1Meke olaṉa se Zobi,
2“Vea seunae gua kote vata sigiti au gamu si arau, meke va soku nau zinama?
3Ninae totoso si zama va kaleanau mo gamu si arau, meke lopu kurekure nia gamu sa ṉinovaṉovalaqu rau.
4Be hinokara tavete va sea si arau, sari sinea si qua ginugua eke mo telequ.
5Balabala ia gamu sapu leana hola nau gamu si arau, gua, meke sari qua tinasuna va sosodena sapu sea si rau, gua?
6Lopu boka dogoria tu gamu sapu e Tamasa tavetia si hie? Sa Nana sipata si vekoa Sa pude saputu vagi au.
7Velavela vura si arau, ‘Toka nau, ta sigiti hoboro qua!’ Ba loke tie si olaṉa; tioko hata tinokae si rau, ba loke tie si mae pude va toṉotia sa qua tinasuna.
8E Tamasa hukatia sa siraṉa, ke lopu boka hola si arau, na tomea Sa sa qua siraṉa pa korapa hinuporo.
9Ele vagi pani Sa sari doduru vina lavataqu, meke sa qua pozapoza leanana si huara pania Sa.
10Seke va sisigiti au Sa pa doduru vari kaliqu, Sari na qua hiniva leadi si rabutu pani Sa guana huda hoqana.
11Sa binugoro te Tamasa si ṉada mae koa rau; nae turaṉa nau Sa koari Nana kana.
12Garuni Sa sari Nana varane pude mae raza au; koa vari likohae nia rini sa qua ipi, meke varipera mae au rini.
13Qua tatamana ba va seu i Tamasa koa rau; sari na tie pu gilani rau ba lopu hiva gilanau tu.
14Sari qua tatamana si ele taloa beto, meke sari qua baere si ele muliṉi nau rini.
15Sari nabulu vineki tavetavete pa qua vetu ba muliṉi nau tugo; na tie karovoqu guni nau rini si arau.
16Tiokia rau si keke qua nabulu ba lopu olaṉau sa, tepa sisigiti ia rau pude toka nau ba korona.
17Lopu leana koasa qua barikaleqe sa humaṉana sa ṉuzuqu, meke sari tasiqu koreo ba lopu boka tata mae au.
18Sari koburu ba hakohako nau rini, pude turu zama rau si taliri taloa dia.
19Sari qua baere soti si korodia nau; meke sarini pu tataru hola ni rau ba ele kana mae au.
20Loketoṉa si rau ba na kapu meke susuri mo; boka mo ke toa si rau.
21Gamu si na qua baere! Mi tataru nau! Ura ele seke au Tamasa si arau koasa limana.
22Vea ke kaqu ṉovala au tu gamu gua sapu evaṉia Tamasa? Vegua lopu ele ṉovala va kaleana au tu gamu si rau?
23Kei, be kaiqa tie boka va nonoga i sari qua zinama, mani ta kubere gore ni pa buka!
24Uve, be ta peqo sari na qua zinama pa patu, meke kuberi pude madi koa hola,
25ba gilania rau sapu toana sa qua Tie pu kote valeana pule au, meke pa vina betona, Asa kote mae lavelave nau.
26Pa mudina ta gani beto sa kapuqu koasa minoho, sipu korapa koa qua koasa tini hie, si kaqu dogoria rau sa Tamasa.
27Kaqu dogoria rau si Asa pa mataqu soti; kei, okoro sigiti sa buloqu!
28Be zama si gamu, ‘Vegua meke kote va sigitia gita sia?’ Hata kaiqa siraṉa si gamu pude raza au.
29Ba kamahire, si mi matagutu nia sa vedara, sa vedara sapu turaṉia sa tinaṉaziri te Tamasa koa sa sinea, pude mi tumae nia sapu koa Nana si Asa pu pitui sari doduru tie.”
