1Ba Bada Abraham kurina i rerematara, Mamre keyamisi kaikaposi gaburisi yai, kona ana gweda matamketa parinai kao borabora wai i makira i mamana.
2I tarakata wai sebasebare asi tonu parinai si bimsiri. Ba yagiyagina wata ana gweda matamketanai i kasibau iverabeyisi, ba i pepeta i gakira ku tano.
3Ba i wona, “Abisiri yai ko kinaniku gaireku wai au Bada, kega ami saibisaibirina kona vera kupukupusi.
4Ba okowa yoginaikei ana botuwei kata, kaemi kona bosusuwana ba niko keyama wakunai koni yakam.
5Karaku yona ko botu ami saibisaibirina kurina wai, awaika kesana ana bobunagi kona kani koni maragata. Ba meke mena ko nenae wai kata kona nae.” Kosi si kaobeyei, “I gaire saki. Awaika kui sisiyei wai, ke wosei.”
6Ba Abraham yagiyagina i riu ku gweda kamona Sarah kurina. Ba i wona, “Yagiyagina am flour gairena ku terei e mamana wai, ke tabiri, ke terei ina ruruwi ba bread ke kapuni.”
7Ba Abraham i nae cow yabona simamana wai, natuna budobudona kesana i bowai ba, ana saibisaibirina i berei kata yagiyagina wata ita bobunagi.
8Damanina ba mona ba susu ba, cow natuna si bobunaga wai, i botuwei naosi yai i terei, ba keyama gaburinai i potapotaisi ba si kam.
9Ba si toirubai, “Kaowam Sarah wai memena?” Ba i wona, “Noi, gweda kamonai.”
10Damanina ba Bada i wona, “Nawaravi 9 murinai ana veramaga mena wai kaowam Sarah, ini tuwa sebare.” Ba Sarah wai gweda matam ketanai i nonora, ba kona wai murinai.
11Abraham ba Sarah wai si morapa saki. Ba Sarah bituwa boduna i tupasairei wai, kega rubana iti tuwa.
12Kata Sarah ikesina i nota meyei wai i maniba, i wona, “A bovedevediku ba au bada i morapa saki, kata niko nuwagairena ana wainei kona?”
13Damanina ba Bada Abraham kurina i wona, “Awaika kairavina Sarah i maniba ba i wona, ‘A morapa saki ba kade ani tuwa?’
14Kata Bada kurina wai awaika kesana padapadana kona? Niko maranai nawaravi 9 murinai ana veramaga mena wai Sarah ini tuwa, natuna sebare.”
15Saba Sarah i nagara wai i kwaruma i wona, “Ware! Kega a maniba.” Saba Bada i wona, “Kega kuni gesaira, ku maniba.”
16Maranai sebasebaresi si tauya si nenae wai ku Sodom mena si kinana i gakira, ba Abraham wai yabata si nae, kata iti utu taveyisi.
17Damanina ba Bada i wona, “Mekabaga Abraham ani kosei kata awaika karaku nina ana wosei wai kega ina kurina?
18Ba Abraham wai bisuwona ana dam ina rakata saki ba sini maragata saki wai, dam ereonowana dobu ai konai ba ani gairenisi.
19Kona kairavina yauku a binei natunatuna ba ana rakaraka muri yai te botubotu wai ini beyisi kata Bada ana ketai sina bosisira ba keta totorinai ba gairenai sina mana, ba kona sina wosei wai, Bada Abraham awaika i kaobaiyoyobani wai kurisi ina wosei.”
20Damanina Bada i wona, “Tou rasarasa i rakata saki, Sodom ba Gomorrah kamosi yai, ba asi piraga goyoi rakata saki, ba asi borasarasana i goyo saki wai i borubaiku.
21Kona kairavina ana gakira ana kinani kata awaika a nonori wai bisuwona kona kega wai ana kuiri.”
22Damanina ba sebasebaresi si utusaira ku Sodom si nae, saba Abraham wai Bada yabata si mana.
23Abraham Bada kurina i msi ratu ba i toiruba i wona, “Pipiya gairesi ba goyosi yabata kuna kasipupunisi kona?
24Kata pipiya gaire sakiyisi asi 50 meyaga kaikaponai sita mamana wai kosi mekabage? Kata kupurina kega kuni nuwanuwani ba nakosi 50 yabata kuna pupuna taveyisi kona?
25A notanota kabakabai kata kega rubarubana ba pipiya gaire sakiyisi, ba goyosi wai kuni kesanisi ba kuna kasipupunisi, kom wai dobu kana bibuibuiya bitam. Ba kom dobu kana bibuibuiya bitam wai gairena kuta wosei kona?”
26Ba Bada i wona, “Pipiya gairesi asi 50 Sodom kamonai ana panansi wai meyagina tupana ani nuwanuwani.”
27Ba Abraham Bada kurina i wona mena, “A bibabaim au goyona ke notataveyei ba ai tepatora wai ani sisiya kurim, Bada, yauku pipiya mom ba kega au maragata ba ati sisiya.
28Pipiya gairesi kega 50 ba asi 45 wata wai, meyagina tupana kuna kasipupuni kona?” Ba Bada i kaobeyei i wona, “Pipiya gairesi asi 45 wata ana panansi wai kega meyagina ana kasipupuni.”
29Abraham i sisiya mena i wona, “Ba pipiya gairesi 40 wata kuna panansi wai?” Ba Bada i kaobeyei i wona, “Kega ana kasipupuni.”
30Damanina Abraham Bada i babai i wona, “Kega kuni yagisi ba ani sisiya mena, Ba pipiya gairesi asi 30 wata kuna panansi wai?” Ba i kaobeya, “Asi 30 wata ana pananisi wai kega ana wosei.”
31Abraham Bada i wonei, “Kega kuni yagisi ba ani sisiya mena ba pipiya gairesi asi 20 wata kuna panansi wai?” Ba i wona, “Pipiya asi 20 wata kairavisi wai kega ana kasi bigoyoni.”
32Damanina Abraham i wona, “Bada, a bibabaim kega ki yagisi ba ani sisiya ko bowa ba pipiya gairesi asi 10 wata kuna pananisi wai?” Ba i kaobeya, “Pipiya 10 wata gairesi wai kega ana kasi bigoyoni.”
33Bada Abraham kurina i sisiya i kakaba ba i nae. Ba Abraham i veramaga ana ku yove.
