IOBU 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Bena Iobu e haere, eto:

²Ba hahisihisigu ela bona edena nega ai? Hereva momo amo lalogu ba hadikaia rohoroho ela bona edena nega ai?

³Ini nega gwauta vada o gwau henigu. Umui ese o hadikagumu na asio hemaraimu a?

⁴Bema momokani vada na kerere, to kerere be lau sibogu latagu ai.

⁵Bema momokani ihadikagu o goadalaiamu bona egu hemarai o herevalaiamu lau ihabadelaigu,

⁶to ba diba, Dirava ese vada e hakereregu, ena huo ai vada e kougu heḡeḡe.

⁷A itaia, na boi lolomu, na tomu “E alagumu”, a ta se haeremu; na boiboi goadagoadamu, a ta ese maorogu se gwauraimu.

⁸Egu dala vada e magua ahu, basina raka hanai diba totona, egu dala danu vada e hadiburadia.

⁹Hairaigu na egu amo vada e dabuia oho, bona havava ḡauna na kwaragu amo vada e abia oho.

¹⁰Kaha iboudiai amo e hadareregumu, bena vada na manoka vaitani; egu helaro vada e raḡaia isi, au na heto.

¹¹Ena badu vada e hasiahua, lau ihadikagu; ana inai tauna ai vada e halaogu.

¹²Ena tuari taudia vada e aru hegogo e maimu, tano vada e larebaia, ituari-henigu totona; egu kalaga vada e taruhaia heḡeḡe.

¹³Tadikakagu na egu amo vada e abidia oho dauhai, bona turagu lalodia vada e hadikadia vaitani egu ai.

¹⁴Varavaragu bona turagu korikori ese vada e rakatanigu,

¹⁵egu ruma vadivadidia ese vada e lalogu boio; egu hesiai hahinedia ese idau tauna ai e halaogumu, idia vairadiai lau na idau gabu tauna.

¹⁶Egu hesiai tauna na boiriamu, to ia na se haeremu; lau udugu amo do baina noia.

¹⁷Adavagu enai lau na hedadarai ḡauna; tadikakagu korikori ese e iga-igaraigumu.

¹⁸Memero maraḡidia ese e lalogu negemu; na tore isi negadia ai, idia ese e gwau dika henigumu.

¹⁹Turagu korikori ese e dadaraigumu, bona na lalokau henidiamu taudia ese e inai henigumu.

²⁰Tau-anigu e varoda-varodamu, bona turiagu e horemu; mokona asina roho mauri.

²¹A bogagu hisi, turagu e, a bogagu hisi; badina be Dirava imana ese vada e daugu toho.

²²Dahaka dainai o hdhisigumu, Dirava ese e hahisigumu na heto? Dahaka dainai lau tau-anigu ihahisina ai lalomui do asie heḡereḡere?

²³Egu hereva bema hetore bema namo; buka ai bema hetore.

²⁴Auri vaduna bona auri metauna amo papapapa ai bema hetore, vada bema mia hanaihanai.

²⁵Badina be lau dibagu Ihamaurigu Diravana na e nohomu, bona nega dokona ai ia na tanobada ai baine gini;

²⁶bena kopigu na unu baine dika toma murinai asi hidiogu ai Dirava do baina itaia.

²⁷Ia na baina itaia, lauegu kaha ai; matagu ese ia mo bae itaia, dia idauna ta. Daragu na e dokomu.

²⁸Boma toma “Ede baita hahisia toma?” bona “Ramu na ia lalonai mia”,

²⁹to dare garina ba gari, badina be badu ese hahedika darena e mailaiamu; unu amo ba diba, dika davana na e miamu.