1मिनु अय्युबमी
2“गे आं कली गेना सम्म श्येत गेनीनी? मिनु इन लोव़मी आं कली मरिम्शो सेल्नीनी?
3आं कली १० खेयप सम्म दोस गेतीनी। आं कली काइ मरिम्शो लोव़ पचा मुने मपाइनीनी?
4गो थमा पा मरिम्शो पशो बाक्ती हना यो, मेको मरिम्शो पशो आं के बाक्ब।
5थमा पा, गे आं क्येङा ठेयब दुम्चा मिम्नीनी। मिनु आं श्येत तशा, आं कली मरिम्शो सुइक्नीनी।
6परमप्रभुमी आं कली मोशा श्येत गेती। आं एर ओंथ नेल्ल ब्वारद दाइश्शो बाक्ब।
7गो ‘हुश ख्राक्श पोक्तीमी’ दे ग्रीती हना यो, आं कली लोव़ मलेप्ब। ‘वारच पाइय्यीनी’ दे पुंइता हना यो, निसाफ मताइनुङ। येरमीया २०:८; हबकुक १:२; अय्युब ३०:२०
8मेकोमी आं लां तेक्शो बाक्ब। मिनु ग्रूशा लने मचाप्नुङ। मिनु मेकोमी आं लां छिङछिङम सुम्तु। अय्युब ३:२३; बिलाप ३:७,९
9मेकोमी आं मान ततीक रोइक्ताक्यी। आं पिया रे आं सिरपेच पुइक्तु।
10मेकोम आं कली लुक्च लाइब सेल्ती। गो खतम दुम्ती। रवा तुल्शो खोदेंशो पा आं आस नेल्ल नुप्पाइक्तु।
11मेको आं पर्बम गाइक्ताक्व। मिनु आं कली आ जोरी सत्रु खोदेंशो मिम्ताक्यी। अय्युब १३:२४; अय्युब ३३:१०
12मेको आ लडाइ पाइबपुकी बुक्शा आं कली पुम्नीम। मेकोपुकीम आं ताम्बु आ एर ओंथ नेल्ल आन बाक्तीक सेल्नीम।
13मेकोम आं खिं ङा मुर आन कली आं क्येङा ङोन वोइश्शो बाक्ब। आं वारच आं कली मतुइक्ब दुम्शो बाक्नीम। भजन संग्रह ३१:१२
14आं नेक्था ङा मुर नु गो नु गारब वारच आं क्येङा ङोन दुम्तेक्म। भजन संग्रह ३८:१२
15आं खिंम पौना दुम्शा बाक्बपुकीम प्रेंताक्यीमी। आं वाइलीमपुकीम आं कली अर्को रागी ङा मुर खोदेंशो पा मतुइश्शो खोदेंशो पाइनीम।
16गो आं वाइल कली ब्रेत्नुङ। तन्न मेकोम लोव़ मलेप्ब। गो मेको कली शुश लेम्शा पुंइचा माल्नुङ।
17आं सास आं मीश कली रिना नु ग्रांग्रा दिशो दुम्शो बाक्ब। गो आं खिं ङा मुर आन कली ग्रांग्रा दिशो दुम्शो बाक्ती।
18आइक्च आलपुकीमी यो आं कली तशा ग्रांग्रा दित्नीम। मिनु आं कली तामेनु, मेकोपुकीम शुक्शी पाइनीम।
19गो नु गारब वारच नेल्लेम आं कली ग्रांग्रा दित्नीम। आं दाक्शो मुरपुकी आं पर्बम दूली पा बोक्शो बाक्नीम।
20आं के रुश नु कुशुल ला लीशो बाक्ब। गो बेक्चा चिक्शो बाक्ती।
21आं वारचपुकी, आं कली शिशी पाइय्यीनी, शिशी पाइय्यीनी। मारदे हना परमप्रभुम आं कली दिप्शा, श्येत गेशो बाक्ब।
22गेपुकीमी यो परमप्रभुमी आं कली खेदा पशो खोदेंशो पा मारदे खेदा पाइनीनी? मार, आं कली मिश ङा श्येत गेशा मरूनी?
23आं पशो लोव़ ब्रेक्शो हना, मेको किताबम ब्रेक्शो हना, रिम्शो दुम वा।
24मेको फलाम के याम मुशा नु सिसाम ब्रेक्शो हना, फुल्लुम गेना हना यो लीचा ङा पा मुशा ब्रेक्शो हना, रिम्शो दुम वा।
25तन्न आं कली श्येत रे प्रोंइब का बाक्ब। मेको नोले ङा नाक्त रागीम जाक्शा आं सांकछी दुम्ब। मेको गो तुइक्नुङ। यसैया ४१:१४; होसे १३:१४; अय्युब २६:६
26मिनु आं कुशुल राक्शा खतम दुम नोले, गो आं रांमी परमप्रभु कली ताइनुङ। भजन संग्रह १७:१५; भजन संग्रह ७३:२४
27गो मेको कली आं मिक्चीमीन आं नेक्था ताइनुङ। गो मेको तचा कली शुश रिम्ना रिम्न बाक्नुङ।
28गेपुकीम आं कली ‘एको कली दोपा खेदा पचा? मारदे हना श्येत आ शाक्श एको आ आगाम बाक्ब’ देंतीनी।
29गेपुकी तरवार क्येङा हिनीन। मारदे हना गाइश्शो आ सजाइ तरवार रे पा जाक्ब। मिनु निसाफ का बाक्ब, दे तुइक्तीन” दे अय्युबम लोव़ लेत्तीमी बाक्त।