1Jesúsbe nui kusrenanøb pera uniilan trenchibig køn: —Chine chinetø iløsrkøb kegørrøsrkøb attrabigwane arrumønrrai chincha katamgaig køn cha. Inchendø ¡møg waacha! tru kaigwan nø pera mara kebenøsrkøbigweimbe ¡kan maig kuaasamørra! cha.
2Trembe kan tirigu kitsig nu srugwan naashigu iløsrka, mar umbusrø kegutsig kuinguen søl købsruinrrun cha, i shushmeran kaig mara kegørrøsrkøbgunrriibe.
3Inchawei ñimdøwei ashiptø kuy cha. Ñui nuneg ñun chigøben kaig marene: “Ñi øyeeg marmumbala” cha, alegau, chibig køn. Inchen nø nui kaig mariilan isua møra, Tiusweimay llirabene, ñibe trunun yandø mas ulø paymønrrab, pesannau cha.
4Mawawan nøbe katøle, katøle siete nebumnegatig ñun kaig mara, tru kaig marimørig ñun: “Øyeeg maramgaigwan marar” chib arrubene, ñibe trunun mas ulø paymønrrab, yandø pesannamig køn— cha, trenchibig køn Jesúsbe.
5Jesús nøashib karua øriiløbe nun trenchibelø køn: —Namui isubigwan ñuinug mas tøga melaigwan nemartra— cha.
6Inchen Señorbe trencha løtabig køn: —Ñim kan murtasa yellburaptiitøguen isubigwan nainug pasra tøgar kuimbe, i sicomoro tusrwan: “Yugurri ucha, maryu ellgwawa pasrambu” chibene, tusrbe maig chiben mørøbsruinrrun cha.
7’Ñimma møikkøben, kan karuindiig megabig tøgagua arab uña, traugurrin kui, kabe ubisha ashib uña kui pubene: “¿Puraarrua, kabe yusrø manrrab wamisr” chinrraitirru? cha.
8Treeg chimøtø: “Nai mamigwanmerrig nena, pala itøgueigwan kewa, pørønawa, na chab mab, chab mutsamnegatig chi palain kuindø purørtrab ashib pasrau cha, treebe chinrrun cha. Incha trugurrimbe si, ñigucha mab, muchib inchig” chinrrun cha.
9Kabe nui karuindiig megabigwanma nø maig karuigwan maren, ¿truburø ‘ungwa’ chibelø kuitarru? cha.
10Ñimgucha treetøwei Tius maig karuigwan kerrigu marabe, trenchinrrigay chibig køn: “Nambe mendig melabelø chiguen trengatig marmeelø ker cha. Kaguende ke maig karuizhigwandø nebua marer”— cha.
11Jesús Jerusalénsrømay ippe, Samaria pirøwanba, Galilea pirøwanba pureb maywan pureb ya,
12kan yamera tsitsø pønrrabnug pubene, møguelø diezelø lepra kwanrrø asr ørø trerabig tøgar katønrrab werruppe, werrubendø, yaptø pønrramisra,
13trashibelø køn: —¡Jesús, ñi Kusrennøbig, namun lastima ashcha!— chib.
14Inchen Jesús ashabe, trenchibig køn: —Judíosmerai sacerdotesmeran eshkanrrab ambay— cha. Inchen nøm ambub pønrramnetø nømui kwanrrøbe tammisra, chishmisrikken kørrømisrøbig køn.
15Inchen møikkøsrøn nun chishmisrin kui ashabe, truba mur trashib Tiuswan truba tabig waminchib katø arruabe,
16Jesúswei merrab tømbønsra ‘ungwa, ungwa’ chib maløwan piraugatig utsøbasrøbig køn. Tru møøbe judíoguen kømøtø, samariasriig købig køn.
17Inchene Jesúsbe trenchibig køn: —¿Kwanrrøwan chishmariilø kørrømisrøbeløbe yamba diez kømmørgøppeh? cha. ¿Nueveeløbe chu ambah? cha.
18¿Mu katøgan møikken Tiuswan maya nuguen tabig køn chib waminchab arrumuben, i peg pirausriitø Tiuswan ‘ungwa’ chinrrab arru chindah?— cha.
19Incha tru møwane trenchibig køn: —Kurra, inrrø cha. Kaguende ñui isubigwan nainuutø pasra tøgagúikkurri tabig kørrømisran— cha.
20Fariseosmera Jesúswan Tius nø ashib karub wainuguiibe chu ura punrrerah cha, payen, Jesúsbe trencha løtabig køn: —Tius nø ashib karub wainuguig pubiibe kaptøga ke asha kønrrai attrabikkucha kømøn cha.
21Kabe: “Yu pasran” chimøwei: “Uyu pasran” chimøwei inchun cha. Kaguen Tius nø ashib karub wainuguiibe ñimui umbuguen pasran— cha.
22Incha nui kusrenanøb pera uniilane trenchibig køn: —Na, Møg Misra Arrubig ñimui utu unin kwalømmera, katø kan kwalømzhiitøguen pumønrrabmab, ñim isum kwaløm attrun cha. Inchendø treebe asamig kaanrrun chibig køn.
23Ñimun: “Yu pasran” tantø: “Uyu pasran” tantø indingucha, ashchab ammøwei, mendig ammøwei inchigay cha.
24Kaguen kan palaig pilabig kandarø srømbalasrøngurri katøgandarøsrø kebilab lataitøwei, tru Møg Misra Arrubig arrub kwalømbe treeg kønrrun chibig køn.
25Inchen treeg pumøwatøbe, nabe chigøben marinab, kaashib indig kømig nebunrrun cha, møi misaamera.
26Noé tsub kwalømmerawan maig purayaibe tru Møg Misra Arrubigwein kwalømmerawangucha treetøwei purainrrun cha.
27Misaamerabe chi isumø mab, muchib, kasharab, kasharanøb inchib kuig køn cha, Noé nui nu barcoyu kebib kwalømgatig. Inchen sre kwarømíig pub menda, mayeelanba chab pinisaig købig køn cha.
28Katø Lot tsub uras chigucha treetøweim purayaig køn cha. Misaamerabe chi isumø mab, muchib, penab, yanøb, ellmarøb yamera marøb inchib købenba,
29Lot Sodoma ciudayugurri yandø webibene, srømbalasrøngurri naaba, azufreba sre pua, mayeelan patsø pinisaig købig køn cha.
30Na, Møg Misra Arrubig kenamisrøb kwalømgucha treetøwein kønrrun chibig køn.
31’Tru kwalømbe ya pala wambig wabiibe, yaambu chigøben tøgaguabe, wesranrrab kørraarrumøta cha. Inchen møikkøben trau uñibiibe, yamay arrumøta cha.
32Lotwei srawanma ñimguen isuy chibig køn.
33Inchen møikkøben chigøben køben kwamønrrab inchibiibe pinab pinamig nebunrrun cha. Trune tru kwawa pinabiibe nui øsig kømigwan esegawa tøgagønrrun cha.
34’Inchawei nabe trendamønrrun: Tru arrub yembe pailø kan camayutø kib warøben, kane pera yaig køben, kane kørrømarig kønrrun cha.
35Katø ishumburmera pailø kitsøsrugu kichib køben, kanune srua iben, kane kørrømarig kønrrun cha.
36Møguelø pailø trau warøben, kane pera yaig køben, kanune kørrømarig kønrrun— cha, trenchibig køn.
37Inchen iigwan mørabe, nømbe payibelø køn: —¿Señor, øyeebe churre purainrrerah?— cha. Inchene Jesúsbe trencha løtabig køn: —Kwaig chu tsubene, truyu kallinasumera tulundzunønrrun— cha.
