Job 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Na Job el fahk,

²“Efu ku komtal akkeokyeyu na ke kas lomtal an?

³Pacl puspis komtal akkolukyeyu, Ac tia mwekin ke ma upa komtal oru nu sik ingan.

⁴Finne oasr ma koluk nga orala, Mea lomtal nu kac?

⁵Komtal pangon mu komtal wo likiyu, Ac nunku mu mwe keok nu sik inge akpwayei lah oasr koluk luk.

⁶Mea, komtal tiana akilen lah God pa oru ma inge? El oakiya sie sruhf in sruokyuwi.

⁷Nga arulana lain ma upa El oru inge, Tuh wanginna mwet porongeyu; Nga kwafe in oasr nununku suwohs orek nu sik, tuh wanginna mwet lohng.

⁸God El kosrala inkanek uh, ac nga tia ku in kaingla; El sang lohsr uh kosrala inkanek luk.

⁹El eisla nufon mwe kasrup luk, Ac akkolukyela inek.

¹⁰El sringil monuk oana sie mwet su kunausya sie lohm. El fusak finsrak su oan in nga, Ac filiyuwi nga in uli ac misa.

¹¹God El kasrkusrak ac arulana foloyak sik; El oreyu oana mwet lokoalok se lal ma El kwase oemeet uh.

¹²El supwama un mwet mweun lal in lainyu; Elos koaneak sisken pot luk, in mweuniyu yen nga muta we.

¹³“God El oru mwet wiuk in ngetla likiyu; Nga oana sie mwetsac nu sin mwet ma eteyu meet ah.

¹⁴Sou luk ac mwet kawuk luk elos som likiyu.

¹⁵Mwet fahsr su tuh mutwata in lohm sik elos mulkinyula; Mutan kulansap luk elos oru oana elos in tia eteyu.

¹⁶Nga fin pangon sie mwet kulansap luk, ku kwafe elan kasreyu, El ac tiana topukyu.

¹⁷Mutan kiuk uh tia ku in muteng foulin momong luk uh, Ac tamulel na pwaye luk elos tia lungse kiluku nu yuruk.

¹⁸Tulik uh elos aksruksrukeyu ac isrunyu ke pacl elos liyeyu uh.

¹⁹Mwet kawuk na pwaye luk uh angyang sik ke pacl elos liyeyu uh; Elos su nga arulana lungse yohk meet elos forla lainyu.

²⁰Kolo ke monuk uh arosrosak ac atla liki sri in monuk; Ac kutu srisrik na ngan misa.

²¹Komtal mwet kawuk luk! Tal pakomutuk! Poun God arulana sringilyuwi.

²²Efu ku komtal akkeokyeyu oana ke God El oru uh? Mea, tia fal tari lupan keok ma orek nu sik uh?

²³“Nga ke sie mwet ah in esamya kas luk inge Ac oakiya ke ma simusla in sie book ah!

²⁴Ku in kihlyak kas luk inge ke sie eot In mau oanna nwe tok.

²⁵“Tuh nga etu lah oasr sie inkusrao Su ac fah mau tuku in tuh moliyula.

²⁶Finne tukun mas luk uh kangla kolo keik uh, Ke nga srakna oan in mano se inge, nga ac fah liye God.

²⁷Nga fah liyal ke mutuk sifacna, Ac El ac fah tia sie mwetsac nu sik. “Nunak luk uh munasla mweyen komtal fahk mu,

²⁸‘Kut ac akkeokyal fuka?’ Komtal sukok sripa komtal in lainyu.

²⁹A inge, komtal in sangeng na ke cutlass Cutlass se ma ac use kasrkusrak lun God ke ma koluk uh, Tuh komtal fah etu lah oasr sie su nununku.”