio. Agai Godigo nogi ogwaba siyu, Jisas wali pabo gagalali. Tama te we bidi augwaligo Jisasgo agade yali sę sulama, tama augwaligo me Godigo nogi ogwaba sali.
