Lucas 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Ri Jesús xebꞌutzuꞌ pan ri bꞌeyomabꞌ echiriꞌ kakiya ri kiqasaꞌn chupa ri kaxa re qasaꞌn pa ri Rocho Dios.

²Y xril kꞌu jun ixoq malkaꞌn lik nibꞌaꞌ echiriꞌ xuya chupa ri kaxa kaꞌibꞌ raltaq ko meyo lik na kꞌi ta rajil.

³Ekꞌu ri Jesús xubꞌiꞌij: —Paqatzij wi kambꞌiꞌij chiwe, chwach ri Dios wa jun ixoq nibꞌaꞌ y malkaꞌn e ne xuya más chwa ri xkiya konoje.

⁴Ma konoje xa e xkiya ruwiꞌ ri kipuaq; noꞌj wiꞌxoq tobꞌ lik nibꞌaꞌ e xuya ronoje ri puaq kꞌo rukꞌ, waꞌ e re kuloqꞌ ri lik kajawax che —xcha ri Jesús.

⁵Chiriꞌ kꞌu riꞌ e kꞌo jujun kechꞌaꞌt chwi ri Rocho Dios, kakibꞌiꞌij lik chom uꞌanom rukꞌ taq ri chomilaj abꞌaj y rukꞌ taq ri chomilaj wiqibꞌal yaꞌtal kuma ri tikawex. Ekꞌu ri Jesús xubꞌiꞌij chike:

⁶—Kakꞌun kꞌu ri qꞌij echiriꞌ ronoje wa kitzutzaꞌ, kawulixik; jekꞌulaꞌ, na kakanaj ta chi juna abꞌaj puwiꞌ jun chik —xchaꞌ.

⁷Tekꞌuchiriꞌ xkitzꞌonoj che ri Jesús, jewaꞌ xkibꞌiꞌij: —Qajawal, ¿jampa nawi kuꞌana taq riꞌ waꞌ? ¿Yey saꞌ ri kꞌutubꞌal kilitajik echiriꞌ kuꞌanaꞌ? —xechaꞌ.

⁸Ri Jesús xubꞌiꞌij kꞌu chike: —Lik chichajij iwibꞌ chaꞌ na kixsokotaj taj; ma e kꞌi ri kekꞌunik y xa kakichiqꞌimaj uwach ri nubꞌiꞌ, jewaꞌ kakibꞌiꞌij: “In ri Cristo, Ruchaꞌoꞌn lo ri Dios, yey lik xa naqaj chi kꞌo wi lo ruqꞌijol ri nutaqanik,” kechaꞌ. Noꞌj riꞌix mixterej bꞌi chikij.

⁹Y echiriꞌ kito kꞌo chꞌaꞌoj y ketukuk ri winaq che ruwachulew, mixiꞌij iwibꞌ che. Ma lik chirajawaxik nabꞌe na kuꞌana na ronoje waꞌ, noꞌj kꞌamajaꞌ ne riꞌ ri kꞌisbꞌal re ruwachulew —xchaꞌ.

¹⁰Xubꞌiꞌij kꞌu chike: «Ekꞌo tinamit keyaktaj chikij jujun chik tinamit y e kꞌo taqanelabꞌ keyaktaj chikij jujun chik taqanelabꞌ.

¹¹Kuꞌan nimaq taq kabꞌraqan. Che ukꞌiyal luwar che ruwachulew kape numik y yabꞌil pakiwi ri tikawex. Yey che ruwa kaj kilitaj nimaq taq kꞌutubꞌal xibꞌibꞌal uwach.

¹²»Pero chwach taq kꞌu riꞌ waꞌ, riꞌix kitij na kꞌax ruma ikojom ri nubꞌiꞌ, kixchapik y kixternabꞌex rukꞌ kꞌax, kixyaꞌ pakiqꞌabꞌ raj wach re ri sinagogas chaꞌ rike kakiqꞌat tzij piwiꞌ y kixkꞌam bꞌi pa cárcel, kixkꞌam bꞌi chikiwach ri reyes y chikiwach ri taqanelabꞌ.

¹³Jekꞌuriꞌlaꞌ, utz kiqꞌalajisaj ri Utzilaj Tzij chikiwach.

¹⁴Mixok il che saꞌ rukꞌulik uwach kiꞌano echiriꞌ kitoꞌ iwibꞌ chikiwach rike;

¹⁵ma e riꞌin kinyaꞌw ichꞌaꞌtem yey inaꞌoj chaꞌ konoje ri tzel kebꞌilow iwe na kakiriq ta chi ukꞌulik uwach chiwe.

¹⁶»Yey kixyaꞌ ne pa qꞌatbꞌal tzij kuma richu-iqaw, kuma taq riwatz-ichaqꞌ, kuma taq ri kꞌo chux chiwe y kuma ri iwamigos. Y jujun chiwe keyaꞌ pa kamik.

¹⁷Lik kꞌu tzel kixil kuma taq ri winaq ruma ikojom ri nubꞌiꞌ.

¹⁸Na rukꞌ ta kꞌu riꞌ, mubꞌisoj ikꞌuꞌx ma ix kꞌo puqꞌabꞌ ri Dios y na jinta ne tobꞌ xa juna iwiꞌ kasachik.

¹⁹Ma we kichꞌij uchuqꞌabꞌ ronoje, kikꞌul na ri kolobꞌetajik y ri kꞌaslemal na jinta utaqexik.

²⁰»Echiriꞌ kiwil ri soldados kakijeq kakisut rij ri tinamit Jerusalem, chiwetaꞌmaj kꞌut e riꞌ kopon ri qꞌij kawulix ri tinamit.

²¹Ekꞌu ri winaq e kꞌo pa ri luwar re Judea, chebꞌanimaj ubꞌi chwa taq juyubꞌ; y ri e kꞌo chupa ri tinamit Jerusalem chebꞌelubꞌi; yey ri e kꞌo pa juyubꞌ, mebꞌok chi lo Jerusalem,

²²ma waꞌ e uqꞌijol qꞌatbꞌal tzij, echiriꞌ kuꞌanaꞌ janipa ri tzꞌibꞌital chupa Rutzij Upixabꞌ ri Dios puwi waꞌ.

²³Chupa taq kꞌu laꞌ la qꞌij, lik toqꞌoꞌ kiwach ri e yewaꞌ ixoqibꞌ y ri ketzꞌumtisanik, ma lik saꞌch ri nimaq kꞌaxkꞌobꞌik kape che ruwachulew ruma ri royowal ri Dios chikij waꞌ wa tinamit.

²⁴»Lik e kꞌi ri kekamisax rukꞌ espada y e kꞌi kekꞌam bꞌi chi presoyil pa jujun chik tinamit che ronoje ruwachulew. Yey ri tinamit Jerusalem kakꞌojiꞌ kꞌu pakiqꞌabꞌ ri na e ta aj Israel chaꞌ ketaqan puwiꞌ, kꞌa pa kopon wi ruqꞌijol ubꞌiꞌim chi ri Dios.

²⁵»Chwa kꞌu riꞌ ri kaj kilitaj kꞌutubꞌal che ri qꞌij, che ri ikꞌ y che taq ri chꞌumil; yey taq ri winaq che ruwachulew kasach kinaꞌoj y kakijeq kakixiꞌij kibꞌ che ri nimalaj uchꞌawibꞌal ri mar y che ri yaꞌ lik kel chikaj chwi ri mar.

²⁶Keqꞌocholaj taq ri winaq, keꞌek ri kinaꞌoj y ketzaq pulew ruma xiꞌin ibꞌ che ri kꞌaxkꞌobꞌik kape che ruwachulew; ma e taq ri kꞌo kichuqꞌabꞌ che ruwa kaj keyikiyoꞌxik.

²⁷Kꞌa tekꞌuchiriꞌ kilitaj Ralaxel Chikixoꞌl Tikawex kakꞌun lo pa sutzꞌ rukꞌ ruchuqꞌabꞌ y rukꞌ runimal uchomalil.

²⁸Ekꞌuchiriꞌ kujeq kilitaj wa kꞌutubꞌal, lik chichuqꞌubꞌej iwibꞌ che royꞌexik ri ikolobꞌetajik chwa ri kꞌaxkꞌobꞌik» xcha ri Jesús.

²⁹Ri Jesús xutzijoj kꞌu wa jun kꞌambꞌal naꞌoj chike: «Chiwilape ri cheꞌ re higo y ronoje taq ri cheꞌ.

³⁰Echiriꞌ kiwilo ketuxik, iwetaꞌam xa naqaj chi kꞌo wi lo ruqꞌijol echiriꞌ kabꞌukbꞌutik y na jinta jabꞌ.

³¹Jekꞌulaꞌ echiriꞌ kiwilo kuꞌana ronoje taq waꞌ, chiwetaꞌmaj xa naqaj chi kꞌo wi lo ruqꞌijol echiriꞌ ri Dios kataqan puwi ronoje.

³²Paqatzij wi kambꞌiꞌij chiwe: E kꞌo tikawex re waꞌ wa qꞌij na kekam tana we na xkil tubꞌi ronoje waꞌ.

³³Ruwa kaj y ruwachulew xa kasach uwach, noꞌj ri nuchꞌaꞌtem na kasach ta uwach.

³⁴»Lik chichajij iwibꞌ chaꞌ na kiya ta iwibꞌ che taq ri rayinik re ri mak, che ri qꞌabꞌarik y che rubꞌis ikꞌuꞌx re ruwachulew, ma kꞌaxtaj kakꞌun lo ruqꞌijol Ralaxel Chikixoꞌl Tikawex echiriꞌ na iwoyeꞌem taj.

³⁵Ma rukꞌunibꞌal Rire chikiwach ri e kꞌo che ruwachulew, xaqikꞌateꞌt kuꞌanaꞌ, jelaꞌ pachaꞌ echiriꞌ juna awaj xaqikꞌateꞌt katzaq pa laso re kachapik.

³⁶»Mawar kꞌu iwach, xaqi e chixchꞌaꞌt rukꞌ ri Dios chaꞌ kꞌo ichuqꞌabꞌ chwa wa katajin loq y jelaꞌ taqal chiwe kixkolobꞌetaj chwach ronoje waꞌ, y na kixkꞌix ta kꞌu riꞌ kixtakꞌiꞌ chwach Ralaxel Chikixoꞌl Tikawex echiriꞌ kakꞌun loq» xchaꞌ.

³⁷Ekꞌu riꞌ ri Jesús e taq ri paqꞌij kakꞌutun pa ri Rocho Dios yey e taq ri chaqꞌabꞌ kel bꞌi keꞌkꞌola chwa ri juyubꞌ Olivos.

³⁸Y konoje ri winaq anim tan kebꞌopon chupa ri Rocho Dios chaꞌ keꞌkita ruchꞌaꞌtem ri Jesús.