Jenesis-Agafa 18

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Abrahamu'a zgemo tusi amuho higeno Mamrea oak zafa agafare seri noma'a kasante mani'negeno, Ra Anumzamo anante ehnati'ne.

²Seri noma'a kasante mani'nereti kesga huno keana, taregi magoki vahe oti'nageno keteno, aga reno viazamo zamagaf'i ome arena areno kepri huno,

³anage hu'ne, Ranimoka nagrama knare nehanugenka musema nehusunka, eri'za vaheka'a maninogu muse (plis) hugantoanki nagaterenka e'ovuo!

⁴Muse (plis) hurmantoanki mani'nenkena osia tina afi'za eme tamina tamaga sese hugahazanki ama zafa agafare manigsa hiho.

⁵Ana nehanage'na osi'a ne'za uri'na eme taminena neneta manifru huteta kama vnarega vugahaze. Eri'za vahekamona noni'a kasante nantu ante nante'nagu ne'zana neteta vugahaze higeno, knareki kema hanaza huo hu'za hu'naze.

⁶Anage hzageno Abrahamu'a noma'afi mrerino nenaro Sera asmi'no knare hu'nesnia flaua tgufa kevu urinka breti eme tro hunka kro,

⁷nehuno Abrahamu'a agareno vuno bulimaka'afinti anenta afu ome aheno eri'za vahe'a eme amigeno, hantka huno erino ome kre'ne.

⁸Abrahamu'a meme'mofo ami rima'a tagino eme ante nezmanteno, hagi ko'ma kragefe'neama'a erino, kaone eme ante zamanteno tva'onte zafa agafare otino mani'nege'za ne'naze.

⁹Nene'za mani'ne'za Abrahamuna amanage hu'za antahige'naze, Negnaro Sera iga mani'ne? Hazageno ami seri nompi mani'ne huno hu'ne.

¹⁰Mago'mo amanage huno hu'ne, henka'a ama ana knare'ma esnuana negnaro Sera'a ne' mofavre kasentegahie. Huno nehigeno agu'afi Sera'a seri no kasama'are mani'neno ana ke antahi'ne.

¹¹Abrahamuke ozafa tvava rakeno, kafu zanimo agaterege'ne, Sera'a mofavre antega osu'negeno avufgamo ampasgigeno mani'ne.

¹²Sera ana ke nentahino agu'afi kiza nereno amanage huno agesa antahi'ne, nagrane ranimo enena ozafa tvava renoanki, inankna huno mofavre fore hunaminogu nehie?

¹³Ra Anumzamo Abrahamuna antahige'ne, Nahigeno Sera'a kiza nereno, tvavamo'na mofavre ksenteku hugeno nehie?

¹⁴Nazamo Ra Anumzamofona amuho huntegahie? Ete esanua knarera, ama ana knare anaga'a kfufina Sera'a ne' mofavre ksentegahie.

¹⁵Sera'a amano vazigeno havige huno, a'o kiza ore nogenka nehane huno higeno, Anumzamo huno a'o kagra kiza re'nane huno hu'ne.

¹⁶Ana tagufa vahe'mo'za oti'za vunaku nehu'za Sodomu kuma me'nea kaziga zamurga negageno (Abrahamu kantega ome zamatreteno enaku nevigeno),

¹⁷Ra Anumzamo amanage hu'ne, menima hunaku'ma nehuazana Abrahamu avurera fraki snufi?

¹⁸Tamage huno Abrahamumpinti tusi'a hanvenentake vahe fore hu'za kuma ante'za manigahaze, ama mopafina mika kumate vahe'mo'za agripinti asomura erigahazanki,

¹⁹Nagra maka vahepinti Abrahamuna agi hu'na Mofavre'ane, agehe'ine, avempage huzmasamina fatgo hu'za nemniza knare'zanke nehu'za Ra Anumzamofo kante vnazegu huhampri'noe. Hagi Ra Anumzamo'na huvempa hu'noa ke'mofo avufga'a fore hanigu Abrahamuna huhampri'noe.

²⁰Anantera Ra Anumzamo amanage hu'ne, Sodom Gomora vahe'mokizmi tusi'a kumizmimofo kezanke antahue, hankino kumi'zmimo'a tusi'a zampi mreri'ne.

²¹E'ina hu'nagu Nagra menina urami'na ome kena antahina hanue. Zamagenke'a antahi'nomofona vu'na ome zamage'na antahi'nue, huno hu'ne.

²²Anage nehige'ne tare netre moke rukrahe hu'ne Sodomu kaziga vu'na'e. Nevakeno Abrahamu'a anante Ra Anumzane oti'ne.

²³Abrahamu'a egofta huno Ra Anumzamofo antahige'ne, Ana kumapina fatgo vahe'ene, hazenke vahe'ene mani'nazana ana maka zamahe fanane hugahano?

²⁴50ti'a ana kumate fatgo vahe mani'nesazana, ana 50ti'a fatgo vaheku zamahoke henka ana kumara zamahe fnane osugahano?

²⁵E'i kagri kavu kvara omne'ne, havi vahe'ene, ftago vahe'enema ahe fnane hankeno, havi vahe'ene, fatgo vahe'ene mago'zahu knazana e'origahaze. Mika mopafi vahe'mota refko nehana nemoka mago'zanke hunka refko nehane.

²⁶Hankino, Anumzamo amanage hu'ne, Nagra'ma kesugeno'ma 50ti'a fatgo vahe'ma Sodomu ran kumapima mani'nesazana ana mika rankumara zamagriku hu'na zamahe fanane osugahue.

²⁷Anante Abrahamu antahige'ne, Nagra kugupage hu'na tanefake vahe'mo'na Ra Anumzamokane naneke nehue.

²⁸Hanki 50ti'a fatgo vahe mani'nesafinti 5fu'a omnisagenka knare ama ana mika rankumara zmazeri havizana hugahampi? Higeno ete ke nona'a huno amanage hu'ne, kesugenoma 45fu'a fatgo vahe'ma mani'nesage'na Nagra zmazeri haviza osugahue.

²⁹Abrahamu mago'ene antahige'no, 40ti'a fatgo vahe maninesagenka knare zamahe fanane hugahano? Higeno ete ke nona'a huno amanage hu'ne, kesugenoma 40ti'a fatgo vahe'ma mani'nesage'na Nagra zmazeri haviza osugahue.

³⁰Abrahamu mago'ene amanage hu'ne, Ra Anumzamoka krimpa aheonanto arune, ke hugahuanki 30ti'a fatgo vahe mani'nesagenka knare zamazeri havizana hugahano? Higeno ete ke nona'a huno amanage hu'ne, Kesugenoma 30ti'a fatgo vahe'ma mani'nesage'na Nagra zamazeri haviza osugahue.

³¹Abrahamu mago'ene hanve e'nerino Ra Anumzamofo antahige'ne, 20ti'a vahe mani'nesagenka knare zamahe fanane hugahano? Higeno ke nona'a huno amanage hu'ne, kesugenoma 20ti'a vahe'ma mani'nesage'na Nagra zamazeri haviza osugahue.

³²Abrahamu anage hu'ne, Ra Anumzamoka krimpa aheonanto, magoke zupa kantahigegahue, 10ni'a vahe mani'nesagenka knare zamahe fanane hugahano? Higeno ete ke nona'a huno amanage hu'ne, kesugenoma 10ni'a fatgo vahe'ma mani'nesagena Nagra zamazeri haviza osugahue.

³³Anumzamo Abrahamu'ene keaga huvgama nereno'a atreno vigeno, Abrahamu'a kuma'arega ete vu'ne.