Génesis 18

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Bab-Jehová sapimar-islidikmalad-Mamreʼgi-gwichid-dikarba Abrahamʼse magarosad. Deunni, yorukudba, Abraham e-dordoneg-yawagakgi siid.

²Abraham atakdegu, dakded, machergan-walapaa gwichi. Deyob dakdegu, Abraham abindaknaega gwichibin imaksad. Ese modapgu, a-dulemar-abin napase e-bebe-ebulegedse dulluu imaksad.

³Abraham amarga sogded: —An-dummad, an bese ise-wilesakwaa egised, melle be bakar nao. An-negse be obunnoda.

⁴Ar be nabir-itogele, an bemarga dii aminao, adi, bemar nag-enukegar. Geb a-sorba, bemar sapi-urba obunnonamaloed.

⁵Ar bemar an-neg-maid-walik-nadapsoggu, an bemar-ogannogega bemar-naed-idu an bemarga masgunned sunaoed. Dule-warbaagwad abin-sogdemalad: —Nueddo. Be-sogedbardo.

⁶Abraham gwae-gwae e-dordonegyaba-dogdegu, e-ome-Saraʼga sogded: —¡Gwaegwa! Madubur-bur-nued, nued-mergu madu-sobega be sue.

⁷Geb degi, Abraham, moli-bebe-nikamalad-bukwadse abarmakdebalid. Moli-senigwad-bur-nued, bur-san-dutugwad susad. Geb degine, dule-ega-arbaedgala uksad. Geb a-dulede, gwae yog duar-imaksad, adi, mas-gunmalagar.

⁸Abraham we-dulemar-warbaagwadga moli-san uksad, moli-nunis uksabalid. Geb degine, moli-nunis-gwamakaled ega uksabalid. Abrahamʼdi amar-sapi-urba-mas-gunbukwad, daksii gusad. Abakalegi ibmar-baigan abearbalirye binsaed.

⁹Geb dulemar-warbaagwadi Abrahamʼse egichiarmalad: —¿Bia be-ome-Sara nade? Abraham abin-sogded: —Dordonegyaba gunai.

¹⁰Geb degi, warbaagwad-wargwen sogded: —Baid-birgase gannar an bese nonibaloed. A-ibagangi, be-ome-Sara bato susugwa-nika gudioed. Ar Saraʼdi, neg-dogedyaba Abraham-yarganba dulemar-Abraham-ebo-sunmaknanaid bela itogwichid.

¹¹Dakleargua, Abraham, degi, Sara, bato nue selebagusmalad. Deginbali, Sara bato wagub-guchabalid.

¹²A-ulale, Sara allided, ulubgi binsaded: “Bato ande selebagusad, degi, an-suide selebagusmogad. Wegiid an bar dakosur-itole. ¿Ar wede sunna an bar mimmi nikuosi? Geg bar an nikued.”

¹³Ar Bab-Jehováʼdi, Abrahamʼga sogded: —¿Ar ibiga Sara alle? ¿Ar ede seredgussoggu, geg bar mimmi-nikuye binsade?

¹⁴¿Ar Bab-Jehováʼga ibmar-geg-gued nikasi? Suli. Baid-birgase gannar an bese ataknonibaloed. A-ibagangine, Sara machi-wargwen bato nikuoed.

¹⁵Sara Bab-Jehová-weyob-ibmar-soge-itoargu, Sara dobe-itoded. A-ular, osuloded, sogded: —An alle-gwissuli. Ar Bab-Jehováʼdi abin-sogded: —¡Suli! Be allisa.

¹⁶Geb a-sorba, dulemar-warbaagwad gwisgusmargu, Sodoma-neggwebursik atakdemalad. Geb degi, asik nadmarsunnad. Abraham sikwas eba nade gusmogad, adi, amarga sogega, degimaloye.

¹⁷Geb degine, Bab-Jehová binsaded: “¿Ar an ibmar-imaksokalid Abrahamʼgi an odukuode?

¹⁸Abrahamʼde dulemar-bukidarad-e-babga guosoggu, degine, dulemar-dutusulid-e-babga gubalosoggu, an ibmar-imaksokalid an ega sogergebed. Deginbali, an ega sogsabalid: ‘Begi bela we-napneggi yar-baid-baidgi-bukmaladgi an ise-nued binsaoye.’

¹⁹Deginbali, Abraham an susbalid, adi, an-igar-maidba e-mimmigan-odurdakega, degi, e-wagan-odurdakega, adi, igar-nueganba nanamalaga, degine, igar-innikigwadbi imakdii gumalagar. ”Adi, an Abrahamʼga ibmar-imakoye-sogsadba, an imakegar.”

²⁰Degisoggu, Bab-Jehová Abrahamʼga sogded: —Dulemar-e-isgued doggus wilub-obichagusad, anse binnasur gorbukmalad, sogdemalad: Sodoma-neggweburgi-bukwamaladi, degi, Gomorra-neggweburgi-bukmaladi, nue-galagwensur damalad, degine, nue-bela-belad isgus bukmalad.

²¹Degisoggu, neggweburse an amar-daknadapid, ar bule anga nabir sogmala. Ar degisulile, an-sunnad an nue-dakoed.

²²Atakdimaladi, warbogwa Sodoma-neggweburse nadmalad. Abrahamʼdi Bab-Jehová-asabin gwisgusad.

²³Geb degine, Abraham Bab-Jehováʼse walikaa naded, ega sogded: —¿Ar dule-isgudisurmalad, dule-isgudimaladba be obelogode?

²⁴”Ar dule-nuegan dulabo-gakambe (50) we-neggweburgi gudidiile, ¿amba be we-neggwebur obelogode? Ar we-dule-nuegan dulabo-gakambe (50) gudidimalad-sabed-ular, ¿we-neggwebur melle obelogodeeye be sogosurde?

²⁵Dogdar-itole, dule-ibmar-isgana-imakdisulid, dule-ibmar-isgana-imakdiidba be oburgwer. Ebobela emarbi isgusadyob be imako itole. Mer deyob be sae. Bee be, bela dule-we-napneggi-bukmaladga, igar-naboged-e-dummadsoggu, ¿igar-innikii maidba be imakosurde? Eye. Be igar-innikii maidba imakoed.”

²⁶Geb degine, Bab-Jehová abin-sogded: —Ar e-dulabo-gakambe (50) dule-nuegan Sodoma-neggweburgi gudidiile, amar-ular Sodoma-neggwebur an obelogosulid.

²⁷Ar Abrahamʼdi gannar Bab-Jehováʼga sogdebalid: —Dummad, bese nue-wilesakwaa an egised, ar bedi Dummadid, andi dule-binsaledid.

²⁸Igidibe, dule-nuegan dulabo-gakambe-guega (50), e-walatar-napile. ¿Amba walatar-napid-ular, bela Sodoma-neggwebur be obelogode? Bab-Jehová Abraham-abin sogded: —Ar we-neggweburgi dulabo-gakatar (45) dule-nuegan amba wis gudiile, an obelogosulid.

²⁹Gannar Abraham sogdebalid: —¿Ar unnila dulabo (40) dule-nuegan gudiile, bela Sodoma-neggwebur be obelogode? Bab-Jehová abin-sogded: —A-dule-nuegan-dulabogwad-ular (40), we-neggwebur an obelogosulid.

³⁰Ar Abrahamʼdi gannar Bab-Jehováʼga sogdebalid: —Dummad, gannar-gannar an bega ibmar-sognaidgi, melle be isdar an-itogo. Ar unnila dulagwen-gakambe (30), dule-nuegan gudidiile, ¿bela Sodoma-neggwebur be obelogode? Bab-Jehová gannar abin-sogdebalid: —Ar we-neggweburgi unnila dulagwen-gakambe-gudidimalad-ular (30) an obelogosulid.

³¹Abraham sogdebalid: —Dummad, weyob an bega sunmakewilubsulinad, degi-inigwele, ¿we igi-balile, unnila dulagwen (20) dule-nuegan we-neggweburgi gudiir? Bab-Jehová Abraham-abin sogdebalid: —Amar-dulagwenad-ular (20), we-neggwebur an obelogosulid.

³²Amba Abraham gannar sogdebalid: —Dummad, wis an bese egis, melle be isdar an-itogo. Napi an bega soge. A-sorba, bar an bega ibmar sogosulid: ¿Igi be imaksale, unnila warambe (10) dule-nuegan gudiir? Bab-Jehová Abraham-abin sogded: —Ar dule-warambegwad-ulale (10), an we-neggwebur obelogosulid.

³³Bab-Jehová, Abraham-ebo-sunmaked-bergusgu, na naded. Abrahamʼdi gannar e-dordoneg-siidse nonikid.