Text copied!
CopyCompare
Luda yã takada kũ Bisã yão - NAANAA

NAANAA 13

Help us?
Click on verse(s) to share them!
1Akũ Abramu bò Misila à sù Nɛgɛvi kũ a nanↄo kũ a aruzɛkɛnↄ pínki kũ Lutuo.
2Abramu bi aruzɛkɛdemɛ, à pↄ́kãdenↄ vĩ dasi kũ andurufuuo kũ wuraao.
3Bona Nɛgɛvi à sↄ̃̀sↄ̃ gu kũ guo ari à gɛ̀ɛ à kào Bɛtɛli, gu kũ à bùraa kàtɛn káaku Bɛtɛli dagura kũ Aio,
4gu kũ à sa'oki bòn yã. Akũ à Dikiri sìsi gwe.
5Lutu dìgↄ̃ tɛ́ kũ Abramuo lɛɛlɛ. À sãnↄ kũ zùnↄ kũ bizakutanↄ vĩ se.
6Ń pↄ́kãdenↄn dasi, gu pìi sɛ̃̀ dí mↄ́ḿma ń pínkiro. A yã mɛ́ à tò oni fↄ̃ ògↄ̃ kú gu dokↄ̃nↄ lɛɛlɛ doro.
7Akũ lɛ́kpakↄ̃a gɛ̃̀ Abramu pↄ́dãrinↄ kũ Lutu pↄ́dãrinↄ dagura. Zĩ kũ̀a sↄ̃ Kanaanↄ kũ Pɛrizinↄn kú bùsuu pìn.
8Akũ Abramu pì Lutunɛ: À mana lɛ́kpakↄ̃a gↄ̃ kú ó daguraro, ke ma pↄ́dãrinↄ kũ n pↄ́dãrinↄ dagura, zaakũ danɛnↄn ó ũ.
9Ǹ bùsu gwa da n arɛ pínki. Ò kɛ̃kↄ̃a. Tó n gɛ ↄzɛi, mani gɛ́ ↄplai. Tó n gɛ ↄplaimɛ sↄ̃, mani gɛ́ ↄzɛi.
10Kũ Lutu gu gwà, à è Yoda guvutɛ pínki mↄtↄ vĩ manamana. Ari Dikiri gↄ̃ gɛ́ Sↄdↄmu kũ Gↄmↄrao kakatɛ, guvutɛ pì de lán Dikiri swadakoo bà, lán Misila bùsuu bà, ari à gɛ̀ɛ pɛ́ Zoaa.
11Akũ Lutu Yoda guvutɛ sɛ̀ pínki. Ò kɛ̃̀kↄ̃a, akũ Lutu dà zɛ́n à tà ifãboki kpa.
12Abramu gↄ̃̀ Kanaanↄ bùsun, Lutu sↄ̃ à kú Yoda guvutɛ wɛ̃tɛnↄ dagura. À bùraa kàtɛ Sↄdↄmu sarɛ.
13Sↄdↄmudenↄ sↄ̃ ò vãni, durunnakɛri sànↄmɛ ń ũ Dikiri kĩnaa.
14Lutu tanaa gbɛra Dikiri pì Abramunɛ: Gu kũ ń zɛ́n ǹ wɛ́ sɛ́ ǹ gugbãnduru kũ gɛ̀nↄmidↄkio kũ ifãbokio kũ ifãlɛtɛo gwa.
15Zĩtɛ kũ n è pínki, ma kpàmma, anigↄ̃ de mↄkↄ̃n kũ n burinↄ pↄ́ ũ ari gↄrↄ sĩnda pínki.
16Mani tó n burinↄ kɛ dasi lán bùsu'atɛ̃ bà. Tó gbɛ̃ke ni fↄ̃ à bùsu'atɛ̃ naro, de ani fↄ̃ à n burinↄ naro.
17Ǹ futɛ ǹ gɛ̃ bùsuu pìn ǹ a gbã̀na kũ a yàasaao gwa, zaakũ ma kpàmmamɛ.
18Abramu fùtɛ à gɛ̀ɛ à vùtɛ Mamare gbiri lí kũ ò kú Ɛblↄnunↄ sarɛ, akũ à Dikiri gbagbaki bò gwe.