1Jabi quince año bo jatiquë tsi quiha romanoba chama-chamaria Tiberió nohiria bo yonaniquë jaa ri. Jasca, ja namá tsi jodioba mai Poncio Pilató yonani quiha ja bax na. Jasca, chama Tiberio bax Galilea mai Herodés yonani quiha jaa ri. Jasca, Iturea, Traconite, tihi cabo yonani quiha Herodes noma Felipe. Chama Lisaniás Abilinia mai yonani quiha.
2Jasca, arati ibo-iboria bo Anás, Caifás tihi cabo ini quiha. Jatsi toatiyá tsi quiha Zacariás baquë Juan qui Dios Chani joniquë. Xabachá tsi racahi Juan ini quiha.
3Jatsi ani Jordán tapaí ca racahai ca nohiria bo qui Dios Chani Juán yoabonaniquë. Yoabonahax jato qui ja nëcaniquë: —Ashimahacaxëti xo nohiria bo. Mato jocha quima Dios quiri bësocana, mato jocha masahacano ra —i nohiria bo qui ja ni quiha.
4Jabi Juán acai ca yoati tsi Isaías yamabo chaniniquë ja quënëni cato ó no. Jabi siri tsi ja quënëni ca tsi xo naa: “Xabacha xo tsi quënaxëhi quiha. Quënahax, ‘Rohahuahacacana, Ibo johai ca quëshpi na’ ixëhi quiha. ‘Bahi mëstë ca acana ja bax coti.
5Rëahacaxëti quiha quini bo. Michorohacaxëti quiha tëmachi bo. Mëstëhuahacaxëti quiha yoro ca iti bo. Parahuahacaxëti quiha bahi yoi cabo. Toca tsi rohahuahacaxëti quiha mato shinana ra, Ibo johai ca quëshpi na.
6Jasca, Dios xabahamati quinia jisxëhi quiha carayanabo ri, naa nohiria tëquë’ nëcaxëhi quiha”. Jabi nëca tsi Isaías yamabá quënëni quiha Juan yoati na.
7Jatsi huëstima ca nohiria Juan qui bëcaniquë ashimahacaxëna. Jato ja yoani ca tsi xo naa: —Quiaxëni caba xocobo xo mato ra. Tsëquëti basima tsi xo nohiria qui Dios caxahai ca bari ra. ¿Tsohuë mato yobani, Dios caxa quima ax jabati?
8¿Mato jocha quima Dios quiri ma bësoha pa? No tsayano. Jariapari tsi jabi paxa ca ma jismaxëti xo. “No xabahamahacaxëti xo, Abraham yamaba chahitaxocobo no nori quëshpi na” iyamatsicana. Mato mëbiti mëtsama xo Abraham yamabo ra. Tsayacahuë. Naa maxax bo biti mëtsa xo Dios, Abraham xocobo yoi bo axëna iquia ra.
9Jatsi quiniacaxëcahuë. Mato copipaimaria xo Dios ra. Bimi jia ca pi jihuí saihuayamano tsi toa jihui rëraxëhi quiha ibo. Rëraxo tsi chihi qui niahi quiha. Jatsi jabi paxa ca ma saihuaxëti xo —nëa tsi nohiria bo qui Juan nëcaniquë.
10Jatsi, —¿Jënahuaxëhi ni noa ra? —i Juan qui nohiria niquë.
11Jatsi Juán jato quëbiniquë: —¿Dos ca sahuëti jaya ni mato? Dos ca pi jayaquí tsi noitiria ca qui huësti ca acana. ¿Huëstima ni mato oriquiti? Huëstima pi jayahi tsi huëtsa bo ya xatënacana —i quiha jato qui Juan niquë.
12Jatsi impuesto bicanaibo, naa nohiria qui anoma cabo bëcaniquë ashimahacaxëna. —¿Jënahuaxëhi ni noa, maestró? —i Juan qui jaca niquë jato ri.
13Jatsi, —Gobierno qui nohiriá mëati ca parata roha bicana. Huino ca biyamacahuë —i jato qui Juan niquë.
14Jatsi soldado bá nicaniquë: —¿Jënahuaxëhi ni noa ra? —iquiina. Jato ja quëbiniquë: —Nohiria roayamacana parata bixëna. Mato sueldo quëshpi tsi ranicana —iquiina.
15Toatiyá tsi Xabahamati Ibo ó nohiria bo pasohi ini quiha. Ja quëshpi tsi jato Cristo Juan iqui ca ja quëscahuajahuacani quiha.
16Japi jato tëquë qui Juan nëcaniquë: —Jënë́ tsi mato ashimaquia. Jama, joxëhi quiha ëa oquëria cato ra. Ea tsi xo oquë yama cato. Espíritu Santó tsi, naa chihi iquiria cató tsi mato ashimaxëhi quiha.
17Joxo tsi jahuë́-na bo tsëcaxëhi quiha, ja otohai ca qui ja jicocano iquish na. Jama, trigo xaca jascaria tsi nocatimaxëni ca chihi qui yoixëni cabo niaxëhi quiha mëshoxëna —nëa tsi Juán nëcaniquë Jesu yoati na.
18Dios Chani yoapama tsi huëstima tsi nohiria Juán yobaniquë, Dios quiri ja bësocano iquish na.
19Jasca, chama Herodes pasomaha Juán chanipaoniquë, jahuë noma ahui ja bini iqui na. Jabi jahuë noma ahuini, naa Herodías icanai ca ja bini quiha, jahuë ahui iti. Jasca, huëstima ca yoi ca Herodés ani quiha. Jahuë jabi quiha.
20Jatsi pë preso qui Herodés Juan nanëniquë. Anoma toa joni iniquë ra.
21Nohiria tëquë ashimahacayoquë tsi quiha Jesu ashimahacaniquë jaa ri. Bëhoxjano tsi quiha nai japëquëniquë.
22Jatsi ja qui Espíritu Santo botëniquë; boto jisiria ja nori. Jatsi, —Noho Baquë yoi xo mia. Mia noiquia. Ea ranihuaqui mia ra —i quiha naipá ca joi niquë.
23Jabi treinta año bo quiha Jesú jayaniquë, jahuë yonoco ja chitahëhuaquë no. Jabi José baquë ja nori ca quëscahua nohiria bá huaniquë.
24José jahëpa Elí iniquë. Elí jahëpa Matat iniquë. Matat jahëpa Leví iniquë. Leví jahëpa Melqui iniquë. Melqui jahëpa Jana iniquë. Jana jahëpa José iniquë.
25José jahëpa Matatías iniquë. Matatías jahëpa Amós iniquë. Amós jahëpa Nahum iniquë. Nahum jahëpa Esli iniquë. Esli jahëpa Nagai iniquë.
26Nagai jahëpa Maat iniquë. Maat jahëpa Matatías iniquë. Matatías jahëpa Semei iniquë. Semei jahëpa José iniquë. José jahëpa Judá iniquë.
27Judá jahëpa Joana iniquë. Joana jahëpa Resa iniquë. Resa jahëpa Zorobabel iniquë. Zorobabel jahëpa Salatiel iniquë. Salatiel jahëpa Neri iniquë.
28Neri jahëpa Melqui iniquë. Melqui jahëpa Adi iniquë. Adi jahëpa Cosam iniquë. Cosam jahëpa Elmodam iniquë. Elmodam jahëpa Er iniquë.
29Er jahëpa Josué iniquë. Josué jahëpa Eliezer iniquë. Eliezer jahëpa Jorim iniquë. Jorim jahëpa Matat iniquë.
30Matat jahëpa Leví iniquë. Leví jahëpa Simeón iniquë. Simeón jahëpa Judá iniquë. Judá jahëpa José iniquë. José jahëpa Jonán iniquë. Jonán jahëpa Eliaquim iniquë.
31Eliaquim jahëpa Melea iniquë. Melea jahëpa Mainán iniquë. Mainán jahëpa Matata iniquë. Matata jahëpa Natán iniquë. Natán jahëpa David iniquë.
32David jahëpa Isaí iniquë. Isaí jahëpa Obed iniquë. Obed jahëpa Booz iniquë. Booz jahëpa Salmón iniquë. Salmón jahëpa Naasón iniquë.
33Naasón jahëpa Aminadab iniquë. Aminadab jahëpa Aram iniquë. Aram jahëpa Esrom iniquë. Esrom jahëpa Fares iniquë. Fares jahëpa Judá iniquë.
34Judá jahëpa Jacob iniquë. Jacob jahëpa Isaac iniquë. Isaac jahëpa Abraham iniquë. Abraham jahëpa Taré iniquë. Taré jahëpa Nacor iniquë.
35Nacor jahëpa Serug iniquë. Serug jahëpa Ragau iniquë. Ragau jahëpa Peleg iniquë. Peleg jahëpa Heber iniquë. Heber jahëpa Sala iniquë.
36Sala jahëpa Cainán iniquë. Cainán jahëpa Arfaxad iniquë. Arfaxad jahëpa Sem iniquë. Sem jahëpa Noé iniquë. Noé jahëpa Lamec iniquë.
37Lamec jahëpa Matusalén iniquë. Matusalén jahëpa Enoc iniquë. Enoc jahëpa Jared iniquë. Jared jahëpa Mahalaleel iniquë. Mahalaleel jahëpa Cainán iniquë.
38Cainán jahëpa Enós iniquë. Enós jahëpa Set iniquë. Set jahëpa Adán iniquë. Adán jahëpa Dios iniquë.
