Text copied!
CopyCompare
Fúka Moodaanaki Kira Ufa Afaqínaasa Ufa - Óosana

Óosana 13

Help us?
Click on verse(s) to share them!
1Abarammafa Isipa máqa máaqakíqari súani afu dínni átaaqeendari dínni átaaqeenni Kannaana máqa máaqai qumurandée narí ánaaqa fáqa Róotana fáqa narí aiqáma qumíasana faqa máree fínau.
2Abarammafa aináina faqáafa márinau. Sipsípa faqa mimmí faqa burimakáù faqa siruáa faqa kóora fáqa faqáafa márinau.
3Mifa miqóoqari quqásee fífiiufanoo Beeteera máqusa ámummaqa fímarínau. Mifá óoqai narí Beeteera máqusa faqa Ai máqusa faqa qámbaana uíqaana máqa usakáqooqoo óoqu ranau.
4Óoqai mifa miqóo tatúfira qáinda áuquqoo óoqureenoo Karaambáiqa innaaru qímamaqánau.
5Róotafa fáqa sipsípauqa faqa mimmíuqa faqa burimakáuqa fáqa faiqì ánaasee fáqa narí aináinira fáiqiuqa faqa mánaaqauqa faqa Abarammana fáqa nímariqau.
6Miqandá moómoo áandau áinaina faqáaqanda máridaqa aandáuqa néemaru andandáfa sía amanaíkufaqa sía amana moodáanaki máriaqaa inóo márinau.
7Miqíqa márufanoo Abarammana aandáusaa rakísi marúsa faqa Rootana aandáusaa rakísi marúsa faqa ándanda nárana sáara tínooriqau. Mikarí Kannaana máqannaasa faqa Peerisa máqannaasa faqa mi maqánasaa káqi máriqau.
8Abarammafa miná qáfamaseenoo Róotana qímaminau. Maasá moodáa óosana máridaqa anée fáqa qinée fáqa sía tínooria, aní faiqi námu fáqa qiní faiqi námu fáqa sía tínooriaqa.
9Maqa máaqa firaatiámma máridanoo ánià, aníndiri raináà, anee aninná áidimari maqána qáfamasee útaaqamásee mi tinai fínaqa qinée moó tinai fuanáura.
10Miqí qímasee qímamufánoo Róotafa áfu máqaidanoo Yóoradanna nóopundu dínni márufanoo Sooara máqusa dínni márufanoo mi qambaanná nammári moómoo márinau. Karaambáiqa kádidakíara foorá moómoo námmari márinau. Ámiqinoo máridanoo Isipa máqa máaqara foorá márinau. Mi aukuannái Karaambáiqa Soodoomma máqusa fáqa Koomoora máqusa fáqa sía náru kámmuqoo Róotafa mi maqa maaqána qáfanau.
11Róotafa qáfamaseenoo aiqáma Yóoradanna áfaasasaa óoqu máriraree qímaseenoo súani óosanai fímaru aatatá finau. Miqí mándeeqara raináqau.
12Abarammafa Kannaana máqa máaqai káqi márufanoo Róotafa Soodoomma máqusa aaqá maqúsauqa dínni dínni márufanoo qámbaana noopúnduki narí úiqaana máqa usakánau.
13Soodooma máqannaasa káaqa mandáinaina máree márusa máridaqa. Karaambaíqa áfusaa óosana óosana mandáinainá uqanna áuqee máriqau.
14Róotafa fífufanoo Karaambáiqa Abarammana qímaminoo qinau, anée máriannáqooqari ámiqimmasee aiqáma atinai aiuqía.
15Anee qáfaanna maqa maaqána aní faqa anísaaqari kambíqainausa faqa nímisáananoo náaruara náaruara ínnindi kámminoo máriannoo.
16Qinée aní áiku ásauku asumu moómoo kambíqa nímaqáanaura. Sía amana moó fánnoo ásaana rírana amanaikíannoo. Núkuda aiqáma amaná ásaana rifáranoo, aní faiqi námu kai sía amana nísaana rifáranoo.
17Doo maqee óonuree aiqáma maqa máaqa qinée aní ámiannana aiuqíà.
18Abarammafa minára iriséenoo narí úiqaana máaqa rapéemma máreenoo Heebaroona máqa máaqaki Mámareena saqáriuqa atukakí óoqureenoo miqóo Karaambáiqa tatúfira qáinda óoninnai áuquseenoo tatúfirana suqá áminau.