Job 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Degidbali Job, Bildad-abin-imakded. Weyob sogded:

²“¿Sanagwadse bemar an-wionai guoe? ¿Sanagwadse bemar angi-sunmaknaid indakmaloe?

³Bemar angi gannar-gannar yolenanaidi, ¿bemar bingesurmarsi?

⁴Ar an nue-isgusye soglegele, angi siido, an na wargwen gunaid.

⁵Bemar bur anba dule-nuedye sogmarsunde, emide, an-isgusadba be angi dododmalad.

⁶Bemar wisgumalargebed, Bab-Dummad weyob an-imaknaid, ar Bab-Dummad e-sakigi an-gasa gunaid.

⁷”Aisaar an binnasuli gornainad: ‘¡An-oburgwebimarye!’ Dule-wargwensaale, gwen an-itosulid. An bendakleged egisnai-inigwele, gwen an-bendaksurmalad.

⁸Bab-Dummadi an-idu igar edusad, gege bar an obake gusad. An-nanaedbali negasichidbi an-idu nasiksad.

⁹Bab-Dummadi, an-ibmar-bukidar-nikadi bela an-ibe sunonikid. An-nug-dummarba-gued bela an-ibe obelononibalid.

¹⁰Sapiyobi, bela an-obelosad. An-ibmar-edarbediid, sapi-e-saila-bergusayobi an-ibe obelosad.

¹¹Bab-Dummadi nue angi dummad-urwenaid, e-isdaradga an-imaksa gunaid.

¹²Bela e-bila-onomalad an-ebiris ambikunonimalad, an-dordoneg-ebiris bukunonimalad. Napa-arsanyob-nakwemai sobsamalad degi, angi gwisgunonimalad.

¹³”Bab-Dummadi an-gwenadgan-angi-banguega imaksad, an-aimarse-bakale, angi bangudmalad.

¹⁴An-gwenadgan an-iedmalad, dule-magar-an-dakdimalad an-iedmarmogad.

¹⁵An-neggi-gudimalad aku an-dakdemalad, bunormar-anga-arbadimaladse-bakale, dule-baidiyob an-dakdemalad.

¹⁶An-maiga-gudiidse an gotedaenad, gwen an-abin-imaksurdaed. Amba ise-wilegar an gordibe, amba an-itodasulid.

¹⁷An-gaya-yapannedde gwen nabir-yapansulid, an-ome ima an-itoged. An-gwenadgan-gargwenmaladse-bakale, imasun an-daked.

¹⁸Burwiganase-bakale, angi dododmalad. An-dakarmalale, biir naddamalad.

¹⁹An-aimarbela imasar an-dakdemarmogad, an-gwenadganbela angi aibitemalad.

²⁰An-garmar bus-bus gusad, an-san bar daklesurgusad. Unnila napi an bunnodiid.

²¹An-aimar, nue-wile be an-dakmala, ar Bab-Dummad nue an-wionaid. ¡Nue-wile be an-dakmala!

²²¿Ar ibiga Bab-Dummad-an-wionaidyob bemar an-imaknaimarmoga? ¿Ar bemar an-wionanaid baisur-itomala?

²³”Bitigine an-sunmakedi gardagi narmaklegena yeerban, gardagi narmakar megisana yeerban.

²⁴An-sunmakedi akwagi degisadegu narmakar megisana yeerban, esgoro-madaregedgi degisadegu narmakar megisana yeerban.

²⁵An nue-wisid, an-Bab-Dummad-An-Ollor-Imaked dula maid. We-dule dummad-an-wilenaidgi an-ogwisguoed an nue-wisid.

²⁶An-san bela bergussundibele, amba an-ibyagwar an Bab-Dummad-dakedsegad.

²⁷Amba Bab-Dummad-dakoedi an nue-wisid, an-sunnagwad an dakoed, dule-baid dakosulid. We-ibagan an nue bela-bela edarbediid.

²⁸”Bemar sogbalid: ‘Anmar egi yolegoe, ar a-dulegi isgued nue-maid.’

²⁹Nue salakarmalo, es-suidse ibitodamalar. We-es-suidgi Bab-Dummad dule-isgana obeloged. Bemar wisgumar, Bab-Dummad anmar-wilub-daked maid.”