Lucas 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Ana juindukunti betsatian fariseo xanen ibun jiwe anuxun Jesúsun jabetan piaya fariseo betsabun uiainbun

²Jesúsun besuudi juni betsa jawen yuda jene ichai xaxaima tenei tsauawen taexun

³Moisin keneni yusinananmisbu inun fariseobu unanti wakin Jesúsun jatu yukakin: —Jaska Diosun Moisés yusini chibankinan, ¿juindukuntitian xuxawati yununimen? ¿Yunuama inidaka? Ea yuikanwen—

⁴jatu wabia pes jawa yuiama maniabun juni jawen yuda jene ichai xaxaima tsaua metsunxun xuxawatan nichian kaya

⁵fariseobu Jesúsun ana jatu yuikin: —¿Matubunan, juindukuntitianbiaken min bake kasmai min ina awa unpax biti kini medan kauana uinsama jawaida kain min nexeismamen?— jatu wa

⁶jatu xabakabi chiteawen taea jawa yuiamabumaken

⁷janua fariseobun jiwe anuxun jatu pimakatsi jatu ia betsabu binunun ika xanen ibu dapi baxti ikatsis ikaibu uinkin Jesúsun jatu yusinkin:

⁸—Ja ainyankin nawa wai anu min jua pinun ika xanen ibu dapi baxti iyamakanwen. Jamen mia dukun xanen ibu dapi min baxti iken xanen ibu betsa mia binua juken

⁹jiwe ibuan mia yunukin: “Janu ikama uani iwe. Jau betsa janu inun ukedi xekexunwen”, akin mia mebinkiki. Mia jaska wa dakejaidai benikain jawen jenei baxti ixun min pixanaii.

¹⁰Jakia mia kayabis iwanxun jawen jenei man baxti ika dakaken jiwe ibun mia uinkin yuikin: “Baa, ja xanen ibu dapi ikiyuwe”, iwanan, mia yunuikiki. Mia jaska watan mibetan piaibu mikidi jatu pe shinanmaxanikiki.

¹¹Jabiaskadi wakin tsuada ibubis kenmis Diosun dake waxanikiki. Jakia tsuada ibubis keinsma Diosun kenwanxanikiki. Ninkaidakanwen— iwanan,

¹²jiwe ibun pimabiaxu jadi Jesúsun yuikin: —Min duapawen kupikin jau mia chipu pimadiaxanunbun pimakin min jaibuaibu inun, min betsabu inun, minabu betsa inun, mabuya mia dapi jiweabu besti jatu iyamakubainxanwen.

¹³Jakia nuitapaibu jatu ixun pimakin jawaumabu inun yuda babunibu inun, pakebu inun, bekunbu medabewakin min jatu duawaya

¹⁴jaska waxun mia ixun jabundi mia pimatidubumawen taexun pepabu mawa ana besteaintian min pepawen Epa Diosun mia manakua min benimaxanaii— akaya

¹⁵jaska wai dakaxun ninkabaikin betsan Jesúsbetan pikin Jesús yuikin: —Dios xanen ibuaitianan, chanima tsuabunda jabetan pidan, jabe benimajaidaxankanikiki— aka

¹⁶januxun Jesúsun miyuiwen yuikin: —Juni betsan nawakin piti wakatsis ikin ichapabu yubashina

¹⁷ma janu pia kemaitian jawen tsuma yuikin: “Jatu yuibauntanwen, jau ikis bedinunbunan”, iwanan, yunua yuikubaunaya

¹⁸dasibibu bepadamekin ja dukuntun yuikin: “Bai wakatsi juni betsan bai en bianxuki. En ja uinyuikai en jabetan piyuamaki, ea yuixunyutanwen”, ikaya

¹⁹ja kachu betsandi yuikin: “Jawen dayati ina awa meken dabeti en dama bixuki. Jatu unanun, ixun iyunun ika en jabetan piyuamaki, ixuki, akin ea yuixuntanwen”, ikaya

²⁰januxun betsandi yuikin: “En dama ainyanxuki. Jaskawen taea en yudanwanyuai ea yuixunyutanwen”, aka

²¹ninkatani chintunkidan jawen xanen ibu jaskakanxu dasibi yuia sinatakin ana jawen tsuma yunukin: “Nukun mae anu jiweabu bai jatiubuma inun bai ewapabuwen benabaunkin nuitapaibu inun, yuda babunibu inun, nia chakabubu inun, bekunbu jatu itanwen, jau ebetan pi benunbunan”, aka

²²kaxun jatu itankin jawen xanen ibu yuikin: “Min ea yunua en abiaxu min nawati dintu medan ichai texke idiabumaki. ¿Jaska wapa?” aka

²³“En jiwe anu jau ichai texke iki benunbun nukun mae dapi jiweabu daya jayabiabun jatu bikawakin jatu ea ixuntanwen, jau piyui benunbunan.

²⁴Chanima jabu dukun en yubashinabun en piti piabumaki”, akin jawen tsuma yuiniki. Dios xanen ibunun badiaitianan, Diosun jabiaskadi waxanikiki— akin Jesúsun jatu yusinikiaki.

²⁵Januxun yuda ichapabun jawen jancha tapinkin chibainbu dabekekauan Jesúsun jatu yusinkin yuikin:

²⁶—Tsuada eki chiti ikatsis ikinan, jau ea dukun bechipaikin chibankubainxanunbunwen. Jamen ja dukun jawen ibubu inun, jawen ain inun, jawen bakebu inun, jawen betsabu inun, jawen puibu bechipaikin jeneama inun, jawen jiwea bechipaikin jeneamadi ea bechipaikin binumamadan, en tsuma itudumaki.

²⁷Ja inun, tsuabunda ea chibanun ibiai ewen bika tenekatsi ikamadan, en tsuma itidumaki.

²⁸Jamen betsan ea chibankatsi ikinan, man eska shinantiduki. Matun bai nemaki janu mapekea nixun uinbaunti keyatapa wakatsis ikin, ¿en pei damenkain? iwanan, jawen kadu tanakin man shinanmiski.

²⁹Jakia man jaska wama janu mapekea nixun uinbaunti min taewaima min keyutidumawen taexun juni betsan mia usankin

³⁰yuikin: “Jaska jawen kadu shinandiamabia ja unainsmapatun ja dukun janu mapekea nixun uinbaunti taewaima jaska waxun menetidumaki”, mia watidubuki.

³¹Jamen betsadan, jaki sinatakin nawa xanen ibu betsan 20,000 soldadobu iweai nemakatsi jawen soldadobu yunudiama shinankin yuikin: “¿En 10,000 soldadobun jawen 20,000 soldadobu maematidumen?” ixun atidubuma unantan ja dapi bediabuma jaska wakin daewatidu jau yukatanunbun jawen tsumabu yunumiski.

³³Jaska keskadi wakin tsuabunda matun jamapai tibi ana shinanma jawada dasibi man jaya ana jawen nuiama bestibu man eki chiti ikubaintidubuki.

³⁴Jamen betsadan, tewekidi matu yuinun ninkakanwen. Tewe jawen nue wa peki. Jakia jawen bata keyu ka paismaken ana jaska waxun jawen min miban min pewatidubumawen taexun putamisbuki. Bestibu man jaskatiduki. Uindaxankanwen. Man pabinkiyabunan, ninkaidakanwen— jatu waya