1ᤕᤧᤛᤢ᤺ᤴ ᤕᤧᤖᤡᤜᤥ ᤕᤧᤰᤕᤰᤗᤠᤶ ᤐᤥ᤺ᤰᤂᤧᤖ ᤐᤣᤖ ᤐᤳᤇᤧ॥
2ᤂᤧᤴ ᤕᤧᤰᤕᤰᤁᤥ ᤈᤰᤁᤤ ᤔᤡᤱ ᤁᤧᤘᤠ᤺ᤵᤐᤠ ᤕᤠᤱᤛᤠᤁᤢᤴᤎᤣᤛᤠᤒᤠ ᤋᤢᤶᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤎᤡᤰ ᤘᤕᤧ॥
3ᤕᤧᤛᤢ᤺ᤴ ᤐᤣᤖ ᤐᤳᤇᤧᤸᤗᤧ ᤂᤢᤏᤧ᤹ᤀᤠᤱ ᤀᤥᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤕᤧᤛᤢᤖᤧ ᤁᤢᤀᤥᤔᤧᤳᤇᤧ ᤐᤣ. ᤁᤖ ᤋᤠᤱᤛᤠ ᤆᤥᤃᤧᤒᤠᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤎᤣ᤺ᤰᤋᤢᤀᤠᤱ ᤏᤡ᤺ᤔᤠ ᤔᤧᤛᤢᤰᤋᤢᤴ॥
4ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤋᤃᤡ ᤐᤣᤀᤠᤱ ᤕᤧᤛᤢᤖᤧ ᤁᤢᤀᤥᤔᤧᤳᤇᤧ ᤗᤠᤶᤔᤡᤸᤗᤧ ᤁᤢᤒᤣᤛᤠᤱᤒᤠ ᤐ᤺ᤳᤇᤣ᤹ᤒᤢᤱᤔᤥ ᤗᤠ᤺ᤛᤧᤀᤠᤱ ᤕᤢᤱᤛᤡᤱ॥
5ᤕᤧᤛᤢ᤺ᤴ ᤂᤧᤵᤔᤥ ᤁᤧᤖᤧᤸᤗᤧ ᤌᤥ ᤀᤥᤔᤕᤧᤀᤠᤱ ᤔᤧᤳᤋᤢ. “ᤈᤰᤁᤤᤀᤣ. ᤂᤧᤏᤧ᤹ ᤜᤠᤖᤠ ᤌᤩᤧ᤹ᤀᤥ॥ ᤀᤠᤀᤡᤴ ᤀᤡᤱᤃᤠ᤹ ᤁᤧᤜᤡᤶᤔᤥ ᤏᤧᤀᤠᤒᤠᤖᤥ॥”
6ᤜᤧᤰᤁᤣ᤺ᤸᤗᤧ ᤈᤰᤁᤤᤴ ᤕᤥ ᤌᤩᤧᤀᤠᤱ ᤁᤢᤛᤡᤖᤠ᤹ ᤐᤎᤠᤱᤌᤠᤅᤧᤖ ᤕᤧᤛᤢ᤺ᤴ ᤁᤢᤜᤡᤶᤔᤥ ᤗᤠᤱᤍᤠ᤺ᤰᤔᤠ ᤐᤡᤖᤢ॥
7ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤗᤠᤕᤥᤒᤠᤸᤗᤧ ᤁᤢᤜᤡᤶᤔᤥ ᤕᤠᤱᤎᤥ᤺ᤰᤛᤧ ᤐᤣᤖᤥ ᤑᤠ᤹ᤀᤠᤱ ᤁᤠᤏᤠᤰᤏᤠᤰ ᤔᤧᤗ᤹ᤖᤧᤖᤥ॥
8ᤕᤠᤱᤛᤡ ᤈᤰᤁᤤ᤺ᤴ ᤕᤧᤶᤛᤡᤱᤅᤠᤱ ᤍᤠᤱᤒᤠᤴ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ ᤁᤳᤋᤢᤱᤒᤠ ᤕᤠᤱᤛᤠᤁᤢᤴᤎᤣ᤺ᤴ ᤁᤢᤓᤪᤧ᤺ᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤜᤠ᤺ᤳᤋᤢᤱᤛᤡᤱᤗᤥ॥ ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ ᤀᤡᤱᤗᤧᤰ ᤔᤧᤳᤋᤢᤱᤛᤡᤱᤅᤠᤱ ᤕᤖᤡᤰ ᤕᤠᤱ ᤑᤥ᤺ᤰᤂᤢᤱᤛᤡᤱᤅᤠᤱ ᤘᤠ᤹ᤀᤠ. ᤂᤧᤱᤜᤠ᤹ ᤀᤡᤱᤃᤠ᤹ ᤗᤡᤛᤡ ᤗᤧᤱ ᤌᤠᤖᤡᤰ ᤏᤢ᤺ᤰᤋᤢᤱ ᤐᤡᤖᤢᤱᤛᤡᤱᤗᤥ॥”
9ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢ. “ᤀᤠᤀᤡᤴ ᤁᤴ ᤜᤡᤶᤛᤕᤱᤅᤡᤸᤗᤧ ᤛᤧᤴᤗᤵ ᤂᤥ᤺ᤛᤢᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤈᤰᤁᤤ᤺ᤴᤏᤠᤱ ᤀᤒᤪᤠᤜᤠᤔᤖᤧᤴᤏᤣ ᤁᤢᤔᤢ᤹ᤀᤡᤍᤠᤱᤛᤠᤖᤥ॥
10ᤔᤧᤴᤇᤠᤶᤛᤠ᤺ᤴ ᤗᤠᤕᤥᤀᤥ ᤁᤧᤔᤠᤒᤠᤜᤠ᤹ ᤁᤥ᤺ᤵᤔᤠ ᤏᤢ ᤜᤡᤱᤔᤠᤛᤡ ᤑᤠ᤹ᤀᤠᤱ ᤋᤩᤧᤒᤠᤖᤥ॥”
11ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤕᤧᤛᤢᤖᤧ ᤘᤣ᤹ᤛ᤻ᤔᤠ ᤂᤧᤍᤠ᤹ᤎᤡᤰ ᤔᤧᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤕᤖᤢᤛᤗᤧᤔ ᤏᤡ᤺ᤳᤋᤠᤱ ᤔᤧᤃᤧᤖᤧᤀᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤁᤢᤓᤠᤖᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤂᤡᤔᤥ ᤋᤠ᤺ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤕᤧᤖᤥ॥
12“ᤜᤠᤱᤃᤧᤶᤒᤠᤛᤠ᤺ᤎᤡᤰ ᤔᤠ᤺ᤱᤄᤠ ᤗᤠᤈᤣ᤹ᤀᤥ ᤜᤠᤱ ᤆᤥ᤺ᤰᤔᤠ ᤕᤢᤰ ᤂᤥ᤺ᤔᤠ ᤑᤠ᤹ᤀᤠᤱ ᤗᤠᤶᤍᤡ᤺ᤰ ᤆᤥᤃᤧᤖᤥ॥
13ᤂᤢᤏᤧ᤹ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ ᤌᤡᤒᤥ᤺ᤱ ᤁᤢᤛᤣᤘᤠᤖᤥᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤗᤳᤇᤠ ᤗᤳᤇᤠ ᤛᤠᤶᤔᤩᤠᤱ ᤕᤠᤱ ᤐᤡᤖᤢᤛᤡᤖ ᤀᤰᤂᤣ ᤔᤧᤳᤋᤢᤛᤡ. ‘ᤀᤡᤱᤃᤠ᤹ ᤔᤧᤴᤏᤢ᤺ᤱ ᤔᤧᤴᤍᤠᤀᤣ ᤌᤠᤖᤡᤰ ᤁᤸᤗᤧ ᤗᤧᤱᤜᤱ ᤆᤥᤃᤧᤶᤔᤧ᤹ᤀᤥ॥’”
14ᤁᤖ ᤁᤢᤕᤰᤕᤢᤱᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤈᤡ᤺ᤳᤋᤢᤀᤠᤱ ᤁᤢᤀᤣᤃᤠᤱ ᤁᤢᤀᤣᤃᤠᤱ “ᤁᤴ ᤔᤏᤠ᤺ᤸᤗᤧ ᤀᤠᤏᤡᤃᤧ ᤛᤶᤍᤠᤱ ᤜᤠᤱ ᤆᤥᤃᤢᤒᤠ ᤛᤡᤖᤠ᤹ ᤔᤧᤎᤠᤱᤅᤡᤴᤗᤥ” ᤔᤧᤒᤠ᤺ᤳᤋᤢᤖ ᤀᤡᤱᤛᤠᤒᤠᤜᤠ᤹ ᤔᤧᤒᤠᤱᤄᤢᤛᤡ॥
15ᤜᤧᤰᤁᤩᤠᤱ ᤂᤧᤸᤗᤧ ᤜᤠᤱᤕᤢᤰ ᤂᤥ᤺ᤛᤢᤀᤠᤱ ᤏᤢ᤺ᤰᤂᤧ ᤋᤩᤧᤖᤥ॥ ᤀᤠᤸᤗ ᤂᤢᤏᤧ᤹ ᤕᤠᤱ ᤐᤡᤖᤢᤛᤡᤒᤠ ᤁᤢᤛᤣᤘᤠᤖᤥᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤗᤧᤱᤜᤱ ᤁᤧᤈᤥᤃᤢᤶᤔᤠᤱ ᤀᤠᤰᤂᤧᤶᤔᤩᤠᤰ ᤕᤠᤱ ᤁᤧᤎᤃᤢᤶ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤛᤡ॥
16ᤌᤡᤰᤛᤡᤃᤣ᤺ᤰᤐᤠ ᤛᤣᤘᤠᤖᤥᤒᤠᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤁᤧᤕᤠᤱᤎᤡᤰᤁᤡᤸᤗᤧ ᤘᤣ᤹ ᤌᤡᤒᤥ᤺ᤱ ᤕᤠᤱ ᤌᤃᤢᤱᤅᤠᤱ ᤘᤠ᤹ᤖᤥ॥”
17ᤜᤧᤰᤁᤩᤠᤱ ᤂᤧᤸᤗᤧ ᤔᤧᤳᤋᤢ. “ᤏᤢ᤺ᤖᤧᤖᤥ ᤀᤠᤛᤣᤘᤠᤖᤥᤒᤣ. ᤛᤠ᤹ᤖᤡᤰ ᤏᤢ᤺ᤒᤠ ᤁᤧᤈᤥᤃᤢᤖᤥ᥄ ᤂᤧᤏᤧ᤹ ᤌᤡᤒᤥ᤺ᤱ ᤕᤧᤰᤕᤰ ᤛᤶᤍᤠᤱ ᤛᤢᤜᤠᤱᤃᤧᤶᤒᤠ ᤁᤧᤒᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤆᤢᤰᤛᤠ ᤐᤠ᤺ᤴᤏᤥ ᤏᤛᤠ᤺ᤴᤛᤠᤒᤠ ᤁᤧᤒᤥ᤺ᤰᤂᤧᤖᤥ॥”
18ᤜᤧᤰᤁᤩᤠᤱ ᤏᤡᤛᤡᤃᤣ᤺ᤰᤐᤠ ᤛᤣᤘᤠᤖᤥᤒᤠᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤁᤧᤕᤠᤱᤎᤡᤰᤁᤡᤸᤗᤧ ᤘᤣ᤹ ᤅᤠᤛᤡ ᤕᤠᤱ ᤌᤃᤢᤱᤅᤠᤱ ᤘᤠ᤹ᤖᤥ॥”
19ᤜᤧᤰᤁᤩᤠᤱ ᤂᤧᤴ ᤔᤧᤳᤋᤢ. “ᤂᤧᤏᤧ᤹ᤀᤠᤱ ᤅᤠᤛᤡ ᤕᤧᤰᤕᤰ ᤛᤶᤍᤠᤱ ᤛᤢᤜᤠᤱᤃᤧᤶᤒᤠ ᤁᤧᤒᤥ᤺ᤱᤗᤥ॥”
20ᤜᤧᤰᤁᤩᤠᤱ ᤛᤢᤶᤛᤡᤃᤣ᤺ᤰᤐᤠ ᤛᤣᤘᤠᤖᤥᤒᤠᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤧᤕᤠᤱᤎᤡᤰᤁᤡᤴ ᤒᤠ ᤁᤵᤔᤥ ᤘᤠ᤹ᤖᤥ. ᤁᤧᤕᤠᤱᤅᤡᤴ ᤀᤡᤱᤃᤠ᤹ ᤋᤣ᤺ᤳᤋᤥ ᤛᤢᤅᤢᤱ ᤆᤡᤰᤂᤢᤱᤅᤠᤱ ᤁᤳᤋᤢᤱᤗᤥ॥
21ᤂᤧᤏᤧ᤹ᤏᤢ ᤀᤡᤱᤃᤠ᤹ ᤁᤡᤛᤠᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤈᤡ᤺ᤵᤐᤠ ᤁᤧᤈᤥ᤺ᤰ॥ ᤂᤧᤏᤧ᤹ ᤁᤧᤶᤒᤡᤖᤢᤴᤛᤡᤴᤒᤠᤴ ᤁᤧᤏᤠ᤺ᤰᤋᤢᤛᤡ᤹. ᤁᤧᤴᤍᤣ᤺ᤛᤢᤶᤒᤠᤴ ᤁᤧᤛᤢᤵᤛᤢ᤹ᤖᤥ॥”
22ᤜᤧᤰᤁᤣ᤺ᤸᤗᤧ ᤜᤠᤱᤅᤡᤸᤗᤧ ᤂᤧᤴ ᤛᤣᤘᤠᤖᤥᤒᤠᤴ ᤔᤧᤳᤋᤢ. “ᤂᤧᤏᤧ᤹ ᤋᤠᤰᤁᤧᤓᤧ᤹ᤒᤠ ᤛᤣᤘᤠᤖᤥᤒᤣ᥄ ᤀᤠᤸᤗ ᤒᤠ ᤂᤧᤏᤧ᤹ ᤁᤧᤒᤠ᤺ᤴᤏᤥᤗᤠᤶ ᤀᤠᤵᤋᤡᤰ ᤁᤢ᤺ᤳᤏᤧ᤹ᤖᤥ॥ ᤀᤡᤱᤃᤠ᤹ ᤌᤣ ᤔᤧᤒᤡᤖᤢᤱᤅᤡᤴ ᤒᤠ ᤂᤧᤴ ᤏᤠ᤺ᤰᤋᤢᤱ. ᤌᤧᤔᤠ ᤔᤧᤍᤣ᤺ᤛᤢᤱᤅᤡᤴ ᤂᤧᤴ ᤛᤢᤵᤛᤢᤱ ᤑᤠ᤹ᤀᤠᤱ ᤂᤧᤏᤧ᤹ᤀᤣ ᤏᤡᤱᤘᤠ᤹ ᤁᤧᤃᤳᤋᤢᤖᤥ॥
23ᤜᤧᤰᤁᤣ᤺ᤸᤗᤧ ᤂᤧᤴ ᤀᤠᤕᤠᤱᤅᤡᤴ ᤌᤣᤀᤠᤱ ᤛᤡᤱᤏᤠ᤺ᤳ ᤁᤧᤃᤧᤒᤠᤜᤠ᤹ᤖᤥ ᤁᤧᤴᤕᤢᤰᤂᤢᤴ᥅ ᤀᤡᤱᤃᤠ᤹ ᤋᤩᤠᤱᤅᤡᤸᤗᤧ ᤀᤠᤕᤠᤱᤅᤡᤸᤗᤧ ᤁᤢᤛ᤻ᤛᤠᤃ ᤂᤥ᤺ᤛᤢᤱᤒᤠ ᤘᤕᤧ॥”
24ᤂᤧᤴ ᤜᤠᤱᤅᤡᤸᤗᤧ ᤂᤧᤵᤔᤥ ᤁᤧᤕᤧᤵᤐᤠᤜᤠ᤹ ᤔᤧᤳᤋᤢᤛᤡ. “ᤂᤧᤸᤗᤧ ᤁᤳᤋᤢᤒᤠ ᤕᤠᤱᤀᤡᤳᤇᤡ᤺ᤴ ᤏᤠᤵᤋᤧᤶᤔᤧ᤹ᤀᤠᤱ ᤌᤡᤒᤥ᤺ᤱ ᤕᤠᤱᤀᤡᤳᤇᤡ ᤁᤧᤃᤵᤐᤧᤴ ᤐᤡᤖᤧᤶᤔᤧ᤹ᤀᤥ॥”
25ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤸᤗᤧᤃ ᤀᤠᤴᤍᤧ᤺ᤴᤇᤠ ᤌᤡᤒᤥ᤺ᤱ ᤕᤠᤱ ᤁᤳᤋᤢᤱᤃ᥄”
26ᤜᤧᤰᤁᤣ᤺ᤸᤗᤧ ᤜᤠᤱᤅᤡᤸᤗᤧ ᤏᤥᤃᤵ ᤐᤡᤖᤢᤛᤡ. “ᤂᤧᤵᤛᤧᤶᤔᤧ᤹ᤀᤥ. ᤁᤧᤃᤵᤐᤠᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤂᤥ᤺ᤛᤢ᤹ᤖᤥ. ᤁᤖ ᤜᤠ᤺ᤳᤗᤧ ᤔᤧᤃᤳᤋᤢᤴ. ᤂᤧᤸᤗᤧ ᤁᤳᤋᤢᤒᤠᤴᤏᤠᤱ ᤏᤠᤵᤗᤥ॥
27ᤀᤠᤸᤗ ᤀᤡᤱᤃᤠ᤹ ᤂᤢᤏᤡ᤹ ᤛᤶᤍᤠᤱ ᤜᤠᤱ ᤆᤥᤃᤢᤱᤏᤡ ᤑᤠ᤹ᤀᤠᤱ ᤂᤢᤏᤡ᤹ ᤛᤡᤖᤠ᤹ ᤔᤧᤴᤎᤠᤱᤔᤏᤠᤒᤠ ᤀᤠᤏᤡᤱᤔᤡᤜᤠ᤹ ᤁᤵᤔᤥ ᤋᤠᤖᤧᤶᤛᤡᤶᤔᤧ᤹ᤀᤠᤱ ᤀᤡᤱᤃᤠ᤹ ᤀᤠᤍᤃᤡᤀᤣ ᤛᤧᤖᤧᤶᤛᤡᤶᤔᤧ᤹ᤀᤥ॥”
28ᤜᤧᤰᤁᤩᤠᤱ ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤕᤖᤢᤛᤗᤧᤔ ᤗᤧᤵᤔᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤋᤃᤡ ᤌᤠᤛᤡᤱᤗᤥ॥
29ᤜᤧᤰᤁᤩᤠᤱ ᤂᤢᤏᤧ᤹ ᤒᤧᤌᤑᤠᤃᤣ ᤏᤢ ᤒᤧᤌᤠᤏᤡ ᤐᤠᤱᤈᤢᤶᤜᤠ᤹ᤖᤧ ᤏᤡ᤺ᤳᤋᤠᤱ ᤁᤧᤖᤧᤸᤗᤧ ᤈᤤᤋᤢᤏ ᤁᤥ᤺ᤰᤔᤠᤀᤥ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤀᤰᤂᤣ ᤔᤧᤳᤋᤢᤛᤡᤖ ᤐᤠᤱᤄᤢᤛᤡ.
30“ᤂᤡᤴᤇᤡ᤹ ᤋᤃᤠᤱᤒᤠ ᤐᤠᤱᤓᤣ᤹ᤀᤥ ᤐᤣᤛᤧ᤹॥ ᤂᤧᤵᤔᤥ ᤁᤧᤗᤠ᤺ᤳᤇᤡᤸᤗᤧ ᤀᤠᤵᤑᤠᤸᤗᤧᤀᤠᤱ ᤔᤧᤴᤕᤢᤰᤁᤣ ᤁᤧᤘᤠ᤹ᤒᤠ ᤀᤍᤱᤛᤠᤎᤡᤰ ᤀᤡᤔᤧᤄᤣ᤺ᤰᤂᤢᤀᤠᤱ ᤕᤧᤵᤐᤠ ᤁᤧᤍᤢᤶᤛᤢ᤹॥ ᤂᤧᤴ ᤗᤧᤖᤧᤳᤇᤧ᤹ᤀᤠᤱ ᤁᤳᤏᤠ ᤑᤧᤳᤋᤧᤳᤇᤧ᤹॥
31ᤔᤏᤠᤜᤠ᤹ᤖᤧ ᤌᤣᤀᤠᤱ ᤁᤴ ᤀᤍᤱᤛᤠ᤺ᤴ ᤁᤧᤗᤧᤳᤇᤢᤒᤠᤒᤣ ᤑᤠ᤹ᤀᤠᤱ ᤛᤣ᤺ᤴᤃᤧᤶᤗᤠᤵᤛᤡᤏᤧ ᤑᤠ᤹ᤃᤪ ᤁᤱᤃ ᤍᤠᤱᤒᤠᤴ ᤆᤠᤜᤠᤒᤠ ᤆᤥᤃᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤔᤧᤳᤋᤧᤛᤧ᤹ᤀᤥ॥”
32ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤣᤛᤡᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤛᤧᤰᤂᤠᤀᤣ ᤀᤍᤱᤛᤠ᤺ᤴ ᤏᤡ᤺ᤛᤧᤳᤇᤢ॥
33ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤗᤧᤖᤧᤳᤇᤢᤖ ᤐᤳᤇᤧᤳᤇᤡᤸᤗᤧ ᤂᤧᤵᤔᤥ ᤁᤢᤴᤍᤠᤱᤒᤠᤜᤠ᤹ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢᤛᤡ. “ᤌᤣᤀᤠᤱ ᤁᤴ ᤀᤍᤱᤛᤠ᤺ᤴ ᤁᤧᤗᤧᤳᤇᤢᤒᤠᤒᤣ᥅”
34ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤁᤱᤃ ᤍᤠᤱᤒᤠᤴ ᤆᤠᤜᤠᤒᤠ ᤆᤥᤃᤧᤀᤠᤱ ᤘᤠ᤹ᤖᤥ॥”
35ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤀᤍᤱᤛᤠ᤺ᤴ ᤕᤧᤛᤢᤖᤥ ᤋᤠᤖᤧᤳᤇᤢᤀᤠᤱ ᤀᤍᤱᤛᤠ᤺ᤸᤗᤧ ᤁᤢᤀᤣ᤺ᤰᤁᤥ ᤂᤢᤏᤡ᤹ ᤋᤣ᤺ᤳᤜᤠ᤹ ᤔᤧᤓᤧᤛᤢ. ᤜᤧᤰᤁᤩᤠᤱ ᤕᤧᤛᤢ᤺ᤴ ᤂᤧᤴ ᤛᤶᤍᤠᤱ ᤔᤧᤕᤢᤰᤂᤢᤖᤥ॥
36ᤂᤧᤴ ᤕᤢᤰᤋᤢᤀᤠᤱ ᤐᤣ᤺ᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤣ᤺ᤳᤜᤠ᤹ ᤗᤠᤶᤔᤥ ᤔᤧᤓᤧᤛᤢᤖ ᤂᤢᤏᤧ᤹ ᤗᤠᤱᤍᤠ᤺ᤰᤔᤠ ᤔᤧᤒᤡᤖᤢᤖᤥ॥
37ᤜᤧᤰᤁᤩᤠᤱ ᤕᤧᤛᤢ᤺ᤴ ᤈᤤᤋᤢᤏ ᤁᤥ᤺ᤰᤔᤠᤀᤥᤗᤠᤶ ᤛᤱᤔᤠᤱ ᤌᤠ᤺ᤔᤠ ᤁᤧᤒᤥ᤺ᤱᤒᤠ ᤋᤧᤴᤏᤥ ᤁᤧᤵᤔᤠ ᤀᤡ᤺ᤳᤋᤧᤀᤠᤱ ᤘᤕᤧᤸᤗᤧ ᤕᤖᤡᤰ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤏᤡ᤺ᤛᤢᤒᤠᤴ ᤔᤧᤀᤡ᤺ᤳᤋᤢᤀᤠᤱ ᤔᤧᤛ᤺ᤳᤋᤧᤖ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤔᤠ ᤔᤧᤜᤣ᤺ᤰᤋᤢ–
38“ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤁᤧᤍᤠ᤺ᤒᤠ ᤜᤠᤱᤅᤡᤴ ᤔᤢ᤹ᤀᤡᤛᤠᤒᤠ ᤐᤥ᤺ᤱᤗᤖᤥ॥ ᤛᤠᤱᤃᤪᤠᤶᤐᤣᤍᤠᤱᤅᤥ ᤛᤏᤠᤖᤢᤱ ᤐᤥ᤺ᤱᤗᤖᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥ᤺ᤱᤗᤖᤥ॥”
39ᤁᤖ ᤂᤧᤵᤔᤥ ᤔᤏᤠᤗᤢᤶᤔᤥ ᤁᤧᤘᤠ᤹ᤒᤠ ᤁᤢᤓᤠ ᤑᤖᤡᤛᤡᤜᤠ᤹ᤖᤧ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ ᤁᤧᤜᤢ᤹ᤛᤠᤶᤒᤠᤜᤠ᤹ ᤜᤧᤰᤁᤣ ᤔᤧᤒᤠ᤺ᤳᤋᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤑᤧ᤺ᤰᤋᤧᤛᤧ᤹ᤀᤥ॥”
40ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤧᤵᤛᤧᤶᤔᤧ᤹ᤀᤥ. ᤂᤧᤱᤜᤠ᤹ ᤛᤫᤠ᤺ᤳ ᤔᤧᤕᤢᤱᤅᤡᤸᤗᤧᤃ ᤁᤴ ᤗᤢᤱᤜᤠ᤹ᤀᤠᤱ ᤔᤧᤛ᤺ᤳᤋᤠᤱ ᤔᤧᤒᤠ᤺ᤳ ᤔᤧᤗ᤺ᤴᤗᤥ॥”
41ᤁᤖ ᤕᤧᤛᤢ᤺ᤴ ᤕᤖᤢᤛᤗᤧᤔ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱ ᤁᤧᤖᤧᤸᤗᤧ ᤂᤧᤴ ᤕᤧᤰᤕᤰᤁᤡᤴ ᤀᤥᤔᤧᤳᤋᤢᤀᤠᤱ ᤜᤠᤒᤧ. ᤜᤧᤰᤁᤩᤠᤱ ᤀᤰᤂᤣ ᤐᤠ᤺ᤳᤋᤢ.
42“ᤀᤠᤸᤗ ᤂᤡᤏᤡ᤹ᤃ ᤛᤏᤠᤖᤢᤱ ᤂᤥ᤺ᤔᤠ ᤔᤠᤖᤠᤶᤔᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤡᤸᤗᤧ ᤐᤥ᤺ᤰᤂᤧᤒᤠᤖᤥ. ᤁᤖ ᤁᤴ ᤁᤧᤖᤧᤰᤃ ᤁᤧᤔᤡᤰᤛᤠᤀᤥᤗᤠᤶ ᤌᤣ᤺ᤰᤛᤡᤱᤒᤣᤀᤠᤱ ᤘᤠ᤹ᤖᤥ॥
43ᤀᤠᤸᤗ ᤁᤧᤏᤡᤱᤔᤡᤜᤠ᤹ᤖᤧ ᤂᤧᤏᤧ᤹ ᤁᤠᤰ ᤐᤡᤛᤠᤱᤗᤠᤶ ᤁᤧᤶᤃᤵᤐᤠᤱ ᤂᤡᤖᤡ ᤁᤧᤶᤎᤣ᤺ᤰᤁᤠᤱ ᤆᤡᤜᤢ᤹ ᤁᤧᤶᤜᤢ᤹ᤒᤠ ᤕᤧᤶ ᤋᤠᤖ ᤐᤳᤗᤥ॥
44ᤂᤧᤏᤧ᤹ ᤁᤧᤶᤕ ᤁᤧᤶᤗᤢ᤺ᤴᤏᤠᤱ ᤁᤧᤛ᤻ᤛᤠ᤺ᤜᤠ᤹ᤏᤢ ᤂᤠᤶᤔᤥ ᤁᤧᤶᤍᤱᤗᤥ॥ ᤌᤡᤰ ᤗᤢᤱ ᤛᤶᤍᤠᤱ ᤘᤣ᤹ ᤗᤢᤱᤅᤡᤴᤏᤣ ᤐᤰᤔᤧᤴᤎᤏᤧᤴ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ ᤁᤧᤛᤧ᤺ᤵᤛᤧ ᤕᤧᤒᤠ ᤛᤢᤕᤧᤶᤔᤡᤴ ᤁᤧᤏᤠ᤹ᤖᤢᤖᤥ॥”
45ᤜᤧᤰᤁᤩᤠᤱ ᤕᤧᤛᤢ᤺ᤴ ᤔᤠᤱᤜᤡᤶᤔᤥ ᤗᤠ᤺ᤛᤧᤀᤠᤱ ᤂᤧᤵᤔᤥ ᤗᤧᤱᤜᤱᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤏᤠ᤺ᤵᤔᤠ ᤗ᤺ᤵᤔᤠ ᤜᤣ᤺ᤰᤋᤢᤛᤡ. “ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. ‘ᤀᤡᤱᤃᤠ᤹ ᤀᤠᤜᤡᤶᤔᤡᤱᤃ ᤋᤢᤘᤠ ᤆᤥ᤺ᤰᤔᤠ ᤜᤡᤶ ᤐᤥ᤺ᤱ.’ ᤁᤖ ᤂᤡᤏᤡ᤹ᤃ ᤑᤠ᤺ᤴᤍᤠᤜᤠ᤹ ᤆᤡᤱᤛᤡᤱᤔᤠ ᤋᤧᤴ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤖᤥ᥄”
47ᤜᤧᤰᤁᤩᤠᤱ ᤂᤢᤏᤧ᤹ ᤌᤡᤰᤕᤠ᤺ᤴᤎᤰ ᤔᤠᤱᤜᤡᤶᤔᤥ ᤏᤡᤛᤠᤶ ᤜᤢ᤹ᤖᤢᤛᤡᤖᤥ॥ ᤁᤖ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤧ᤹ ᤛᤧᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢ.
48ᤁᤖ ᤀᤠᤵᤋᤡᤰ ᤁᤢ᤺ᤵᤔᤠ ᤐᤠ᤺ᤴ ᤌᤣᤀᤠᤱ ᤂᤧᤱᤜᤠ᤹ᤖᤧ ᤔᤧᤱᤄᤥ᤺ᤛᤢᤴ. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧᤃ ᤂᤢᤏᤧ᤹ ᤜᤢ᤹ᤖᤢᤛᤡᤒᤠ ᤏᤡᤛᤠᤶᤜᤠ᤹ ᤂᤢᤏᤡ᤹ ᤛᤡᤖᤠ᤹ ᤌᤠᤅᤧᤖ ᤔᤧᤄᤧᤵᤛᤢᤖᤥ॥
