Yoobu 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Yoobu u seewɑ u win bɔrɔbɑ sɔ̃ɔwɑ u nɛɛ,

²sere sɑɑ yerɑ̀ i ko i n wɑ̃ɑ i n mɑn nuki sɑnkumɔ, kpɑ i n mɑn tɔ̃yɑ mɔ̀ kɑ bɛɛn ɡɑri sɑɑrinu.

³Wee yen nɔn dɑbinɑ mi, i kɑsu i mɑn wɔmɛ. I ǹ sekuru mɔwɑ i kɑ mɑn burisinɑmɔ mɛsum?

⁴Nɑ̀ n torɑn nɑ kɑ ɡem, nɛn ɡɑriyɑ.

⁵I tɑmɑɑ i mɑn dɛɛrɑm kerewɑ, kpɑ i mɑn nɛn durum sɔ̃ɔsi?

⁶I de i n yɛ̃ mɑ Gusunɔwɑ u kɑ mɑn mɔ̀. Mɑ u mɑn suremɔ win yinɑ sɔɔ.

⁷Wee, nɑ nɔɔɡiru suɑ nɑ nɛɛ, win kookoo si, su ǹ wɑ̃. Adɑmɑ ɡoo sɑri wi u mɑn wisɑ. Nɑ ɡbɑ̃rɑmɔ bu mɑn fɑɑbɑ ko, ɑdɑmɑ nɑ ǹ fɑɑbɑ wɑ.

⁸Gusunɔ u nɛn swɛɛ kpuro kɛnuɑ bɑɑmɑ. Mɑ u derɑ yɑm wɔ̃kurɑ yi wukiri sere nɑ ǹ kpɛ̃ n ɡɑm dɑ.

⁹U nɛn wirun furɔ wukɑ u nɛn bɛɛrɛ wunɑ.

¹⁰U mɑn kɔsukɑ bɑɑmɑ kpuro. Mɑ u nɛn yĩiyɔbu wunɑ nɡe dɑ̃ɑ te bɑ wukɑ.

¹¹U kɑ mɑn mɔru bɑrɑ. Mɑ u mɑn kuɑ nɡe win yibɛrɛ.

¹²Win tɑbu kowobu bɑ nɔɔ tiɑ kuɑ mɑ bɑ seewɑ bɑ mɑn wɔrim wee. Bɑ swɑɑ yɑbɑ sere bɑ kɑ mɑn ɡirɑri. Mɑ bɑ nɑ bɑ ben sɑnsɑni ɡirɑ bɑ kɑ mɑn sikerenɛ.

¹³U derɑ nɛn mɛro bisibu bɑ mɑn deri, mɑ nɛn bɔrɔbɑ bɑ yɑrinɑ.

¹⁴Nɛn berusebu bɑ mɑn biru kisi, mɑ nɛn kĩnɑsibu bɑ mɑn duɑri.

¹⁵Wee nɛn sɔbu kɑ nɛn sɔm kowobu bɑ mɑn mɛɛrɑ nɡe sɔɔ wi bɑ ǹ yɛ̃.

¹⁶Nɑ̀ n nɛn sɔm kowo sokɑ, u ku rɑ wure. Nɑ̀ n nùn suuru kɑnɑmɔ, u rɑ n mɑn ɑtɑfiiru sɑ̃ɑwɑ.

¹⁷Nɛn kurɔ u ku rɑ nɛn nuburu kɑ̃. Mɛyɑ mɑɑ nɛn bibu bɑ mɑn ɡɛmɑ.

¹⁸Kɑ mɑm bibɔ kpuro bɑ mɑn ɡɛmɑwɑ. Nɑ̀ n ɡɑri ɡeruɑ, bɑ rɑ mɑn wɔmɛwɑ.

¹⁹Be nɑ rɑ kɑ ɡerunɛn tii bɑ mɑn tusɑ. Be nɑ mɑɑ kĩ bɑ mɑn seesi.

²⁰Nɛn wɑsin yɑɑ yɑ nɛn kukunu mɑni. Wee wɛ̃siɑru tɔnɑwɑ tɑ mɑn tie.

²¹Nɛn bɔrɔbɑ, i nɛn wɔnwɔndu wɑɑwo. Domi Yinni Gusunɔwɑ u mɑn sɛɛyɑsiɑmɔ.

²²Mbɑn sɔ̃nɑ i mɑn nɑɑ swĩi nɡe mɛ Gusunɔn tii u mɑn nɑɑ swĩi. Nɔni swɑ̃ɑ te i derɑ nɑ wɑ, tɑ ǹ bɛɛ turɑ?

²³Nɑ kĩ bu nɛn ɡɑri yore tireru sɔɔ.

²⁴Kpɑ bu mɑɑ yi yore kperu sɔɔ kɑ sisu yi n wɑ̃ɑ mi, sere kɑ bɑɑdommɑɔ.

²⁵Adɑmɑ nɑ yɛ̃ mɑ nɛn yɑkio u wɑsi wi u koo rɑ se u kɑ mɑn yinɑ.

²⁶Nɛn wɑsi yì n kɔ̃sɑ yi kpɑ, sɑɑ ye sɔɔrɑ kon Gusunɔ wɑ.

²⁷Wiyɑ ko nɑ n mɛɛrɑ. Nɛn tiin nɔniyɑ yi koo nùn wɑ, n ǹ mɔ ɡooɡii. Nɛn ɡɔ̃ru ɡɑ tɛmɑnɑbu kpɑnɑmɔ yèn sɔ̃ n tɛɛmɔ.

²⁸Sɑɑ ye sɔɔ, i ko ɡere i nɛɛ, mbɑn sɔ̃nɑ i mɑn nɑɑ ɡire. Domi nɛn ɡem mu koo sɔ̃ɔsirɑ.

²⁹Adɑmɑ i n yɛ̃ mɑ Gusunɔ u koo bɛɛ siri. Yen sɔ̃, i win tɑkobi nɑsio. Domi yen sɛɛyɑsiɑbu sɛ̃.