1Mürin, Hiop a üreni chiechian kewe,
2“Ifa ükükün fansoun ämi ariaföüüei o atatakisi lelukei ren ämi kapas?
3Fän chomong oua esitaei. Ifa usun, ousap säw ren ämi föri ngeniei mine esepwüng?
4Inamwo ika a let pwe üa mwäl, ai mwäl a chök nom woi.
5Ika oua wesewesen atekiakemi mwei o apasa, pwe ai kewe riaföü iei allükülükün pwe üa tipis,
6mürin oupwe silei pwe Kot a föri ngeniei mine esepwüng o apweli ngeniei an we cheew.
7Nengeni, üa ü ngeni ei sokun föför mi mwäl ngeniei, nge esap wor eman a pälüeniei. Üa siö pwe eman epwe alisiei, nge esap wor ai pwüng.
8Kot a pinei alei pwe üsap tongeni pwerela won, a anomu rochopwak won alei kewe.
9A angei seniei iteüöchi, a pwal angei seniei ai ling.
10A atatakisieitiu lepeki meinisin. A üttätä ai apilükülüköch usun eman a üttätä efoch irä, a likitieila pwe üpwe mäla.
11A fokun lingeringeritiei o atolongaei lon tettelin chon oputan.
12An mwichen sounfiu ra feitopök, ra senätä eu ororen maun ngeniei o pwelifeili imwei imw mangaku.
13Kot a fokun atoauala pwii kewe seniei, pacheriei kewe resap fokun chüen sileei.
14Märäri me chiechiei kewe ra likitieila,
15chokewe mi wasöla rei ra manlükieila. Nei kewe chon angang fefin ra aleaeilong lon tettelin wasöla, ngang üa wiliti eman chon ekis me rer.
16Üa kökköri nei chon angang, nge i esap pälüeniei. Üa fen mwo nge tütüngor ngeni pwe epwe alisiei, nge i esap mochen.
17Pwülüei a oput ai ngasangas, üa anou me ren wesewesen pwii kewe.
18Semirit mwo nge ra turunufaseei, ra ämängauaei, lupwen ra künaei.
19Chiechiei kewe meinisin mi kan ngeniei ra fokun oputaei, nge chokewe meinisin üa tongeer ra kul o ü ngeniei.
20Üa kichüchüla pwe ünüchei a pach ngeni chüi, ngii ra menenneniwu seni apwapwan.
21Ämi chiechiei kana, oupwe tongeei, oupwe tongeei, pun pöün Kot a awataei.
22Pwota oua tapweriei usun Kot? Ifa usun, esap naf ämi ariaföüüei?
23Amwo eman epwe chechemeni ai kewe kapas o makeeretiu lon eu puk.
24Amwo repwe rup ren efoch pen seni mächä won eu achau o ketelilong pilom lon, pwe repwe nom tori feilfeilachök.
25Ngang üa silei pwe ailei a manau, nge lon eu rän i epwe ütä won fanüfan.
26Inamwo are ünüchei a tala ren samau, nge lon inisi üpwe chök küna Kot.
27Ngang won inisi üpwe küna Kot, mesei repwe püsin küna. Ngang, nge sap eman lüki. Letipei a ekilonei ei.
28Ämi oua apasa, ‘Ousipwe tapweri. Pun i popun ewe osukosuk.’
29Iei mine oupwe niuokusiti ewe ketilas. Pun än Kot lingeringer epwe awarato apwüng ngenikemi ren ewe ketilas. Ren ei oupwe mefi pwe mi wor eu kapwüng.”
